Update 285
‘ shabash amit tum ye kar sakte ho , tum ye kar sakte ho . Dikha do k tum kis mitti se aaye ho, common my son common ‘
Mera ye akhiri aur final mukabla tha jisme main apne samne wale khiladi se bhid raha tha . Aur pas hi baithe hi coach sir aur kuch sathi khiladi jinka abhi match nahi tha wo sab mera haunsala barha rahe the . Ye awaz Varinder sir ki thi jo poori garam Joshi k sath apni jagah se khade ho kar kareeb aa gye the . Unka josh dekh mera josh bhi barh gya aur main apne kandhe ki parwah na karte hue apne usi kandhe se zor lagane laga jise samne wale ne abhi kuch pal pehle jan bujh kar apni kohni mar kar ghayal kar diya tha . Mansapeshiyon me kisi tarah ka khichav aa gya tha jisse dard ho raha tha aur uska jyadatar war usi ek kandhe par tha . Dekhne me bhari bharkam 130 kilo se upar ka ye ladka kisi bhi mayne me ek professional pehelwan se kam nahi tha aur shuru se hi wo mujh par hamlawar tha . Referee ne use warning bhi thi par wo shayad kisi niti k tehat ye sab kar raha tha . Ek bar to kandhe k dard ne mujhe kamzor kar diya tha aur upar se usne mere usi kandhe ko daba diya tha lagbhag mujhe zameen par chit karte hue . Par Varinder sir ko dekh maine fir se himmat ikattha ki aur dusre hath ko zameen par jama kar apni us bazu ka dam bhi lagaya jo dard me thi aur samne wale ki giraft me. Usne apna poora vajan hi lagbhag mere kandhe aur peeth par daal diya taki main uth hi na paun magar main sari takat ikattha karta hua uthne laga to wo ladka meri peeth k upar hi let gya . Maine ghutna zameen par jamaya aur apna dhad jhatke se upar uthaya . Ab wo ladka zameen se uth chuka tha aur sirf meri peeth par tha meri bazu ko hilne se rokne ki koshish karta hua . Jaise hi maine dayan paon aage la kar zameen par jamaya aur uthane ki koshish ki to usne apna ghutna zor se meri jangh par mara . Ek bar fir referee ne use warn kiya aur coach sir bhi cheekhe is bat par , par main ab rukne wala nahi tha . Dard ki parwah na karte hue main jhatke se utha aur ab wo ladka poora mere kandhe aur peeth par tha use is bat ka andaza bhi na hua k ab wo kya chook kar gya hai . Ek hi kandhe par pakad rakhte hue wo asani se mere dao me aa gya aur maine dusra hath uske sir aur gardan par lapet kar jhukte hue use apne upar se hi zor se zameen par patak diya . Bhari bharkam hone ki vajah se wo bade zor se gira aur sidha uski kamar zameen par zor se lagi . Ek tez karrah uske muh se nikali . Maine jaldi se uska ek paon utha kar jaise hi apne bazuon me fasa kar ghumaya to wo zameen par hath mar kar apni har sweekar karne laga aur Maine use chhod diya . Varinder sir ne daud kar mujhe gale laga liya .
Varinder : shabash my son , shabash , you are really great . Tum ne aaj dikha diya k bina kisi beimani k apni mehnat aur imanadari se jeeta ja sakta hai. Shabash , mujhe naaz hai tum par .
Amit : thank you sir
Coach : o shabash mere sher , jhande gaad diye tune , shabash . Tujhe jyada chot to nahi lagi na ?
Amit : nahi sir main theek hun bas halka sa dard hai
Varinder : sir aap pehle ise treatment dijiye . Aur tum ab rest karo . Chaho to wapis room par chale jao. Main zara management se bat karta hun . Students me hi aise galat bhawan hogi to aage chal kar ye kya karenge . Mujhe iski shikayat karni hogi .
Hamare jo baki sathi baithe the wrestling k jinka match nahi tha unhone mujhe kandhon par utha liya aur nachne lage . Coach sahab bhi khush the , Varinder sir shikayat karne chale gye us ladke ki galat harkat ki vajah se . Ek din shesh rehte hi main jeet gya tha . Khiladi kam hone ka fayda mila tha mujhe apni category me. Aaj bhi mera ye dusra hi match tha aur abhi dopehar hi ho rahi thi. Khushi to mujhe bhi ho rahi thi par sath wale jyada hi khush the . Neeraj bhaiya bhi jaldi hi aa gye apna match jeet kar aur sath shamil ho gye . Unhe jab meri chot ka pata chala to wo mera kandha check karne lage jisme sujan aa rahi thi
Neeraj : yar isme to sujan aa rahi hai . Chal tu pehle chal k is par tube de malish kar aur fir aram kar .
Amit : par abhi to time pada hai na .
Coach : koi bat nahi tum jao , ,,, oye tu dekh kya raha hai , chal jaldi se iske kandhe par malish kar .
Coach sahab ne ek ladke ko malham dete hue mere kandhe ki malish karne ko kha aur ek garam patti charhne ko di. Malish kar k garam patti charhane k bad mujhe wapis room par jane ko keh diya gya . Maine apni dress change ki aur apne kapde pehan kar jaise hi stadium se bahar nikla to samne dekh chaunk gya aur kuch pal k liye meri nazren jam si gyi . Mujhe yakeen nahi ho raha tha k main jo dekh raha hun wo sach hai ya mera veham.
.
‘ ma ye hai Shantnu , Shantanu ye meri ma aur mere papa ‘
Nidhi apne sath ek handsome se ladke ko lekar aayi thi jo dekhne se hi parha likha aur ache ghar k malum jaan padta tha . Rajani nidhi k sath aaye us ladke ko bade gaur se dekh rahi thi aur andar se khush ho rahi thi k uski beti ne jo ladka pasand kiya hai wo wakai me uske layak hai .
Shantanu : namaste aunty namaste uncle .
Rajesh : jeete raho beta , to tum nidhi k dost ho. Kahan rehte ho beta ? Tumhe pehle kahin dekha nahi .
Shantanu : uncle main waise to jairpur se hun par kam k silsile me jyadatar bahar hi rehta hun . Job hi aisi hai k kabhi yahan kabhi wahan .
Rajesh : kaun si company me kam karte ho beta ?
Shantanu : ji xxxxx travels , hamara kam videshi mehmano ko apne desh ki sair karwana hai. Is liye bahut travel karna padta hai
Rajani : ghar me kaun kaun hai beta ?
Shantanu : ji aunty main yahan akela hi hun . Mere mom dad America me rehte hain . Aur koi bhai behan nahi hai .
Rajani : matlab yahan par koi bhi nahi hai tumhare ghar ?
Shantanu : jo nahi
Rajani : koi rishtedar to honge na
Shantanu : hi koi saga wala nahi hai aur dur k rishtedaron ka mujhe kuch khas pta nahi hai . Wo bas mom dad ko hi pata hai .
Rajesh : America me tumhare pita ji kya karte hain.
Shantanu : ji wo apne dost ka store sambhalte hain. Abhi unhe gye jyada der nahi hui.
Rajesh : to tumhare pita ji kab aa sakte hain? Matlab unse bat karni ho to kaise kar sakte hain.
Shantanu : uncle bat ye hai k unhe gye abhi jyada der nahi hui hai aur abhi unko wahan ki citizenship nahi mili to wo to abhi aa nahi sakte is liye aapko mujhse hi bat karni hogi.
Rajani : to beta fir shadi kaise hogi ?
Shantanu : ji aap hain na ashirwad dene k liye. Log to aaj kal court marriage hi karwa lete hain . Maine bhi yahi kaha tha nidhi se . Shadi k bad to hum dono ko hi rehna hai na sath me .
Rajani : ye kya bat hui , shadi to ek hi bar honi hoti hai zindagi me. Kya Kya sapne nahi hote ma bap k wo kya sab aise hi kagaz pe sign kar k tod doge .
Nidhi : ma aaj kal aise hi ho raha hai duniya me. Time bhi bachta hai Aur financially bhi kisi ko dikkat nahi hoti.
Rajani : tu mujhe na samjha , main teri ma hun tu nahi. Shadi sirf ek function nahi hai na hi koi sauda hai jo kagaz pe sign kar k poora ho jata hai. Ye samaj ki reet hai taki sari duniya ko pata chale k kya ho raha hai. Rishte nate walon ko bulaya jata hai sab bataya jata hai. Ek dusre k pariwaron se mila jata hai. Is din k liye to kitne kitne sapne dekhte hain sab aur tum mujhe keh rahi ho k time bachana hai paisa bachana hai . Tujhe paison ki chinta karne ki zarurat nahi hun kar lenge sab aur time itna bhi nahi lagta k koi apni zindagi k sabse eham padav k liye itna bhi na kar sake .
Rajani to ek dam se jaise gusse me hi aa gyi thi nidhi ki bat par. Kya Kya nahi soch rakha tha usne nidhi ki shadi k liye aur nidhi kaise asani se keh gyi thi court marriage wali bat . Rajani bat sun kar nidhi k mathe bal pad gye . Usne to socha tha k court marriage kar k wo asani se sabki aankhon me dhool jhonk degi . Amit k nam k Mangal sutra k ilawa kisi aur k hathon wo mangalsutra pehan hi nahi sakti thi.
Rajesh : are bhagwan tum itna gussa kyun kar rahi ho . In dono ne to apne vichar hi bataye hain faisla thode na suna diya hai . Kyun beta ? Itna maan to hamara rakh hi sakte ho na . Ma bap k bhi kuch arman hote hain apne bachon k liye
Shantanu ne ek bar nidhi ki taraf majburi me dekha par nidhi bhi bechari ab kya karti . Nidhi ne shantanu ko samjhaya tha k court marriage k liye ghar walon ko manana hai par yahan to koi option ni nahi thi jaise
Nidhi : par papa…
Rajesh : ek bap ko uske arman poore nahi karne dogi beta ? Itna hak to mujhse mat chheeno.
Nidhi apne baap ki is bat par bebas hi ho gyi aur use dekh shantanu ne bat ko sambhala .
Shantanu : are uncle aap aisa kyun keh rahe hain . Aap jaisa chahte hain waisa hi hoga. Par main pehle hi bata deta hun k meri taraf se to koi nahi aane wala , mom dad bahar hain aur dusre kisi ko main na janta hun na koi ana jana hai. Kuch dost hain par wo bhi door hain . Agar aa sake to shayad wo aa jayen .
Rajani : par beta barat me kuch log to hone hi chahiye na , log kya kahenge .
Rajesh : rajani tum bhi kaisi baten karti ho. Har bat par logon k bare me sochna chhodo. Ab majburi hai to kya karen ? Jinka koi nahi hota kya wo shadi nahi karte . Aur fir hum sab to hain hi, sab k sab yahin hain . Hun sab mil kar nidhi ki shadi ko yadgar bana denge dekhna tum. Beta , nidhi aur tum ek dusre ko pasand karte ho to mujhe koi aitraz nahi hai. Waise bhi zindagi tun dono ne sath me guzarni hai. Fir bhi tumhari koi demand ho to bata do.
Shantanu : ye kaisi baten kar rahe ho uncle , aap nidhi k hi nahi ab mere bhi papa hain. Nidhi ka hath mere hath me dekar aap ne mujhe sab kuch de diya hai . Aur kisi cheez ki zarurat hi kahan hai . Bhagwan ne hath paon diye hain kamane k liye aur main itna to kama hi leta hun k apna aur apni biwi ka ache se khyal rakh sakun.
Rajesh : nidhi beta , tum kya bhukha rakhna chahti ho shantanu ko ? Jao iske liye kuch kahne ko lao.
Rajani : main bhi bhool hi gyi thi , abhi aayi , chalo nidhi mere sath .
Nidhi aur rajani dono uth kar chali gyi kitchen me .
Rajesh : bhai mujhe to tum bahut ache lage aur jahan tak mera khyal hai rajani ko bhi koi aitraz nahi hai. Bas ab karan aur naina aa jayen to unse bhi mil lo .
Shanatanu : ji uncle
Rajesh : waise shadi k bad tum log Jaipur me hi rahoge ?
Shantanu: ji meri to job aisi hai k kahin bhi thehrata nahi hun. Ghar par bhi jyadatar taala hi rehta hai. Aise ne wahan nidhi akeli ho jayegi to main soch raha hun k yahin ek ghar le lun taki main bahar bhi rahun to kam se kam nidhi ko aap logon ka sahara rahega .
Rajesh : ye to bahut achi bat hai , hamari beti hamare pas rahegi to dil ko sunoon rahega aur jab dil karega hum is se mil bhi sakenge .
Rajani aur nidhi itne me khane pine ko kuch snacks le aayi . Shantanu k sath dono Miya biwi kuch sawal jawab karte rahe aur tab tak karan aur naina bhi college se wapis aa gye . Karan ne bhi kuch aupacharik baten ki waise bhi use kuch jyada lagav nahi tha ab apni is behan se jab se usne amit ki side leni shuru kar di thi use andekha kar k. Naina ko rajani ne hi beech me baith ne nahi diya par wo nidhi ko zarur le gyi apne sath uski taang khinchne k liye
Naina : didi jija ji to bade smart hain , kahan se mil gye aapko ye ? Aapne pehle purpose kiya tha ya unhone ? Aap kahan mile the ? College se to nahi hain ye aapke itna to mujhe pata hai . To fir aap kahan mile kaise bat shuru hui ? Bataiye na .
Nidhi : tujhe kya krna hai pata kar k ? Tujhe pasand hai na ?
Naina : mujhe pasand kyun nahi aayenge jab aapko pasand hain. Main to ye soch rahi hun k agar inka koi bhai to bata do , agar unke jaisa hi hua to dono behne ek hi ghar me reh lenge jethani Devrani ban kar he he he
Nidhi : tujhe jyada jaldi hai to tu hi karle pehle shadi .
Naina : naraz kyun hoti ho didi , mujhe to pehel aap ki shadi dekhni hai bahut sari masti karni hai . Waise aapka hi fayda hai agar aisa ho to , dono sath me rahengi to aapko kisi tarah ki tangi nahi hogi .
Nidhi : mujhe waise bhi koi tangi nahi hone wali. Kyunki wo akele hain , na koi bhai na koi behan .
Naina : matlab ab koi chance nahi , maine kya kya socha tha k masti karungi jeeja ji ki koi behan ya bhai hota to usko khoob satati shadi me . Khair chhodo , kismat hi kharab hai. Waise aap na ab jaldi se shadi karlo , warna kahin koi aur na fasa le inko.
Nidhi : dekhenge , jaisa ma papa decide karenge .
Naina : kash aaj wo budhu bail yhan hota to wo bhi mil leta jeeja ji se
Amit ka zikar aate hi nidhi ek dam se khamosh c ho gyi. Isse pehle k Uski ankhen apni nami zahir karti nidhi wapis un logon k pas aa gyi. Aur fir shantanu ne bhi jane ki ijazat mangi . Waise to rajesh ko ye ladka pasand aa gya tha aur wo turant rishta pakka kar dena chahta tha par fir bhi ek bar sab se akele me charcha kar lena usne zaruri samjha aur shantanu ko fir se aane ko kaha . Nidhi shantanu ko chhod kar aane ka keh kar use car me bitha kar nikal padi .
Shantanu : maine sab ache se to kiya na ?
Nidhi : hmmm
Shantanu: waise ek bat puchun ?
Nidhi : hmmm
Shantanu : aap ye sab kis liye kar rahi hain? Mera matlab hai k aap itni achi hain , itni khubsurat hain . Aapko to koi bhi ladka han kar dega fir aap ye sab kyun kar rahi hain?
Nidhi : dekho main ye sab nahi bata sakti aur tum bhi ye sab janne ki koshish mat karna .
Shantanu ( man me ) kitni achi ladki hai yar , pta nahi kyun ye sab kar rahi hai. Ek bar bas bol de to sach me isse shadi kar lun . Aisi ladki to kismat se hi milti hai . Aur main sala kis chakkar me das gya hun. Koshish karne me kya jata hai. Shadi ka natak karte karte kya pata bat ban hi jaye . Waise bhi kisi aur ko thodi pta hai k ye sab drama ho raha hai. Kuch ho bhi gya to logon ki nazar me to main pati hi hun .
Shantanu : ok ok , waise ab kya karna hai ? Matlab aap to court marriage ka keh rahi thi aur ab to yahan poori shadi ki bat ho rahi hai
Nidhi : mujhe bhi isi bat ki tension ho rahi hai . Main ye sab nahi karna chahti par ab ma pap ko kaise samjhaun.
Shantanu: waise mujhe koi aitraz nahi hai par ,,,
Nidhi : par kya ?
Shanatanu: ye asal me shadi hogi aur iska matlab to aap janti hain na ? Aur main in reeti rivajon ko bahut manta hun
Nidhi : look mister , maine aapko pehle hi sab samjha diya hai. Aap ko aitraz hai to aap abhi mana kar sakte hain. Ye sab sirf dikhawe k liye hai . Usse jyada kuch nahi .
Shantanu : are main to bas ,,,,, aapko bhala koi mana kaise kar sakta hai. Agar mera bas chalta to sach me hi aapse shadi kar leta .
Nidhi : dekho mujhe aisi baten bilkul nahi pasand , tum jis kam k liye aaye ho wo kam khatam karo aur fir tum apne raste main apne raste .
Shantanu: par kal ko tumhare gharwale mujhse milne ko bolenge to kya jawab dogi?
Nidhi : wo meri problem hai , lo tumhara hotel aa gya .
Shantanu : gadi se utarte hue ) ye sab asan nahi hoga tumhare liye . Waise agar tum ready ho to main apni family ko bula sakta hun
Nidhi : dekho , mujhe ye sab baten pasand nahi . Agar dubara tumne dobara aisi bat kahi to hamara contract yahi khatam kar dungi main.
Shantanu: ok ok , main to bas bat hi kar raha tha . Fir milte hain bye .
Nidhi Shantnu ko wahin chhod kar nikal gyi. Par shantanu ki baten nidhi k man me ek dar sa paida kar gyi thi. Kahin usne galat ladke ko to nahi chun liya ? Kahin usne uska kisi tarah ka fayda utha liya to ? Ye sab soch soch kar nidhi ka dil darne laga . Kahan wo sirf court marriage kar k bahar se sab rafa dafa karna chahti thi aur ab uske ma bap ne poori shadi ko shart daal di thi . Nidhi ko ek aur bat pareshan kar rahi thi aur wo thi shadi k samay Mangal sutra pehnaana aur maang me sindoor bharna . Ho wo amit k siwa kisi aur k hath se karna nahi chahti thi. Is liye nidhi ka dil baitha ja raha tha . Use kuch samajh me nahi aa raha tha k ab wo kya kare . Is sab ki vajah Deepika mami hi thi is liye ab wo hi koi hal nikal sakti thi is liye nidhi apne office pahunch kar unko phone karne lagi aur unhe sari bat batai . Deepika bhi nidhi ki bat sun kar thoda pareshan to hui par usne kaha k wo koi na koi hal nikal legi . Is bat se nidhi ko kuch santosh to hua magar fir bhi uski bechaini kam nahi ho rahi thi. Use amit ki aur bhi yad aane lagi . Use dar satane laga k kahin kuch gadbad hui to amit ko Kho baithegi . Ab bas Deepika mami ya fir bhagwan ka hi sahara tha .
.
‘ tum to us dehati k sath hote ho na , fir hamare pas kya lene aaye ho. Jao ja kar baitho unhi logon k sath . Pata nahi khud ko samajhte kya hain sab. Hamari kitni insult hui uske karan hum ye bhool nahi sakte . Isse pehle k tum pas uska gussa utare chupchap chale jao yahan se ‘
Sanjay poore college ki nazron me hero banne k chakkar me un sab se mil raha tha jo alag alag activities me college me khas the . Aur isi k chalte aaj wo jis group se mil raha tha ye wo hi group tha jisme kabhi Sheena aur monty hua karte the ya yun kaho k Sheena aur monty ki gang . Monty to college se gayab hi ho gya tha aur Sheena ne in sab ko chhod kar amit ki hi company me rehna shuru kar diya tha . Sanjay un logon ki baton se andaza laga raha tha k unki zarur amit se koi personal khunnas hai aise me ye log uske kam k ho sakte hain.
Sanjay : tum log galat samajh rahe ho mujhe . Mera usse koi lena dena nahi wo to meri cousin ki vajah se main usse bat kar leta hun warna wo is layak nahi k usse bat bhi ki jaye .
Nitika : han hai to wo dehati isi kabil pata nahi Sheena ko kya ho gya hai jo us faticher k liye hun sab ko chhod diya . Monty yahaan hota to saale ko ab tak college se nikalawa diya hota . Aur wo Shivani aur shalu bhi kaise uski chamchiyan bani hui hain. Ek bar monty ko aane do sabki akal thikane aa jayegi .
Sanjay : waise main to yahan par naya hun par tum logon ki baton se lag raha hai k bahut kuch hua hai yahan par .
Rocky : tumhe kisi ne kuch bataya nahi ? Batayenge bhi kyun , sala wo to hero hai na unka . Waise tu hamare pas kis liye aya hai? Kahin jasoosi karne to nahi aya ?
Sanjay : kaisi bat kar rahe ho yar , main kyun jasusi karunga wo bhi uske liye jo mera sabse bada dushman hai .
Nitika : dushman ? Tumhari usse kya dushmani hai ?
Sanjay : ab kya bataun , ek ladki mujhe pasand hai aur uski vajah se meri bat nahi ban rahi. Bat kya bane koi mujhe usse bat karne ka mauja hi nahi deta wo bhi us gainde ki vajah se .
Raghu : kis ladki ki bat kar rahe ho tum ?
Sanjay : Radha
Nitika : ha ha ha , lagta hai tumhare din kharab aane wale hain . In logon ko dekh rahe ho ? Ye bhi usi k piche the wo Radha aur uski wo behan Neha . Ye hi kyun monty bhi uske piche tha . Usi ki vajah se to usne sare college k samne hath uthaya tha monty par . Kya kuch nahi kiya par sab fail ho gya . Aur uske bad to monty kabhi dikha bi nahi aur wo Sheena bhi uski taraf ho gyi . Meri mano to galati mat karna warna tum bhi pachataoge
Rocky : ye tum Kya bol rahi ho nitika . Dushman ki tareef kar rahi ho ?
Nitika : wo hi keh rahi hun jo sach hai. Tum log khud hi batao kya kuch nahi kiya tha humne magar hua kya ? Kya koi kuch bigad paya uska ? Upar se humne monty aur Sheena ko hi Kho diya aur wo shalu ? Dobara hath aayi kya kisi k ?
Nitika k is tanj par rocky aur Raghu ki gardan jhuk gyi par chehre par gussa tha aur jabde bheenche hue .
Sanjay : mujhe koi batayega k majra kya hai ?
Nitika : tum is se door hi raho
Sanjay : door kaise rahun? Mujhe Radha pasand hai aur main use hasil kar k rahunga . Tum logon ki baton se lagta hai k tum logon ko bhi usse badla lena hai . Agar tum log mera sath do to mera bhi kam ho jayega aur tum logon ka bhi
Nitika : acha !! Wo kaise?
Sanjay : agar main sabit kar dun k wo koi hero nahi hai to sab meri side lene lagenge aur fir hum mil kar us gainde ki wo halat kar denge k Sheena aur baki sab use khud hi chhod denge .
Nitika : impossible, Sheena aur hum school time se best friends the aur uski vajah se usne humen chhod diya . Wo bhala kyun chhod hi use ?
Sanjay : kyun nahi chhodegi ? Main wo sab kar sakta hun , tum log agar mera sath do to main sab kar sakta hun .
Raghu : par ye sab tum karoge kaise ? Jab hum sab uska kuch nahi kar paye to tum kya kar loge ? Upar se Sheena ne warning de rakhi hai k hum me se kisi ne kuch kiya to wo humen chhodegi nahi .
Sanjay :tum log itna darte kyun ho Sheena se ?
Nitika : tum abhi jante hi kya ho uske bare me ? Tumhe kuch nahi pata isi liye ye sab bol rahe ho. Uske dad se sara shehar darta hai aur unki pahunch kahan tak hai tujhe andaza bhi nahi
Sanjay : aur agar Sheena khud hi uska sath chhod de to ?
Nitika : wo aisa kyun karegi ?
Sanjay : is liye k main aisa karwaunga . Tum log mera sath doge k nahi ?
Rocky : par tum karoge kya ?
Sanjay : jo kam samne se nahi ho sakta wo piche se ho sakta hai. Dushman ban kar tum log kuch nahi kar paye par dost ban kar main bahut kuch kar sakta hun. Bas zarurat hogi use sabki nazron me girane ki. Fir dekhna khud hi Sheena use laat mar kar tum logon k pas wapis aa jayegi .
Nitika : kya sach me tum aisa kar sakte ho ?
Sanjay : agar tum log sath do to , kam to main akela bhi kar sakta hun par tum sath ho to ye kam jaldi ho jayega
Rocky / Raghu : hun sath hain .
Nitika : agar tum wakai me aisa kar sakte ho to hum tumhara poora sath denge . Tum batao kya karna chahte ho ?
Sanjay : to theek hai , aaj sham ko milte hain kahin bahar . Yahan par bat karna theek nahi .
Nitika : ok , sham ko milte hain .
Uske bad Sanjay un logon k no. Le kar muskurata hua wahan se chal diya. Use aisa lag raha tha jaise uska kam ab jaldi hi ho jayega . Ab use ek solid sa plan banana tha jiske amit ko fasa kar wo khud hero ban sake .
Join Our
Discord Server
For Daily Updates
