Join Our
Discord Server
For Daily Updates
- 412
- 3,542
- 123
Update 197
Dohra Charitra
"Main kuch keh sakta hu bau ji?", Madhuri aur uske sasural walo ke sath sath Radhika ke bhi mata pita laut chuke the. Idhar se he Gorav aur Madhuri apne honeymoon par aur baaki log apne ghar. Aaj bagiche me Rameshwar ji ke sath Sanjiv tha, paani ka chhidkaav karte hue kuch gambhir. Uski daadi abhi abhi Roshni bua ke sath mandir gayi thi, apni aastha ki wajah se. Sanjiv bhi yaha isliye ruka tha ki nikalne se pehle wo apne dada ji se bhi kuch charcha kar sake. Rameshwar ji thodi nayi mitti tayaar kar rahe the jo unhone nehar kinare se mangwaayi thi bagiche me milane ke liye. Mitti ke naram dhele todte hue wo ruk gaye jab Sanjiv ne unse aagya chahi.
"Haan bilkul keh sakte ho bhai. Is desh me ye bhi ek adhikaar hai jo tumhe purn ajaadi deta hai apni baat rakhne ya kehne ka.", Ramshwar ji kaha sidha jawaab dete the lekin Sanjiv bhi toh unki chhaya me rehte hue ya bhali prakaar jaan chuka tha. Usne fir bhi chehre par khushi ke bhaav prakat na kiye.
"Aapko lagta hai ki munna jo kar raha hai wo sahi kar raha hai? Haan main us par sandeh nahi kar sakta lekin aap jyadatar pehlu kanoon ki najro se dekhte hai aur mujhe dikh raha hai toh bas apna chota bhai jo bahot saare kanoon aur niyam unki he kamjori ki wajah se badal raha hai.", Rameshwar ji sab sunte hue khurpi lagatar un naram londho par chalate rahe. Sanjiv ne ek taraju me swayam pandit ji aur unke niyam toh dusre me Arjun ko khada kar diya tha. Wo ye bhi jaan gaye the ki Sanjiv se baat bachi nahi hai jo shayad Arjun ka he kiya dhara hai lekin wo fir bhi apne bhai se dur ja raha hai jisme Arjun ka he aagrah hoga.
"Beta reitili mitti me jitna marji paani udel do wo sab sokh kar fir se pyaasi ban jaati hai. Matlab ki niyam jitne marji bana lo par kya kahi wo khatam ho sakte hai? Nahi na? Lekin us reitili mitti me agar garda mila diya jaaye toh kya hoga?", Sanjiv paani aage ki disha me dete hu har baat dhyaan se sunn raha tha.
"Santulit ho jaayegi ye nayi mitti. Na jyada paani sokhegi aur na kichad rahegi. Lekin meri baat ka matlab toh munna aur uski kaarastaniyon se hai na jo thodi bahot toh aapko bhi pata lagi hongi?"
"Hahaha.. yar tum dono bhi toh aise he ho. Khair jawaab jyada saral lehje me dene ki koshish karta hu. Tum ho kanooni aadmi aur wo hai fakeer mastmaula. Jab dono ke beech gehra taalmel baith jaaye toh meri kya bisaat jo main kuch bol paau.", Rameshwar ji ne toh yaha jawaab dene ki jagah jaise Sanjiv ko he lapet liya tha uske aur Arjun ke taalmel ki wajah se. Lekin Sanjiv bhi dhun ka pakka tha jisne is baat par pratikriya dene ki jagah fir se apna sawaal dohra diya.
"Wo kanoon todega toh aap kya karenge bau ji?", Ab toh Pandit ji ne khurpi ek taraf he rakh di aur paani se hath dhone ke baad kursi par baithte hue bagal me Sanjiv ko bhi baitha liya.
"Tum galat karte ho kuch jab duty par hote ho?", Unka ye prashan sachmuch kehne ko he chota tha par Sanjiv aakhir unka he khoon tha aur thik unka anusaran karne wala.
"Apne aap ko aaine me na dekhu bau ji lekin aatma-manthan me kya karunga jab daga karunga? Katai aisa nahi kar sakta jis se meri vardi se pehle aatma par daag lage."
"Main jaanta hu mere bache main atchi tarah se jaanta hu aur yahi wajah hai ki hum tumhare har sawaal par khudse he charcha karte hai. Sanjiv koyi bhi baat aise nahi karta, uski wajah hoti hai aur wo is dehleej ke bahar hai toh duty par hai. Haan Arjun sath ho toh duty avkaash par chali jaati hai aur avkaash pehle he ho toh tum par apne chote ka bhai ka asar ho jata hai. Lekin dusra pehlu jo hai mere sikke ka wo is chehre jitna spasht nahi hai, bas kehne ko number hai. Head tum ho toh tail wo lekin tum chehra ho aur wo... wo pata nahi kya kya hai jo hume bhi kayi baar samajh nahi aata. Khud he dekho ki uski paribhasha toh swayam hamare he paas nahi hai toh koyi aur kya dega? Lekin jaise mujhe tum par vishwas hai na Sanjiv, waise mujhe us par garv hai. Wo kahi jyada he bada registaan hai bhitar se jo tukdo tukdo me saari garda dhoond dhoond kar apne bhitar sama lega. Jaise wo tumhare gunn le chuka hai, mere, apni maa ke aur kudrat ke.", Arjun ka ullekh karte hue wo thoda sa rukte hue Sanjiv ke chehre ke bilkul kareeb aaye aur dhimi awaaj me kaha.
"Blackhole hai wo lekin sirf toote grah aur taare apne andar samahit karne wala. Bas is ek niyam ko he maanta hai tumhara munna aur mere bhi hath khade beta hai kuch maamlo me. Wo jitna khaa chuka hai hume uski khabar he nahi hai aur na tumhe hai, yakin hai hume kyonki wo jis taal pe sabko nacha raha hai uske kuch ansh hamare he aks se jude hai lekin us gyaan ko maine uplabdh nahi karwaya aur or koyi jaanta nahi. Ab ulta ye humko he waha bulane me kaamyab ho gaya jaha jana nahi chahte the."
"Haan aap sahi kehte hai bau ji. Jab meri baah pe soya hota hai toh lagta hai wo aajtak 13-14 saal pehle wala mera nathkhat chota bhai hai par wo apni anjaan duty par hota hai toh uski tayaari pehle he rehti hai. Sabhi ghatnaye, unse jude log aur shayad parinaam bhi. Wo boarding me he tha na bau ji?", Arjun ke vishaya me ye sab sunn kar khud Rameshwar ji ab khamosh rehne ka mann bana rahe the lekin Sanjiv ko pareshan mann ghar se vida karna us dada ko sahi na laga.
"Wo choti choti baato ko ehamiyat deta hai jaise tum dete ho. Lekin wo unke bhi ateet me ghus jata hai jabtak gehraai na maap le, matlab usko farak nahi padta ki ganit ka formula samajhte hue wo bhauti vigyaan me ja raha hai aur udhar se koyi yunani chinh usko kahi aur le jaaye. Wo khojta rahega jab tak ki wo wapis ganit par na laut aaye. Main matlab jaise tum ho waisa he tha aur tumhare Raghuvir dada thode bahot aise jaise Arjun, bahot thode the matlab. Lekin tumhari daadi hai bahot gehre mann wali aur bahar se sakth. Aise he pita ji the hamare, jitna unhe samajhne ki koshish karo utne samajh se bahar aur fir hume ijajat bhi nahi thi jyada taak-jhaak ki. Tumhare pita, chacha aur mama log ya jitne bhi kareebi hai unka kuch alag toh kirdaar hai na, visheshta?", Sanjiv ne paani band karte hue bas sar haa me hilaya.
"Ye insabke gunn le raha hai ya kayion ke toh le bhi chuka hai jaise mere, tumhare, tumhari daadi ke aur sabse eham hai Raghuvir Singh ke khaas gunn jo uske baad thode bahot toh Shankar me bhi the lekin jyada the Ajju me par Ajju tumhari daadi se seekh gaya tha dimaag ko niyantran me rakhna. Ab Arjun wo sabhi niyam jaan ne ke baad unki he kamjori ko hamare saamne la raha hai aur hum siwaye uska sath dene ke kar bhi kya sakte hai.? Lekin jis tarah tum apna karm kar rahe ho, mujhe bhi karte rehna hoga. Tark-sawaal aur gehan avlokan karne se pehle uske kisi bhi kadam par sandeh nahi jataya ja sakta. Toh tumhare laadle ne tumhe nahi bulawa bheja?", Apni majburi khul kar kabool karne ke baad unhone Sanjiv ke kandhe par hath rakhte hu jab akhade ki chunti ke sandarbh me poocha toh wo sar jhukaye he muskura diya.
"Aap sab jaante he hai bau ji. Wo batane ke bawjood hath bhi bandh deta hai aur usne iska jawaab ye keh kar diya ki bhaiya aap jab wapis lautne wale ho toh ek baar phone karna 20 din baad he milenge. Aur mujhe waisa he karna hoga.", Sanjiv uth khada hua saamne Narinder chacha ko car nikale dekh. Radhika sabse milne ke baad dada ji ka aashirwad lene aayi thi jaane se pehle aur Sanjiv uski bagal se nikal kar baaki sadasyo se milne laga. Ab unhe bhi jana tha apne naye rishtey ko majboot banane aur duniya eksath dekhne.
"Bitiya, khaali hath matt lautna. Zindagi aksar bhaagdaud me he nikal jaati hai aur hum phir ek samay par khaas yaadon ki jarurat rehti hai. Apne liye waisi he khoobsurat yaadein jutane ki ye sahi disha hai. Bhagwan Narayan tumhe khush rakhe aur har manokaamna purn ho.", Wo paanv chhone nahi dete the isliye paas baitha kar bas sar pe hath rakhte hue aashirwad diya. Radhika dekh rahi thi ki itne asadharan pratishta wale uske sasur kaise nange paanv he mitti sane paanv ke sath is bagiche me baithe khush the. Uske chehre par bhi pratiuttar me bholi muskaan aa gayi.
"Ji bauji aap bhi apna dhyaan dijiyega aur ye sab kaam kam he kare toh sehat thik rahegi aapki."
"Hahaha.. tum Guddu ki tarah baat kar rahi ho lekin itna dhyaan rakho ki mitti se lagaav barkaraar na rahe toh aksar bimari gher leti hai. Tumhari daadi tumhe jata nahi dekh sakti thi isliye tumhari kushalta ki kaamna maangne apne prabhu ke darbar chali gayi. Pahuchte he unse baat karna aur ab tumhe jana chahiye.", Rameshwar ji ne Radhika ko thik chote bache ki tarah samjhaya toh wo bhi jhempti hui hath jodd kar wapis laut aayi. Car me baithne se pehle Ritu ne jarur unke kaan me kuch kaha jis par wo hairani aur muskurahat ke sath pehle usko dekhti rahi fir kandhe par chapat lagati hui hansti hui pichli seat par baith gayi. Kayi hath in dono ko vida kar rahe the naye safar par jaate hue. Aur pandit ji sabko dekhne ke baad unki tulna apne bagiche se karne lage. Dono he hare-bhare aur vividhta se bharpoor the. Bas aaj us papite ke vriksh ne pehla phal dikhaya tha aur kuch phool bata rahe the ki ye toh bas shuruaat hai.
'Teri maya tu he jaane Arjun puttar. Bina beej ka phal uga diya isne ab pata lagao bhi toh kaha se lagao ki iski nasal me badlaav kaha se aaya?', Apne antarmann me bhi Rameshwar ji ka sochna paheliyon se he bhara tha aur fir khud he hanste hue apne hath paanv dhone lage jab Alka wo paani ki pipe chaalu karke unke saamne aa khadi hui.
"Aaj toh aap maal-poode banane wale tha dada ji? Dekh lo ab toh sab chale bhi gaye aur aapne time yaha kyaari me laga diya.", Alka ke shikayati lehje aur narajgi par Rameshwar ji ne bhi maafi maangi.
"Lakshmi beta tu kuch kahe aur main waisa na karu ye kabhi hua hai? Pehle rasoi khaali karwa aur mujhe bata. Main kapde badal kar aata hu fer sath me kheer bhi rakhte hai. Mewe pehle nikaal le teri daadi ki baari se, wo aa gayi toh pher ulahne dene se na hategi bp aur bimari ke.", Rameshwar ji is se pehle shayad tabhi rasoighar me gaye honge jab Alka ne farmaaish ki hogi, 1 ya dedh saal pehle. Lekin jo bhi banate the fir unki takkar ka poore ghar me koyi na tha us pakwaan me. Aaj unka mann bhi halka tha aur wo kuch hadd tak khush bhi the. Alka bhi chehakti hui nikal bhaagi aur apne bacho ko khush dekh wo bhi muskura diye.
'Kasuhalya devi aise he banaye rakhna is laghu sansaar ko. Sab tumhari he tapasya aur mehnat hai.'
.
.
"Dekho bhai apne Arjun ne kabaddi wale khiladiyon ke sath toh daav-pench ke liye mana kar diya jo ki sahi bhi hai. Teesre din inka bhi khel hai aur aise me bematlab kisi ke chot aa jaaye toh khamiyaja poori team ko uthana padega. Ab Shahid ke toh hath khade ho chuke hai lekin apne chote pradhan ji aadha kanaal khudai karke bhi maidaan se hatne ka naam nahi le rahe. Lekin ab kushti ki bajaye match hone ja raha hai kabaddi ka jisme ek taraf hoga Arjun toh dusri taraf gaanv ko 4 baar pratyogita jiwane wale hamare soorma. Wajah bhi iske peeche jaisa Sarpanch sahab aur Arjun se charcha karne par mujhe pata chala. Team pichle 3 baras se dusre he sthaan par rahi hai kyonki parle unche pind wale kaha humse behtar hai wo kami dur karni hogi.", Jugraaj ji sabhi khiladiyon aur shamil logo ko sambodhit karte hue unchi awaaj me bata rahe the aur kabaddi ke naram maidaan ke ird-gird mercury light ki doodhiya roshni me najara joshila ho chala tha. Safed chalk mitti se ghera bana diya gaya tha aur ek taraf akela Arjun khada tha toh dusri taraf Shahid, Dilbag, Kamlesh, Bhola ke sath sath unke purane sathi jo aaj bhi lambe tagde the aur kheto me mehnat ke sath kahi jyada majboot bhi.
"Master ji, aapne toh kaha tha ke Arjun bhai daav lagayenge aur wo bhi ek sath 2-2 bando pe.", Ye yuvak vartmaan kabaddi team ka raider tha, Billa. Kad-kathi me pehalwan aur Arjun jitna he lamba. Uski baat par kayion ne samarthan kiya. Is mahol ko ek taraf toh Damini apni saheli Indu ke sath dekh rahi thi aur dusri taraf chote se vriksh par hath tikaye sehmi hui Dipa bhabhi. Mitti me sana Arjun bilkul mastaye hue saand sa khada tha us maidaan me. Aur thik uske saamne dusri taraf 7 pehalwan sarikhe dugni umar ke maharathi.
"Sunn toh lo bhai sab poori baat. Maksad hai apni aaj ki team ko raid aur gherabandi sikhane ka lekin isme ek badlaav ye hai ki Arjun ko kam se kam 2 logo ko hath lagana hoga raid maarte waqt aur idhar se jo raid maarne jaayega uspe agar Arjun ne daav na lagaya toh ek ank saamne wali team ko. Haar aur jeet pe inaam bhi hai jo apne sarpanch sahab ne ghoshit kiya.", Jugraaj ji ne hanste hue apni baat ko wahi beech me choda toh logo ki utsukta badh gayi. Wahi Dipa bhabhi ne dekh liya tha ki Damini aur Indu ek taraf dabe paanv ja rahi thi. Dimag do tarfa tha ab unka. Pehle wo Arjun ki chinta se yaha aayi thi aur ab in dono ko aise jaata dekh koyi aur bura khayaal mann me uthne laga.
"Master ji ab inaam bhi bata do, kyun tarsa rahe ho hum bacho ko?", Ye Bhoot tha lekin jaane kyun usko ye naam diya gaya. 6 feet uncha, thoda pakke rang ka lekin jism se balisht. College tak padhaai ke baad filhal natije ke intjaar aur kabaddi ke siwa koyi kaam nahi tha.
"Inaam ye hai kaka ji ki jo bhi Arjun se ek point hansil karega, badle me apne sarpanch ji tumhari team ko ek khuraak denge. 5 point ka game toh matlab Dilbag ki team agar 5 ank arjit karti hai toh agle 3 din ki khuraak ka kharcha apne maan-niya sarpanch ji uthayenge. Doodh, anda, meat, maalish sabkuch.", Ab toh Kewal Singh ke naam par jordaar taaliyan goonji. Wo bhi hath utha kar sabko shaant karte hue khushi se haan bharne lage.
"Ye toh ek tarfa inaam hua ji. Arjun bhai jeetega toh kya hume khuraak Sarpanch sahab ko deni padegi?", Bhole Nihaal ka bhola sa sawaal tha aur sabhi hans diye. Ek taraf kuch ladkiyan bhi hath me badminton liye khusar phusar kar rahi thi. Khel-ghar me unka bhi dabdaba tha barabari ki wajah se beshak ladkiyan jyadatar badminton tak he simit thi ya fir wo thoda bahot handball khelne aati thi. Is beech Dipa bhabhi ki najro ne kuch ajeeb hote dekha. Diwar ke dusri aur koyi khada tha jiske sath sar ko dhake Damini baat kar rahi thi aur wo shaksh us taraf andhere ki wajah se saaf nahi dikh raha tha. Lekin tha wo koyi aisa jiski chhavi Dipa andhere me bhi pehchan sakti thi. Indu kuch dur khadi jaise baaki sab par dhyaan rakh rahi thi. Damini ne kuch diya tha us shaksh ko aur badle me usne bhi jo Damini ne apne seene me chhupa liya. Wo dono ab idhar aane ki bajaaye wahi se chalti hui khel-ghar se bahar nikal chali. Dipa ke dil aur mann ko vichlit karke.
"Hahaha.. Oye Neeleya, Arjun ki taraf se aisa he inaam daanv pe lagaya hai apne lala ji aur daar ji ne, jis wajah se swayam Lala ji yaha padhare hai. Toh ab jaisa nirdharit kiya gaya hai, toss ke baad khel shuru.", Jugraaj ji ne Arjun aur Shahid ko aage bulate hue sikka uchala toh jeet Shahid bhai ki hui. Dono hath milane ke baad alag ho kar apni apni jagah aa gaye, raid daalne ka jimma Arjun ko diya gaya tha.
'Daare tu kinare te, Bholeya tu isde thik peeche rahi. Dilu oh tere hath na laga sake, dhyan rakhi. Pehla mauka dena appa Arjun nu.', Shahid bhai the bhi kisi pehalwan jaise jo itne barso se akhade se niyamit jude the. Dilbaag furtila tha kabhi jo ab bas majboot sharir wala reh gaya tha. Usko thoda peeche rakhte hue Shahid ne baaki sabhi ko unka kaam samjha diya. Arjun mitti ke hath lagata 'kabaddi'kabaddi' bolte hue jaise he unke paale me dakhil hua wo 'C' akaar ka ghera thoda peeche hua. Sabhi dekh rahe the ki Arjun bahot sadhe hue kadmo se bas rekha ki kinare kinare idhar udhar ho raha hai. Jaise wo inke kadmo aur sharirik bhasha ka gyaan le raha ho. Kamlesh purana khiladi tha jisne ghera todne se pehle Dilbag ke kaan me kuch kaha aur apne sath ek aur khiladi ko liye baayi taraf se Arjun ko gherne ki kavayad karne laga. Aur wo apna prayas karta us se pehle he Arjun unki taraf kadamo ka dikhawa karke apne peeche khade Bholu aur Daare ke beech furti se nikalta wapis apne paale aa khada hua. Koyi samjha bhi nahi lekin Bholu aur Dara sar pe hath rakhte hue bahar chal diye.
"Lo vi mitro, Arjun ne raid poori kitti. Plan bane reh gaye aur banda baaj nikliya jehda samajh aun toh pehla he kamm kar gaya dona de thapki maarda. Arjun da ek point.", Ab charcha ka vishaya tha Arjun ki ummeed se he jyada furti aur uska jhapatna, jo aankh jhapkne se pehle ho gaya tha. Taaliyan ruki toh is baar Shahid ke sath Dilbag ne Arjun ke paale me kadam rakha, dono viprit disha se badhe the. Dipa bhabhi jaise anjaane darr ki wajah se thoda kareeb aa khadi hui aur in dono ko poori mustaidi se dekh raha Arjun Shahid bhai ki taraf jhapat kar unhe patak he raha tha ki Dilbaag ne chalaang lagate hue uske paanv jameen se ukhaad diye. Dipa ki saans he ruk chali thi ye soch kar he ki is prahaar se yakinan Arjun ko chot pahuchi hai. Udhar Arjun toh Shahid bhai ke upar se he palti kha kar mooh se mitti saaf karta khada ho gaya par Dilbaag wapis bhag chuka tha.
"Dilbag ne point kamaya teh Arjun ne daanv poora kitta. Mamla barabar reha es karke Shahid khel vich rahega. Ek point Shahid di team ne kyonki Arjun ne dono bande nahi giraye.", Jaisa ki purv-nirdharit hua tha ki Arjun ko dono raider ko patakhni dene par he ank milega aur waisa na hone par jo usko chu kar nikal jayega, ank us raider ko prapt hoga. Hua bhi aisa he jab Dilbag bach nikla lekin Shahid ko patakne ki wajah se 2 me se ek he ank ban paya. Khel yahi se majedar ho chala tha lekin bheed bhi badhne lagi thi, baat aaspas chupal tak jaane se. Dipa chalti hui kab agle paale ke kinare pahuch gayi usko bhi dhyaan na raha. Jyadatar log baithe the aur kuch khade toh Dipa bhabhi fir bhi kuch duri par halke andhere me thi. Arjun ne honth par aaya halka sa lahu jeeb se he chaat kar saaf karne ke baad raid shuru ki.
"Is baar dhava bolna 'P' bana ke lekin Kamlesh tum aur Dilu dandi pe rahoge bhai.", Shahid ke kahe anusaar 7 ke 7 khiladi panje majbooti si tikaye is tarah ghoomne lage jaise Arjun kendra bindu ho aur wo koyi naag jo usko kasne ke khwahishmand ho. Is baar uttejana me Bholu bahar se he cheekha.
"Oh Minder, gitteya te jump maar isde. Mege, lamak ja pith teh sheti.", Wo keh raha tha ki ek vyakti jaldi uske ghutno par chalaang lagaye aur dusra peeth par sawar ho jaaye. Arjun ne ghera kasne diya apne ird-gird aur jaise he wo dono vyakti uski taraf koode, thik saamne teesra aur Shahid Arjun ko dabochne koode. Aur yahi Arjun Minder se bachta hua Mege ko apne kandhe par uthaye apne paale ki taraf kood gaya. Ye dono he usne bahar kar diye the par 80-90 kilo ke Mege ko usne jitne araam se uthaya aur fir apne paale me araam se giraya tha sabhi taali aur seetiyan maarte reh gaye. Arjun sirf aur sirf khel raha tha jabki dusri taraf wo log haanfte hue ab isko gambhirta se lene lage, khaaskar Kamlesh aur Dilbag.
"Oye balle oh pandta. Sirra he lagata putt tu tah. Ae school de jawaak nai hai jinhanu tu ehda chuk ke pajh janda. Hahaha.. mann gaye putra.", Lala ji ne Jugraaj ji dwara 1 ank Arjun ko pradaan karne ke baad is adhbut drishya se khush ho kar paas khadi un 5-6 ladkiyon ko 50-50 rupaye diye, khel me lagan dikhane ke evaj me. Saamne Shahid ki team jaise do faad ho gayi thi is raid ke baad. Jaha Shahid 4 khiladion ko raid daalne ki yojna bata raha tha, wahi Dilbag ko Kamlesh budbudate hue kuch alag he kaam bata raha tha, bina uski taraf dekhe jaise wo iska pata kisi ko lagne na dena chahta ho. Dilbaag ne bolne se pehle har taraf aaspas baithe logo ko dekha aur utni he dhimi awaaj me usne jawaab diya. Unki team se 2 tagde khiladi Arjun ko gherne nikal chale the jabki Arjun unhe dekhne ke sath sath ye bhi dhyaan de raha tha ki saamne ek team nahi balki 2 khel rahi hai. Choti team kabaddi ke sath jaise aur kuch bhi karne ka irada rakhti hai. Dono khiladi satarkta se Arjun ki aur dhire dhire badh rahe the. Arjun kuch kadam peeche hota hua kabhi ek taraf ho jata toh kabhi dusre wale ko peeche hatne par majboor karta. Kamlesh ne sabhi ka dhyaan Arjun pe lage dekh Dilbaag ki jaangh par ungli chalte hue khaas ishara diya aur wo uske aage ho gaya. Dilbag ghere ki antim line par tha jidhar bas 2 he log the kyonki jyadatar toh paale ke aamne saamne lambvat baith kar ye khel dekh rahe the. Andhere me Dilbag ke hath me kuch pakdaya gaya aur fir wo vyakti waha se hat kar bheed me ja mila. Dipa bhabhi ne bhi ye dekh liya tha jiski aashanka ab sahi saabit hoti jaa rahi thi. Udhar Arjun un dono ko chhaka raha tha darate hue aur jaise he ek ki saans tootne lagi Arjun ne hath ka dikhawa usko pakadne ka karte hue paanv viprit disha me ghuma kar dusre wale ka rasta band kar diya. Palak jhapakte he wo Arjun ke kandhe se ghoom kar poli mitti me peeth ke bal gira tha aur jitne dusra Arjun ko choone ki koshish karta, uske badhe hue hath ko kandhe par laate hue Arjun ne kisi bori ki tarah ghuma kar badi aahista se uski peeth bhi pehle wale ki bagal me sata di.
"Oh Arjun baai.. ek number speed hai baai.. mann gaye tere dimaag nu. Jama billi wang jhapteya.", Nihaal khushi se taali peet raha tha aur Arjun un dono ko hath de kar uthane ke baad apni jagah aa kar wapis khada ho gaya. Un dono khiladiyon ke mann se ab gambhir pratiyogita wali baat nikal kar Arjun ke liye samman badh chuka tha jo khushi khushi maidaan se bahar kinare pe ja khade hue. Bholu aur Dara fir se team me aa chuke the unke bahar hone ki wajah se. Yahi niyam tha ki saamne 7 barkarar rahenge.
"Mitra pyaaron, score hai Arjun 3 Shahid 1. Matlab bas ek raid aur ek bachaav poora karna hai Arjun ne jabki itna he agar dusri team karti hai toh khel barabar. Aur dugna karne pe wo vijeta. Dekhna hoga tajurba jeetega ya josh.", Jugraaj ji ne ank sunaye toh Nihaal aur uske dost taliyan peetne lage the par kuch aur bhi the jo is se alag raaye rakhte the aur wo inse alag apne he jhund me the. Unki taraf kisi ne khaas tavajjo bhi na di. Dipa bhabhi gor se dekh rahi thi ki uska pati kya karne wala hai gaagh Kamlesh ke sath mil kar. Arjun bhi dekh raha tha ki Kamlesh Shahid ki jagah khud baki khiladiyon ko apne hisaab se gherabandi karne ka keh raha tha. Matlab saaf tha ki is raid me Arjun ke sath wo niyam se nahi khelne wala tha.
'Chilla bhi nahi sakti aur agar bata dene par kuch na mila toh badnaami ke naam par jaleel alag karenge. Waheguru Arjun ko bacha lo bas.', Dipa bhabhi ki sthithi bhi uchit thi. Saamne uska he pati niyam se virudh kaam karne wala tha jiska parinaam pakde jaane par bhi ghatak aur Arjun ke jakhmi hone par bhi. Wo chaah kar bhi cheekh nahi sakti thi ki Arjun par khatra hai. Is andhere me Dilbaag apni mutthi me chhipaya hathiyaar kahi bhi fenk kar bach sakta tha aur ghar jaane ke baad wo jo salook Dipa ke sath karta, us se yakeenan jism ke jakhm badhne he wale the. Arjun ghutno ke bal baith kar sar jhukata hua jaise fefdo me praanvayu badha raha tha ya kuch aur. Usko is andaaj me dekh khud Lala ji aur Jugraaj ji bhi apna dhyaan us par lagaye the. Wo jab khada hua toh chehre par alag he muskaan thi aur aankhon me manzil ko paane ki chahat.
"Sukhi, Bholu tum dono darna nahi aur line me idhar peeche hatne ke baad jitna ho sake is ladke ko andar lete aana. Jeete tu Shahid ke sath jodi me saamne reh kar kadam piche karte jana jis se fanda bann sake. Kala aur main bhi idhar aisa he karenge. Koyi galti nahi honi chahiye is baar. Uski saans na tooti toh is baar he wo jeet jana. Dilu, dhyaan naal.", Dilbaag ko Kamlesh ne alag sandesh diya tha. Lekin saamne se aata hua insaan jaise in chote mote ghero ki baare me soch he nahi raha tha. Safed patti paar karne se pehle usne jis tarah Dipa bhabhi ki aankhon me dekha tha wo kuch samajh na saki. Uski muskurahat dekh toh aisa lag raha tha jaise koyi Aashiq khudkhushi karne se pehle aakhir baar chehra dikha raha ho apne ishq ko.
"Fans gaya tah zinda nahi bachna main Kamli. Vekh teri gherabandi tagdi hai, appa jitt jana ehda vi.", Dilbaag mann he mann darr raha tha aur uski ye aakhiri koshish thi Kamlesh ko manane ki. Yahi dono the sabse aakhir me daayi taraf ke kone par.
"Shhh.. Baat haar jit ki nahi hai Dilu, poore pind ki hai. Ye banda akhade nahi jaane dena dargah wale. Bas sab jaise he isko daboche, keel patt me ya chuttad pe ghusa diyo."
"Sooye ka tukda iska akhade se na rok sakega.", Dilbaag ki mutthi band thi jaise usme he wo sookshm hathiyar tha.
"Sharir me taap chadhega iske bas chubha diyo. Wo aa chuka hai.", Kamlesh ne ye na bataya tha ke wo bas sua nahi hai balki jehar bujha sua hai jo kuch bhi kar sakta tha Arjun ke sath. Bahot he dhimi raftar me kabaddi kabaddi bolta hua Arjun bas Shahid ko he dekh raha tha jaise wo kehna chah raha ho ki saamne matt aana. 4 kadam aage badhate he jaisa Kamlesh ne kaha tha thik waisa he hua aur parinaam bilkul viprit. 2 log peeche se aur 2 saamne se koode the par Shahid ek taraf ho gaya Arjun ko khule sand ki tarah kandha ek taraf wale 2 logo par maarte dekh. Mitti ko pichle dono paanv ne aise udaya tha ki peeche wale dono apne chehre ko dhakne par majboor ho gaye. Kamlesh jhapata lekin is baar khel se virudh Arjun ne uski gardan pakad kar jameen par aise de mara tha ki aasman me jo taare abhi aaye na the wo Kamlesh dekhne laga tha. Dilbag ke hath se wo sue ka tukda ek taraf gir gaya jisko aage badhte Jugraaj ji ne bhi dekha, jo Arjun ko rokne aa rahe the. Lekin deri ho he gayi.
"Namard ho tummmm", Ye dahaad aisi thi ki har insaan kaanp utha aur jab tak wo log samajhne laayak hote Dilbaag Arjun ke paanv pe gir chuka tha.
"Maaf kar do pradhaan ji .. maaf kar do.. Ye Kamli ne kaha tha ke aapko akhaade me jaane se rokne ke liye ye karna jaruri hai. Mujhe nahi pata tha ke is ek sue ki maar se aap kaise jakhmi ho sakte the.. Mujhe maaf kar do..", Haal e bayaan sunte hue bhi Arjun ne pehle toh Kamlesh ki taang pakad kar usko apne paale ki taraf uchaal fenka fir paanv utha kar jaise he Dilbaag ke jhuke hue sar pe rakhne laga toh andhere me chamakte un 2 aansuon ne uska ye vaar rok diya. Arjun palat kar Sarpanch ki taraf chal diya tha.
"Ho gaya na pramanit Sarpanch sahab ki aapka shak sahi tha. Ab kya karna hai inke sath? Dilbag ko saja mere dada ji sunayenge aur itne ye vyakti apne khet se bahar nahi niklega. Ullanghan hone par khet-khalihaan wapis. Dusre ko aap apne tarike se dekho jo aapke shak par khara utar gaya, durbhagya se.", Arjun ne is baar sarpanch Kewal Singh ke charan sparsh kiye the aur sabhi ko sadme me chhod wo Nihal ka hath pakad kar Shahid bhaiya ke sath yaha se chal diya. Lala ji ne bhi ghere me bache dono ke siwa sabhi ko waha se abhi ke abhi jaane ka aadesh diya toh Dipa bhabhi na chahte hue bhi bheed ke sath yaha se chali gayi. Arjun ghar ki taraf na ja kar khel-ghar ki bagal wali sunsaan gali ki aur ja raha tha. Shahid bhai ne he usko kuch der sath rehne ke liye manaya tha.
"Lala ji, Dilbaag ka toh hisaab bana gaye chote pandit par hamare bhai ko shayad hum sahi saja nahi de paayenge. Jugraaj bhai, Kamlesh ke hath baandh do peeth peeche. Hosh me aayega toh jawaab lenge is se.", Kewal Singh Lala ji ki kursi ke paas he jameen par baith gaya. Aankhon me aansu the aur dil me kuch halkapan. Dilbag ne dono ki taraf ghutno par gire hue hath jode toh pehli baar master Jugraaj ne niyam kaayde bhulate hue uske gaal par jhannate dar thappad jadd diya.
"Bada maan tha ve Dilleya tere teh sahnu. Tu tah akhaade da he maan na rakheya. Kuj kami reh gayi se saade pyaar satkaar vich jo tu pind de maan nu he mitaan lageya ci?"
"Daar ji, main sach kehna hai chahe gurughar sau uthwa lo. Menu Kamli ne keha c ki eh kil Arjun de patt ya peeche maar ke osnu mele vich shamil hon toh rokna. Kehnda ki eh pind de mukhiya di jaan da sawaal hai. Tussi jaande ho ki es Dilbaag ne kadi koyi galat kamm nai kitta? Main Kamli de iraade nahi c jaanda?", Wo safaai de raha tha aur Lala ji feeki hansi dete hue usko dekh rahe the. Jugraaj ne Kamlesh ke bhi hath baandh diye the peeth ki taraf aur jald he waha Succha Singh ji ke sath sath, Rajnish ji urf Manager sahab ghatnasthal par pahuche 2 yuvako ko liye. Unhe poore maamle se khud sarpanch ne avgat karwaya. Chehre par unke bhi 12 baj gaye the sab sunn kar.
"Kewal Singh, tumhe Kamlesh ki jaankari thi?", Ye Succha Singh ji ne poocha tha jo ab chintit bhi the aur dukhi bhi.
"Ji baba ji lekin saboot nahi tha mere pas. Mahine pehle se main dekh raha tha ki ye parle pind ke kuch badmasho ke sath jyada he mel-jol badha raha hai. Dilbag nahi jaanta tha un logo ki mansha lekin sab log ayyashi iske he khet par karte the. Chahe Dilbag waha ho ya nahi. Adde wali rangdaari me bhi iska jikar hua tha lekin paiso ke dum par isne he baat dabva di. Kal Nawaab ki kuch baatchit hui thi Arjun se shaam ko aur uske baad wo ghar pe apne is chache se he baat kar raha tha ki kaise uske dost Arjun ko thikane lagana chahte hai. Pehle he maine vadde daar ji ko bataya tha ki iska gaanv nikala karwa do toh sahi hoga lekin aapke saamne he hai ke meri ijjat uchaal di isne wo bhi Pandit ji ke bache par humle ki saajish sare aam karte hue. Main padvi chhod dunga ji lekin kal ki panchayat me iska fainsla mujhe he karne de toh behtar hoga.", Itna khulasa karne ke baad Kewal Singh ek aur baith gaya. Kamlesh ke mooh se khoon beh raha tha aur wo bhi ab dard ko peene ki koshish karta hua uthne laga tha par hath bandhe dekh hairaani se saamne baithe logo ko ghoorne laga.
"Hmmm. Arjun ne fainsla tumhe he karne ko kaha hai toh aisa he hoga. Dilbaag ki saja kya hogi ye Pandit Rameshwar ji nirdharit karenge ya hum abhi unse baat karne ke baad subah panchayat me he unka farmaan bata denge. Filhal Dilbaag tumhe jo aadesh mila hai, wahi karna hai. Yaad rahe ki gaanv nikala nahi khet me najarband ki saja mili hai tumhe. 2 waqt ka khana tumhe wahi milega aur agar tum saja-khilafi karte ho toh hatya ke pryaas me saja bhogne se pehle sampatti kurk hogi aur gaanv bedakhli alag. Waise bhagyashali ho tum jo us bhali aatma ne tumhe jaane kaise baksh diya. Humla dekh kar toh lag raha tha ke ghere se koyi bhi apne paanv par khada hone laayak nahi bachega. Wo yaha logo ke manoranjan ke liye khel raha tha tum sabko aukaat dikha kar ki uske liye tum mehaj manoranjan ka jariya ho. Fir bhi baaj nahi aaye murkhta dikhane se.", Lala ji ne bhali bhaanti wo chaal aur poora drishya dekha tha jisme Arjun kahi se bhi Arjun na tha.
"Lala ji, es kill teh zehar bujhaya hoya ji.", Jugraaj kaanch ke gilaas me duba kar wo sue ka tukda liye aaya toh paani ka rang badal chuka tha. Dilbaag toh ye dekhte he khud ke gaal par thappad ki baarish karne laga jisko un 2 yuvako ne roka Suchha Singh ji ke aadesh par.
"Yahi case ab Kamlesh par banega Kewal Singh, tumhare panchayti farmaan ke baad. Pandit ji shayad khud pooch-tach karna chahenge ab Kamlesh Singh se. Ye saboot aur Kamlesh ko sath le chalo Dhiraj-Manjeet. Panchayat me pesh hone ke baad bhi ye hamari nigraani me rahega. Kewal, panchayat band kamre me lagegi aur uski munaadi matt karwana. Milte hai subah 7 baje dharamshala me. Zehar wali baat failne na paaye aur Nawaab se keh dena ki ya toh ghar rahe ya fir usko nanihaal bhijwa do kuch hafte. Tumne gaanv ko hamesha pehle rakha hai pariwar se toh itna toh tumhare liye hum bhi kar sakte hai. Dilbaag, tumhari saja shuru ho chuki hai. Nikal jao aur jab bulawa aaye toh hajir ho jana. Chaliye baba ji. Lala ji aapko Juggi chhod dega.", Rajnish ji ke aadmi Kamlesh ko jeep ke pichle hisse me fenk chuke the aur Succha Singh ji ko agli seat par baitha kar Rajnish ji waha se nikal gaye.
"Tumhe bura lag raha hoga na Kewal bhai?", Dilbaag toh andhere me jaise taise nikal chala tha par Jugraaj aur Lala ji sarpanch ke sath wahi par baithe the.
"Atcha he lag raha hai filhaal toh Juggi baai. Mera bas nahi chalta nahi toh parle pind ke saare nashedi dariyan me hath baandh kar fenk du. Dekh lo sangat ka asar. Main fauj sewa me raha aur jakhmi lauta par hara nahi. Bhagwaan, manjhla hai lekin mujhse jyada samajhdar aur is pind ka maan lekin ye sapola khud toh barbaad hua so hua, apne bhatije tak ko nahi baksha isne. Lala ji, chaupaal me ghoshna kar dena ki sabhi khiladiyon ki khuraak mere jimme hai. Is ghatna ke baare me waise toh log jyada baat nahi karenge kyunki wo toh darr he gaye the us awaaj aur tufaan se lekin ye aapne sahi kiya ki panchayat band kamre me rakhwai. Aagya dijiye, thoda apne nawaab ki bhi khair khabar leta hu.", Sarpanch ne Jugraaj se hath milaya aur Lala ji ke charan sparsh karne ke baad seedha apne ghar ki taraf chal diye, tej kadmo se.
"Kya lagta hai Juggi beta, us aandhi ko dekh kar?", Lala ji Jugraaj ke scooter ki taraf badhte hue ab thoda muskura rahe the jaise unhe is haadse ki ab chinta na ho. Waise bhi saja ka farmaan toh diya he ja chuka tha aur wo bhi bina mahol ko garam kiye.
"Aap behtar bata sakte hai chacha. Maine toh bas aaj 2 alag alag Arjun dekhe. Ek jo pehle hansi majaak me sabke sath khel khel raha tha aur dusra jaise koyi aur he tha. Apni taaqat ka ek chota sa namuna deta hua jungle ka raja. Bholu aur Sukhi ki toh hansli gir gayi hai kandha utarne ke sath. Jabki haalat baaki dono ki bhi thik nahi thi. Kamlesh ko dekha na kaise khoon ugal raha tha aur itni taaqat kisi me kaise ho sakti hai chacha? Wo sachmuch he jaise kutte aur sher wala muqabla tha. Sher ne mooh ki jagah panje se uchaal diya is dagabaaj ko. Pehle aisa kuch dekha hai aapne?", Jugraaj ne scooter me chabi lagane ke baad unki taraf dekha.
"Tulna toh nahi kar sakta par bade Pandit ji rehte toh hamesha he shaant aur hanste bolte the par jab unke gusse ko dekha toh tumhare jaisa he haal mera tha. Lekin unhone saja us vyakti ko kuchal kar di thi jabki Arjun ne unse viprit ksham-daan diya. Waha ek vyakti tha jo apradhi tha aur yaha 7 saamne the jinme se ek khud piche chala gaya aur 5 khade hone laayak na rahe wo bhi itni jaldi ki kisi ko samajh nahi aaya. Bas dikha toh wahi jor jiski tulna tum kutte aur sher ki taaqat se kar rahe ho. Akhaade me ho sakta hai peshewar log ho lekin ye insaan dohre swaroop wala hai aur agar dusra swaroop nikhar kar saamne aaya toh waha manjar qayamat bhara hone wala hai. Yahi wajah hai ki Rameshwar bhai ne eitraaj nahi kiya. Dekha kaise mauke par he saja suna di thik apne dada ji ki tarah? Chalo bhai ghar chhod do bas, neend toh is ladke ne udaa he di hai par araam toh karna hoga.", Jugraaj bhi muskurata hua scooter chalu karne ke baad unhe peeche baitha kar chalne laga.
"Dohra swaroop, kya sahi naam diya hai aapne. Ladka toh pehle se he tayaar hai aur jhalkiyan bhi dikha raha hai ki uski najar aur jism sabkuch samajhta hai. Bache darr na jaaye bas is ghatna se."
"Arre unhone dekha he kaha sabkuch aur hua bhi toh itni jaldi. Waise bhi charcha ke liye kuch toh hona chahiye beta. Khabar honi chahiye ki sher aa chuka hai.", Lala ji ne aadtan hanste hue baat khatam ki aur dono nikal chale, chowkidar ko gate subah 5 baje kholne ka bolte hue.
.
.
"Bhabhi, aap yaha raat me akeli khadi ho? Aap pareshan hai na bhabhi?", Nihal apne ghar ki taraf ja raha tha aur jaise he Dipa bhabhi ke ghar ke saamne pahucha usne dekha ki bhabhi bahar thaddi par akeli baithi hai mooh par dupatta liye. Kareeb aane par Nihaal ne paya ki chehre par kuch gilapan tha jo shayad aankhon ya garmi ki wajah se hoga. Uski awaaj sunte he Dipa bhabhi ne hadbadahat me chehra saaf karte hue jhooti muskaan di.
"Na ve, main toh bas tere paah ji ka intjar kar rahi thi. Aaye nahi na roti lene aaj akhade se jaate hue. Tujhe mile kya kahi?", Kitni safaai se wo jhooth bol rahi thi jabki Nihaal jaise unhe sach batane se he darr raha tha.
"Wo bhabhi.. main paah ji ki taraf se aa raha hu Shahid bhai ko khet pe chhod ke. Khana toh aapko bhi pata hai ke yar dosto ke ghar se bhi aa jana. Aap garmi me bahar na baitho, mausam bhi ghuta hoya. Barish hui toh bimaar padd jana aapne.", Nihaal ki bholi baatein sunn kar ab Dipa bhabhi kya jawaab deti.
"Shahid inke paas rukega ya milne gaya hai bas? Aur tu akela he aaya itni dur se?"
"Maaf karna bhabhi pehle maine jhooth kaha ke main paah ji ke pas se aa raha hu. Main aur Arjun baai Shahid paah ji ke naal he the kaafi der tak. Fer unke ghar se khana bandhwa kar paah ji toh Dilbag paah ji ki taraf nikal gaye khet pe aur main abhi Arjun ko haweli chhod ke apne ghar ja raha tha. Kisi ne aapko kuch kaha hai kya bhabhi?", Nihaal darr raha tha ke kahi unhe kisi ne galti se sach na bata diya ho. Pehle he bahot se aise sach the jo Dipa bhabhi ke kaan tak nahi pahuche the aur aaj bhi unhe ye batane koyi na aaya tha ke unke pati ne galat kaam me Kamlesh ka sath diya hai. Gaanv kya poora pariwar he tha ye jisme bache bhi samajhdar he the aise maamlo me.
"Na ve mujhe toh kisi ne nahi kaha kuch aur mausam kharab hone ki wajah se Raano ko andar baandh ke aayi thi na toh bas tumhare paah ji ko udeek rahi thi. Ab Shahid unki taraf chala gaya hai toh mujhe chinta nahi. Nahi toh tujhe he bhejti unka khana dene ke liye. Aur ye Arjun itni der se jata hai kya akhaade se?"
"De vi aana si bhabhi main aap bas keh deya karo. Arjun baai da mood thik c ni kuch aur Shahid paah ji ne thoda bahot hansi majaak karke sada dova da makhol kitta teh oh khush ho gaya. Bada mehanti munda hai bhabhi aur dil da vi changa. Keh raha tha ke kal toh kahi jana hai savere lekin shaam ko akhade jarur aayega. Keh raha tha ke aaj bahot thakaan hai chote pradhan ji bhi haweli nahi hai toh bas time se so jaayega. Maalish ke liye main badi bebe ko bol ke aaya hu baai ki. 2 baje se 5 tak toh wo mitti he khodta raha kalla udhar. Fer practice aur uske baad kabaddi wali kushti. 8 baj gaye.. Bhabhi 8 baj gaye aaj toh ghar se bahar. Bebe idhar he na chali aaye, main jata hu ji. Rabb rakha.", Hath jodd kar ye bhola insaan chala gaya aur peeche chhod gaya us insaan ko jo samajh nahi pa raha tha ke uske jiwan ka saar kya hai. Aaj Arjun ne bas uske aansuo ko dekh kar apna kadam peeche le liya tha jabki wo khud dohre mann se ek taraf waisa hone dena chahti thi aur dusri taraf apradhi ki biwi ke bojh se bachna bhi. Dipa jaanti thi kii uske pati ko maafi jarur mili hogi. Lekin ab Arjun jaise us se aur dur ho gaya tha. Din me toh uski awaaj kam se kam suni thi lekin ab uska bhi wajood rehna tha ya nahi, sab kismat pe tha. Aur wo toh Dipa se tabhi rooth gayi thi jab Dilbag ne usko badchalan bata diya tha parle gaanv ke nashediyon ki sohbat me.
Dohra Charitra
"Main kuch keh sakta hu bau ji?", Madhuri aur uske sasural walo ke sath sath Radhika ke bhi mata pita laut chuke the. Idhar se he Gorav aur Madhuri apne honeymoon par aur baaki log apne ghar. Aaj bagiche me Rameshwar ji ke sath Sanjiv tha, paani ka chhidkaav karte hue kuch gambhir. Uski daadi abhi abhi Roshni bua ke sath mandir gayi thi, apni aastha ki wajah se. Sanjiv bhi yaha isliye ruka tha ki nikalne se pehle wo apne dada ji se bhi kuch charcha kar sake. Rameshwar ji thodi nayi mitti tayaar kar rahe the jo unhone nehar kinare se mangwaayi thi bagiche me milane ke liye. Mitti ke naram dhele todte hue wo ruk gaye jab Sanjiv ne unse aagya chahi.
"Haan bilkul keh sakte ho bhai. Is desh me ye bhi ek adhikaar hai jo tumhe purn ajaadi deta hai apni baat rakhne ya kehne ka.", Ramshwar ji kaha sidha jawaab dete the lekin Sanjiv bhi toh unki chhaya me rehte hue ya bhali prakaar jaan chuka tha. Usne fir bhi chehre par khushi ke bhaav prakat na kiye.
"Aapko lagta hai ki munna jo kar raha hai wo sahi kar raha hai? Haan main us par sandeh nahi kar sakta lekin aap jyadatar pehlu kanoon ki najro se dekhte hai aur mujhe dikh raha hai toh bas apna chota bhai jo bahot saare kanoon aur niyam unki he kamjori ki wajah se badal raha hai.", Rameshwar ji sab sunte hue khurpi lagatar un naram londho par chalate rahe. Sanjiv ne ek taraju me swayam pandit ji aur unke niyam toh dusre me Arjun ko khada kar diya tha. Wo ye bhi jaan gaye the ki Sanjiv se baat bachi nahi hai jo shayad Arjun ka he kiya dhara hai lekin wo fir bhi apne bhai se dur ja raha hai jisme Arjun ka he aagrah hoga.
"Beta reitili mitti me jitna marji paani udel do wo sab sokh kar fir se pyaasi ban jaati hai. Matlab ki niyam jitne marji bana lo par kya kahi wo khatam ho sakte hai? Nahi na? Lekin us reitili mitti me agar garda mila diya jaaye toh kya hoga?", Sanjiv paani aage ki disha me dete hu har baat dhyaan se sunn raha tha.
"Santulit ho jaayegi ye nayi mitti. Na jyada paani sokhegi aur na kichad rahegi. Lekin meri baat ka matlab toh munna aur uski kaarastaniyon se hai na jo thodi bahot toh aapko bhi pata lagi hongi?"
"Hahaha.. yar tum dono bhi toh aise he ho. Khair jawaab jyada saral lehje me dene ki koshish karta hu. Tum ho kanooni aadmi aur wo hai fakeer mastmaula. Jab dono ke beech gehra taalmel baith jaaye toh meri kya bisaat jo main kuch bol paau.", Rameshwar ji ne toh yaha jawaab dene ki jagah jaise Sanjiv ko he lapet liya tha uske aur Arjun ke taalmel ki wajah se. Lekin Sanjiv bhi dhun ka pakka tha jisne is baat par pratikriya dene ki jagah fir se apna sawaal dohra diya.
"Wo kanoon todega toh aap kya karenge bau ji?", Ab toh Pandit ji ne khurpi ek taraf he rakh di aur paani se hath dhone ke baad kursi par baithte hue bagal me Sanjiv ko bhi baitha liya.
"Tum galat karte ho kuch jab duty par hote ho?", Unka ye prashan sachmuch kehne ko he chota tha par Sanjiv aakhir unka he khoon tha aur thik unka anusaran karne wala.
"Apne aap ko aaine me na dekhu bau ji lekin aatma-manthan me kya karunga jab daga karunga? Katai aisa nahi kar sakta jis se meri vardi se pehle aatma par daag lage."
"Main jaanta hu mere bache main atchi tarah se jaanta hu aur yahi wajah hai ki hum tumhare har sawaal par khudse he charcha karte hai. Sanjiv koyi bhi baat aise nahi karta, uski wajah hoti hai aur wo is dehleej ke bahar hai toh duty par hai. Haan Arjun sath ho toh duty avkaash par chali jaati hai aur avkaash pehle he ho toh tum par apne chote ka bhai ka asar ho jata hai. Lekin dusra pehlu jo hai mere sikke ka wo is chehre jitna spasht nahi hai, bas kehne ko number hai. Head tum ho toh tail wo lekin tum chehra ho aur wo... wo pata nahi kya kya hai jo hume bhi kayi baar samajh nahi aata. Khud he dekho ki uski paribhasha toh swayam hamare he paas nahi hai toh koyi aur kya dega? Lekin jaise mujhe tum par vishwas hai na Sanjiv, waise mujhe us par garv hai. Wo kahi jyada he bada registaan hai bhitar se jo tukdo tukdo me saari garda dhoond dhoond kar apne bhitar sama lega. Jaise wo tumhare gunn le chuka hai, mere, apni maa ke aur kudrat ke.", Arjun ka ullekh karte hue wo thoda sa rukte hue Sanjiv ke chehre ke bilkul kareeb aaye aur dhimi awaaj me kaha.
"Blackhole hai wo lekin sirf toote grah aur taare apne andar samahit karne wala. Bas is ek niyam ko he maanta hai tumhara munna aur mere bhi hath khade beta hai kuch maamlo me. Wo jitna khaa chuka hai hume uski khabar he nahi hai aur na tumhe hai, yakin hai hume kyonki wo jis taal pe sabko nacha raha hai uske kuch ansh hamare he aks se jude hai lekin us gyaan ko maine uplabdh nahi karwaya aur or koyi jaanta nahi. Ab ulta ye humko he waha bulane me kaamyab ho gaya jaha jana nahi chahte the."
"Haan aap sahi kehte hai bau ji. Jab meri baah pe soya hota hai toh lagta hai wo aajtak 13-14 saal pehle wala mera nathkhat chota bhai hai par wo apni anjaan duty par hota hai toh uski tayaari pehle he rehti hai. Sabhi ghatnaye, unse jude log aur shayad parinaam bhi. Wo boarding me he tha na bau ji?", Arjun ke vishaya me ye sab sunn kar khud Rameshwar ji ab khamosh rehne ka mann bana rahe the lekin Sanjiv ko pareshan mann ghar se vida karna us dada ko sahi na laga.
"Wo choti choti baato ko ehamiyat deta hai jaise tum dete ho. Lekin wo unke bhi ateet me ghus jata hai jabtak gehraai na maap le, matlab usko farak nahi padta ki ganit ka formula samajhte hue wo bhauti vigyaan me ja raha hai aur udhar se koyi yunani chinh usko kahi aur le jaaye. Wo khojta rahega jab tak ki wo wapis ganit par na laut aaye. Main matlab jaise tum ho waisa he tha aur tumhare Raghuvir dada thode bahot aise jaise Arjun, bahot thode the matlab. Lekin tumhari daadi hai bahot gehre mann wali aur bahar se sakth. Aise he pita ji the hamare, jitna unhe samajhne ki koshish karo utne samajh se bahar aur fir hume ijajat bhi nahi thi jyada taak-jhaak ki. Tumhare pita, chacha aur mama log ya jitne bhi kareebi hai unka kuch alag toh kirdaar hai na, visheshta?", Sanjiv ne paani band karte hue bas sar haa me hilaya.
"Ye insabke gunn le raha hai ya kayion ke toh le bhi chuka hai jaise mere, tumhare, tumhari daadi ke aur sabse eham hai Raghuvir Singh ke khaas gunn jo uske baad thode bahot toh Shankar me bhi the lekin jyada the Ajju me par Ajju tumhari daadi se seekh gaya tha dimaag ko niyantran me rakhna. Ab Arjun wo sabhi niyam jaan ne ke baad unki he kamjori ko hamare saamne la raha hai aur hum siwaye uska sath dene ke kar bhi kya sakte hai.? Lekin jis tarah tum apna karm kar rahe ho, mujhe bhi karte rehna hoga. Tark-sawaal aur gehan avlokan karne se pehle uske kisi bhi kadam par sandeh nahi jataya ja sakta. Toh tumhare laadle ne tumhe nahi bulawa bheja?", Apni majburi khul kar kabool karne ke baad unhone Sanjiv ke kandhe par hath rakhte hu jab akhade ki chunti ke sandarbh me poocha toh wo sar jhukaye he muskura diya.
"Aap sab jaante he hai bau ji. Wo batane ke bawjood hath bhi bandh deta hai aur usne iska jawaab ye keh kar diya ki bhaiya aap jab wapis lautne wale ho toh ek baar phone karna 20 din baad he milenge. Aur mujhe waisa he karna hoga.", Sanjiv uth khada hua saamne Narinder chacha ko car nikale dekh. Radhika sabse milne ke baad dada ji ka aashirwad lene aayi thi jaane se pehle aur Sanjiv uski bagal se nikal kar baaki sadasyo se milne laga. Ab unhe bhi jana tha apne naye rishtey ko majboot banane aur duniya eksath dekhne.
"Bitiya, khaali hath matt lautna. Zindagi aksar bhaagdaud me he nikal jaati hai aur hum phir ek samay par khaas yaadon ki jarurat rehti hai. Apne liye waisi he khoobsurat yaadein jutane ki ye sahi disha hai. Bhagwan Narayan tumhe khush rakhe aur har manokaamna purn ho.", Wo paanv chhone nahi dete the isliye paas baitha kar bas sar pe hath rakhte hue aashirwad diya. Radhika dekh rahi thi ki itne asadharan pratishta wale uske sasur kaise nange paanv he mitti sane paanv ke sath is bagiche me baithe khush the. Uske chehre par bhi pratiuttar me bholi muskaan aa gayi.
"Ji bauji aap bhi apna dhyaan dijiyega aur ye sab kaam kam he kare toh sehat thik rahegi aapki."
"Hahaha.. tum Guddu ki tarah baat kar rahi ho lekin itna dhyaan rakho ki mitti se lagaav barkaraar na rahe toh aksar bimari gher leti hai. Tumhari daadi tumhe jata nahi dekh sakti thi isliye tumhari kushalta ki kaamna maangne apne prabhu ke darbar chali gayi. Pahuchte he unse baat karna aur ab tumhe jana chahiye.", Rameshwar ji ne Radhika ko thik chote bache ki tarah samjhaya toh wo bhi jhempti hui hath jodd kar wapis laut aayi. Car me baithne se pehle Ritu ne jarur unke kaan me kuch kaha jis par wo hairani aur muskurahat ke sath pehle usko dekhti rahi fir kandhe par chapat lagati hui hansti hui pichli seat par baith gayi. Kayi hath in dono ko vida kar rahe the naye safar par jaate hue. Aur pandit ji sabko dekhne ke baad unki tulna apne bagiche se karne lage. Dono he hare-bhare aur vividhta se bharpoor the. Bas aaj us papite ke vriksh ne pehla phal dikhaya tha aur kuch phool bata rahe the ki ye toh bas shuruaat hai.
'Teri maya tu he jaane Arjun puttar. Bina beej ka phal uga diya isne ab pata lagao bhi toh kaha se lagao ki iski nasal me badlaav kaha se aaya?', Apne antarmann me bhi Rameshwar ji ka sochna paheliyon se he bhara tha aur fir khud he hanste hue apne hath paanv dhone lage jab Alka wo paani ki pipe chaalu karke unke saamne aa khadi hui.
"Aaj toh aap maal-poode banane wale tha dada ji? Dekh lo ab toh sab chale bhi gaye aur aapne time yaha kyaari me laga diya.", Alka ke shikayati lehje aur narajgi par Rameshwar ji ne bhi maafi maangi.
"Lakshmi beta tu kuch kahe aur main waisa na karu ye kabhi hua hai? Pehle rasoi khaali karwa aur mujhe bata. Main kapde badal kar aata hu fer sath me kheer bhi rakhte hai. Mewe pehle nikaal le teri daadi ki baari se, wo aa gayi toh pher ulahne dene se na hategi bp aur bimari ke.", Rameshwar ji is se pehle shayad tabhi rasoighar me gaye honge jab Alka ne farmaaish ki hogi, 1 ya dedh saal pehle. Lekin jo bhi banate the fir unki takkar ka poore ghar me koyi na tha us pakwaan me. Aaj unka mann bhi halka tha aur wo kuch hadd tak khush bhi the. Alka bhi chehakti hui nikal bhaagi aur apne bacho ko khush dekh wo bhi muskura diye.
'Kasuhalya devi aise he banaye rakhna is laghu sansaar ko. Sab tumhari he tapasya aur mehnat hai.'
.
.
"Dekho bhai apne Arjun ne kabaddi wale khiladiyon ke sath toh daav-pench ke liye mana kar diya jo ki sahi bhi hai. Teesre din inka bhi khel hai aur aise me bematlab kisi ke chot aa jaaye toh khamiyaja poori team ko uthana padega. Ab Shahid ke toh hath khade ho chuke hai lekin apne chote pradhan ji aadha kanaal khudai karke bhi maidaan se hatne ka naam nahi le rahe. Lekin ab kushti ki bajaye match hone ja raha hai kabaddi ka jisme ek taraf hoga Arjun toh dusri taraf gaanv ko 4 baar pratyogita jiwane wale hamare soorma. Wajah bhi iske peeche jaisa Sarpanch sahab aur Arjun se charcha karne par mujhe pata chala. Team pichle 3 baras se dusre he sthaan par rahi hai kyonki parle unche pind wale kaha humse behtar hai wo kami dur karni hogi.", Jugraaj ji sabhi khiladiyon aur shamil logo ko sambodhit karte hue unchi awaaj me bata rahe the aur kabaddi ke naram maidaan ke ird-gird mercury light ki doodhiya roshni me najara joshila ho chala tha. Safed chalk mitti se ghera bana diya gaya tha aur ek taraf akela Arjun khada tha toh dusri taraf Shahid, Dilbag, Kamlesh, Bhola ke sath sath unke purane sathi jo aaj bhi lambe tagde the aur kheto me mehnat ke sath kahi jyada majboot bhi.
"Master ji, aapne toh kaha tha ke Arjun bhai daav lagayenge aur wo bhi ek sath 2-2 bando pe.", Ye yuvak vartmaan kabaddi team ka raider tha, Billa. Kad-kathi me pehalwan aur Arjun jitna he lamba. Uski baat par kayion ne samarthan kiya. Is mahol ko ek taraf toh Damini apni saheli Indu ke sath dekh rahi thi aur dusri taraf chote se vriksh par hath tikaye sehmi hui Dipa bhabhi. Mitti me sana Arjun bilkul mastaye hue saand sa khada tha us maidaan me. Aur thik uske saamne dusri taraf 7 pehalwan sarikhe dugni umar ke maharathi.
"Sunn toh lo bhai sab poori baat. Maksad hai apni aaj ki team ko raid aur gherabandi sikhane ka lekin isme ek badlaav ye hai ki Arjun ko kam se kam 2 logo ko hath lagana hoga raid maarte waqt aur idhar se jo raid maarne jaayega uspe agar Arjun ne daav na lagaya toh ek ank saamne wali team ko. Haar aur jeet pe inaam bhi hai jo apne sarpanch sahab ne ghoshit kiya.", Jugraaj ji ne hanste hue apni baat ko wahi beech me choda toh logo ki utsukta badh gayi. Wahi Dipa bhabhi ne dekh liya tha ki Damini aur Indu ek taraf dabe paanv ja rahi thi. Dimag do tarfa tha ab unka. Pehle wo Arjun ki chinta se yaha aayi thi aur ab in dono ko aise jaata dekh koyi aur bura khayaal mann me uthne laga.
"Master ji ab inaam bhi bata do, kyun tarsa rahe ho hum bacho ko?", Ye Bhoot tha lekin jaane kyun usko ye naam diya gaya. 6 feet uncha, thoda pakke rang ka lekin jism se balisht. College tak padhaai ke baad filhal natije ke intjaar aur kabaddi ke siwa koyi kaam nahi tha.
"Inaam ye hai kaka ji ki jo bhi Arjun se ek point hansil karega, badle me apne sarpanch ji tumhari team ko ek khuraak denge. 5 point ka game toh matlab Dilbag ki team agar 5 ank arjit karti hai toh agle 3 din ki khuraak ka kharcha apne maan-niya sarpanch ji uthayenge. Doodh, anda, meat, maalish sabkuch.", Ab toh Kewal Singh ke naam par jordaar taaliyan goonji. Wo bhi hath utha kar sabko shaant karte hue khushi se haan bharne lage.
"Ye toh ek tarfa inaam hua ji. Arjun bhai jeetega toh kya hume khuraak Sarpanch sahab ko deni padegi?", Bhole Nihaal ka bhola sa sawaal tha aur sabhi hans diye. Ek taraf kuch ladkiyan bhi hath me badminton liye khusar phusar kar rahi thi. Khel-ghar me unka bhi dabdaba tha barabari ki wajah se beshak ladkiyan jyadatar badminton tak he simit thi ya fir wo thoda bahot handball khelne aati thi. Is beech Dipa bhabhi ki najro ne kuch ajeeb hote dekha. Diwar ke dusri aur koyi khada tha jiske sath sar ko dhake Damini baat kar rahi thi aur wo shaksh us taraf andhere ki wajah se saaf nahi dikh raha tha. Lekin tha wo koyi aisa jiski chhavi Dipa andhere me bhi pehchan sakti thi. Indu kuch dur khadi jaise baaki sab par dhyaan rakh rahi thi. Damini ne kuch diya tha us shaksh ko aur badle me usne bhi jo Damini ne apne seene me chhupa liya. Wo dono ab idhar aane ki bajaaye wahi se chalti hui khel-ghar se bahar nikal chali. Dipa ke dil aur mann ko vichlit karke.
"Hahaha.. Oye Neeleya, Arjun ki taraf se aisa he inaam daanv pe lagaya hai apne lala ji aur daar ji ne, jis wajah se swayam Lala ji yaha padhare hai. Toh ab jaisa nirdharit kiya gaya hai, toss ke baad khel shuru.", Jugraaj ji ne Arjun aur Shahid ko aage bulate hue sikka uchala toh jeet Shahid bhai ki hui. Dono hath milane ke baad alag ho kar apni apni jagah aa gaye, raid daalne ka jimma Arjun ko diya gaya tha.
'Daare tu kinare te, Bholeya tu isde thik peeche rahi. Dilu oh tere hath na laga sake, dhyan rakhi. Pehla mauka dena appa Arjun nu.', Shahid bhai the bhi kisi pehalwan jaise jo itne barso se akhade se niyamit jude the. Dilbaag furtila tha kabhi jo ab bas majboot sharir wala reh gaya tha. Usko thoda peeche rakhte hue Shahid ne baaki sabhi ko unka kaam samjha diya. Arjun mitti ke hath lagata 'kabaddi'kabaddi' bolte hue jaise he unke paale me dakhil hua wo 'C' akaar ka ghera thoda peeche hua. Sabhi dekh rahe the ki Arjun bahot sadhe hue kadmo se bas rekha ki kinare kinare idhar udhar ho raha hai. Jaise wo inke kadmo aur sharirik bhasha ka gyaan le raha ho. Kamlesh purana khiladi tha jisne ghera todne se pehle Dilbag ke kaan me kuch kaha aur apne sath ek aur khiladi ko liye baayi taraf se Arjun ko gherne ki kavayad karne laga. Aur wo apna prayas karta us se pehle he Arjun unki taraf kadamo ka dikhawa karke apne peeche khade Bholu aur Daare ke beech furti se nikalta wapis apne paale aa khada hua. Koyi samjha bhi nahi lekin Bholu aur Dara sar pe hath rakhte hue bahar chal diye.
"Lo vi mitro, Arjun ne raid poori kitti. Plan bane reh gaye aur banda baaj nikliya jehda samajh aun toh pehla he kamm kar gaya dona de thapki maarda. Arjun da ek point.", Ab charcha ka vishaya tha Arjun ki ummeed se he jyada furti aur uska jhapatna, jo aankh jhapkne se pehle ho gaya tha. Taaliyan ruki toh is baar Shahid ke sath Dilbag ne Arjun ke paale me kadam rakha, dono viprit disha se badhe the. Dipa bhabhi jaise anjaane darr ki wajah se thoda kareeb aa khadi hui aur in dono ko poori mustaidi se dekh raha Arjun Shahid bhai ki taraf jhapat kar unhe patak he raha tha ki Dilbaag ne chalaang lagate hue uske paanv jameen se ukhaad diye. Dipa ki saans he ruk chali thi ye soch kar he ki is prahaar se yakinan Arjun ko chot pahuchi hai. Udhar Arjun toh Shahid bhai ke upar se he palti kha kar mooh se mitti saaf karta khada ho gaya par Dilbaag wapis bhag chuka tha.
"Dilbag ne point kamaya teh Arjun ne daanv poora kitta. Mamla barabar reha es karke Shahid khel vich rahega. Ek point Shahid di team ne kyonki Arjun ne dono bande nahi giraye.", Jaisa ki purv-nirdharit hua tha ki Arjun ko dono raider ko patakhni dene par he ank milega aur waisa na hone par jo usko chu kar nikal jayega, ank us raider ko prapt hoga. Hua bhi aisa he jab Dilbag bach nikla lekin Shahid ko patakne ki wajah se 2 me se ek he ank ban paya. Khel yahi se majedar ho chala tha lekin bheed bhi badhne lagi thi, baat aaspas chupal tak jaane se. Dipa chalti hui kab agle paale ke kinare pahuch gayi usko bhi dhyaan na raha. Jyadatar log baithe the aur kuch khade toh Dipa bhabhi fir bhi kuch duri par halke andhere me thi. Arjun ne honth par aaya halka sa lahu jeeb se he chaat kar saaf karne ke baad raid shuru ki.
"Is baar dhava bolna 'P' bana ke lekin Kamlesh tum aur Dilu dandi pe rahoge bhai.", Shahid ke kahe anusaar 7 ke 7 khiladi panje majbooti si tikaye is tarah ghoomne lage jaise Arjun kendra bindu ho aur wo koyi naag jo usko kasne ke khwahishmand ho. Is baar uttejana me Bholu bahar se he cheekha.
"Oh Minder, gitteya te jump maar isde. Mege, lamak ja pith teh sheti.", Wo keh raha tha ki ek vyakti jaldi uske ghutno par chalaang lagaye aur dusra peeth par sawar ho jaaye. Arjun ne ghera kasne diya apne ird-gird aur jaise he wo dono vyakti uski taraf koode, thik saamne teesra aur Shahid Arjun ko dabochne koode. Aur yahi Arjun Minder se bachta hua Mege ko apne kandhe par uthaye apne paale ki taraf kood gaya. Ye dono he usne bahar kar diye the par 80-90 kilo ke Mege ko usne jitne araam se uthaya aur fir apne paale me araam se giraya tha sabhi taali aur seetiyan maarte reh gaye. Arjun sirf aur sirf khel raha tha jabki dusri taraf wo log haanfte hue ab isko gambhirta se lene lage, khaaskar Kamlesh aur Dilbag.
"Oye balle oh pandta. Sirra he lagata putt tu tah. Ae school de jawaak nai hai jinhanu tu ehda chuk ke pajh janda. Hahaha.. mann gaye putra.", Lala ji ne Jugraaj ji dwara 1 ank Arjun ko pradaan karne ke baad is adhbut drishya se khush ho kar paas khadi un 5-6 ladkiyon ko 50-50 rupaye diye, khel me lagan dikhane ke evaj me. Saamne Shahid ki team jaise do faad ho gayi thi is raid ke baad. Jaha Shahid 4 khiladion ko raid daalne ki yojna bata raha tha, wahi Dilbag ko Kamlesh budbudate hue kuch alag he kaam bata raha tha, bina uski taraf dekhe jaise wo iska pata kisi ko lagne na dena chahta ho. Dilbaag ne bolne se pehle har taraf aaspas baithe logo ko dekha aur utni he dhimi awaaj me usne jawaab diya. Unki team se 2 tagde khiladi Arjun ko gherne nikal chale the jabki Arjun unhe dekhne ke sath sath ye bhi dhyaan de raha tha ki saamne ek team nahi balki 2 khel rahi hai. Choti team kabaddi ke sath jaise aur kuch bhi karne ka irada rakhti hai. Dono khiladi satarkta se Arjun ki aur dhire dhire badh rahe the. Arjun kuch kadam peeche hota hua kabhi ek taraf ho jata toh kabhi dusre wale ko peeche hatne par majboor karta. Kamlesh ne sabhi ka dhyaan Arjun pe lage dekh Dilbaag ki jaangh par ungli chalte hue khaas ishara diya aur wo uske aage ho gaya. Dilbag ghere ki antim line par tha jidhar bas 2 he log the kyonki jyadatar toh paale ke aamne saamne lambvat baith kar ye khel dekh rahe the. Andhere me Dilbag ke hath me kuch pakdaya gaya aur fir wo vyakti waha se hat kar bheed me ja mila. Dipa bhabhi ne bhi ye dekh liya tha jiski aashanka ab sahi saabit hoti jaa rahi thi. Udhar Arjun un dono ko chhaka raha tha darate hue aur jaise he ek ki saans tootne lagi Arjun ne hath ka dikhawa usko pakadne ka karte hue paanv viprit disha me ghuma kar dusre wale ka rasta band kar diya. Palak jhapakte he wo Arjun ke kandhe se ghoom kar poli mitti me peeth ke bal gira tha aur jitne dusra Arjun ko choone ki koshish karta, uske badhe hue hath ko kandhe par laate hue Arjun ne kisi bori ki tarah ghuma kar badi aahista se uski peeth bhi pehle wale ki bagal me sata di.
"Oh Arjun baai.. ek number speed hai baai.. mann gaye tere dimaag nu. Jama billi wang jhapteya.", Nihaal khushi se taali peet raha tha aur Arjun un dono ko hath de kar uthane ke baad apni jagah aa kar wapis khada ho gaya. Un dono khiladiyon ke mann se ab gambhir pratiyogita wali baat nikal kar Arjun ke liye samman badh chuka tha jo khushi khushi maidaan se bahar kinare pe ja khade hue. Bholu aur Dara fir se team me aa chuke the unke bahar hone ki wajah se. Yahi niyam tha ki saamne 7 barkarar rahenge.
"Mitra pyaaron, score hai Arjun 3 Shahid 1. Matlab bas ek raid aur ek bachaav poora karna hai Arjun ne jabki itna he agar dusri team karti hai toh khel barabar. Aur dugna karne pe wo vijeta. Dekhna hoga tajurba jeetega ya josh.", Jugraaj ji ne ank sunaye toh Nihaal aur uske dost taliyan peetne lage the par kuch aur bhi the jo is se alag raaye rakhte the aur wo inse alag apne he jhund me the. Unki taraf kisi ne khaas tavajjo bhi na di. Dipa bhabhi gor se dekh rahi thi ki uska pati kya karne wala hai gaagh Kamlesh ke sath mil kar. Arjun bhi dekh raha tha ki Kamlesh Shahid ki jagah khud baki khiladiyon ko apne hisaab se gherabandi karne ka keh raha tha. Matlab saaf tha ki is raid me Arjun ke sath wo niyam se nahi khelne wala tha.
'Chilla bhi nahi sakti aur agar bata dene par kuch na mila toh badnaami ke naam par jaleel alag karenge. Waheguru Arjun ko bacha lo bas.', Dipa bhabhi ki sthithi bhi uchit thi. Saamne uska he pati niyam se virudh kaam karne wala tha jiska parinaam pakde jaane par bhi ghatak aur Arjun ke jakhmi hone par bhi. Wo chaah kar bhi cheekh nahi sakti thi ki Arjun par khatra hai. Is andhere me Dilbaag apni mutthi me chhipaya hathiyaar kahi bhi fenk kar bach sakta tha aur ghar jaane ke baad wo jo salook Dipa ke sath karta, us se yakeenan jism ke jakhm badhne he wale the. Arjun ghutno ke bal baith kar sar jhukata hua jaise fefdo me praanvayu badha raha tha ya kuch aur. Usko is andaaj me dekh khud Lala ji aur Jugraaj ji bhi apna dhyaan us par lagaye the. Wo jab khada hua toh chehre par alag he muskaan thi aur aankhon me manzil ko paane ki chahat.
"Sukhi, Bholu tum dono darna nahi aur line me idhar peeche hatne ke baad jitna ho sake is ladke ko andar lete aana. Jeete tu Shahid ke sath jodi me saamne reh kar kadam piche karte jana jis se fanda bann sake. Kala aur main bhi idhar aisa he karenge. Koyi galti nahi honi chahiye is baar. Uski saans na tooti toh is baar he wo jeet jana. Dilu, dhyaan naal.", Dilbaag ko Kamlesh ne alag sandesh diya tha. Lekin saamne se aata hua insaan jaise in chote mote ghero ki baare me soch he nahi raha tha. Safed patti paar karne se pehle usne jis tarah Dipa bhabhi ki aankhon me dekha tha wo kuch samajh na saki. Uski muskurahat dekh toh aisa lag raha tha jaise koyi Aashiq khudkhushi karne se pehle aakhir baar chehra dikha raha ho apne ishq ko.
"Fans gaya tah zinda nahi bachna main Kamli. Vekh teri gherabandi tagdi hai, appa jitt jana ehda vi.", Dilbaag mann he mann darr raha tha aur uski ye aakhiri koshish thi Kamlesh ko manane ki. Yahi dono the sabse aakhir me daayi taraf ke kone par.
"Shhh.. Baat haar jit ki nahi hai Dilu, poore pind ki hai. Ye banda akhade nahi jaane dena dargah wale. Bas sab jaise he isko daboche, keel patt me ya chuttad pe ghusa diyo."
"Sooye ka tukda iska akhade se na rok sakega.", Dilbaag ki mutthi band thi jaise usme he wo sookshm hathiyar tha.
"Sharir me taap chadhega iske bas chubha diyo. Wo aa chuka hai.", Kamlesh ne ye na bataya tha ke wo bas sua nahi hai balki jehar bujha sua hai jo kuch bhi kar sakta tha Arjun ke sath. Bahot he dhimi raftar me kabaddi kabaddi bolta hua Arjun bas Shahid ko he dekh raha tha jaise wo kehna chah raha ho ki saamne matt aana. 4 kadam aage badhate he jaisa Kamlesh ne kaha tha thik waisa he hua aur parinaam bilkul viprit. 2 log peeche se aur 2 saamne se koode the par Shahid ek taraf ho gaya Arjun ko khule sand ki tarah kandha ek taraf wale 2 logo par maarte dekh. Mitti ko pichle dono paanv ne aise udaya tha ki peeche wale dono apne chehre ko dhakne par majboor ho gaye. Kamlesh jhapata lekin is baar khel se virudh Arjun ne uski gardan pakad kar jameen par aise de mara tha ki aasman me jo taare abhi aaye na the wo Kamlesh dekhne laga tha. Dilbag ke hath se wo sue ka tukda ek taraf gir gaya jisko aage badhte Jugraaj ji ne bhi dekha, jo Arjun ko rokne aa rahe the. Lekin deri ho he gayi.
"Namard ho tummmm", Ye dahaad aisi thi ki har insaan kaanp utha aur jab tak wo log samajhne laayak hote Dilbaag Arjun ke paanv pe gir chuka tha.
"Maaf kar do pradhaan ji .. maaf kar do.. Ye Kamli ne kaha tha ke aapko akhaade me jaane se rokne ke liye ye karna jaruri hai. Mujhe nahi pata tha ke is ek sue ki maar se aap kaise jakhmi ho sakte the.. Mujhe maaf kar do..", Haal e bayaan sunte hue bhi Arjun ne pehle toh Kamlesh ki taang pakad kar usko apne paale ki taraf uchaal fenka fir paanv utha kar jaise he Dilbaag ke jhuke hue sar pe rakhne laga toh andhere me chamakte un 2 aansuon ne uska ye vaar rok diya. Arjun palat kar Sarpanch ki taraf chal diya tha.
"Ho gaya na pramanit Sarpanch sahab ki aapka shak sahi tha. Ab kya karna hai inke sath? Dilbag ko saja mere dada ji sunayenge aur itne ye vyakti apne khet se bahar nahi niklega. Ullanghan hone par khet-khalihaan wapis. Dusre ko aap apne tarike se dekho jo aapke shak par khara utar gaya, durbhagya se.", Arjun ne is baar sarpanch Kewal Singh ke charan sparsh kiye the aur sabhi ko sadme me chhod wo Nihal ka hath pakad kar Shahid bhaiya ke sath yaha se chal diya. Lala ji ne bhi ghere me bache dono ke siwa sabhi ko waha se abhi ke abhi jaane ka aadesh diya toh Dipa bhabhi na chahte hue bhi bheed ke sath yaha se chali gayi. Arjun ghar ki taraf na ja kar khel-ghar ki bagal wali sunsaan gali ki aur ja raha tha. Shahid bhai ne he usko kuch der sath rehne ke liye manaya tha.
"Lala ji, Dilbaag ka toh hisaab bana gaye chote pandit par hamare bhai ko shayad hum sahi saja nahi de paayenge. Jugraaj bhai, Kamlesh ke hath baandh do peeth peeche. Hosh me aayega toh jawaab lenge is se.", Kewal Singh Lala ji ki kursi ke paas he jameen par baith gaya. Aankhon me aansu the aur dil me kuch halkapan. Dilbag ne dono ki taraf ghutno par gire hue hath jode toh pehli baar master Jugraaj ne niyam kaayde bhulate hue uske gaal par jhannate dar thappad jadd diya.
"Bada maan tha ve Dilleya tere teh sahnu. Tu tah akhaade da he maan na rakheya. Kuj kami reh gayi se saade pyaar satkaar vich jo tu pind de maan nu he mitaan lageya ci?"
"Daar ji, main sach kehna hai chahe gurughar sau uthwa lo. Menu Kamli ne keha c ki eh kil Arjun de patt ya peeche maar ke osnu mele vich shamil hon toh rokna. Kehnda ki eh pind de mukhiya di jaan da sawaal hai. Tussi jaande ho ki es Dilbaag ne kadi koyi galat kamm nai kitta? Main Kamli de iraade nahi c jaanda?", Wo safaai de raha tha aur Lala ji feeki hansi dete hue usko dekh rahe the. Jugraaj ne Kamlesh ke bhi hath baandh diye the peeth ki taraf aur jald he waha Succha Singh ji ke sath sath, Rajnish ji urf Manager sahab ghatnasthal par pahuche 2 yuvako ko liye. Unhe poore maamle se khud sarpanch ne avgat karwaya. Chehre par unke bhi 12 baj gaye the sab sunn kar.
"Kewal Singh, tumhe Kamlesh ki jaankari thi?", Ye Succha Singh ji ne poocha tha jo ab chintit bhi the aur dukhi bhi.
"Ji baba ji lekin saboot nahi tha mere pas. Mahine pehle se main dekh raha tha ki ye parle pind ke kuch badmasho ke sath jyada he mel-jol badha raha hai. Dilbag nahi jaanta tha un logo ki mansha lekin sab log ayyashi iske he khet par karte the. Chahe Dilbag waha ho ya nahi. Adde wali rangdaari me bhi iska jikar hua tha lekin paiso ke dum par isne he baat dabva di. Kal Nawaab ki kuch baatchit hui thi Arjun se shaam ko aur uske baad wo ghar pe apne is chache se he baat kar raha tha ki kaise uske dost Arjun ko thikane lagana chahte hai. Pehle he maine vadde daar ji ko bataya tha ki iska gaanv nikala karwa do toh sahi hoga lekin aapke saamne he hai ke meri ijjat uchaal di isne wo bhi Pandit ji ke bache par humle ki saajish sare aam karte hue. Main padvi chhod dunga ji lekin kal ki panchayat me iska fainsla mujhe he karne de toh behtar hoga.", Itna khulasa karne ke baad Kewal Singh ek aur baith gaya. Kamlesh ke mooh se khoon beh raha tha aur wo bhi ab dard ko peene ki koshish karta hua uthne laga tha par hath bandhe dekh hairaani se saamne baithe logo ko ghoorne laga.
"Hmmm. Arjun ne fainsla tumhe he karne ko kaha hai toh aisa he hoga. Dilbaag ki saja kya hogi ye Pandit Rameshwar ji nirdharit karenge ya hum abhi unse baat karne ke baad subah panchayat me he unka farmaan bata denge. Filhal Dilbaag tumhe jo aadesh mila hai, wahi karna hai. Yaad rahe ki gaanv nikala nahi khet me najarband ki saja mili hai tumhe. 2 waqt ka khana tumhe wahi milega aur agar tum saja-khilafi karte ho toh hatya ke pryaas me saja bhogne se pehle sampatti kurk hogi aur gaanv bedakhli alag. Waise bhagyashali ho tum jo us bhali aatma ne tumhe jaane kaise baksh diya. Humla dekh kar toh lag raha tha ke ghere se koyi bhi apne paanv par khada hone laayak nahi bachega. Wo yaha logo ke manoranjan ke liye khel raha tha tum sabko aukaat dikha kar ki uske liye tum mehaj manoranjan ka jariya ho. Fir bhi baaj nahi aaye murkhta dikhane se.", Lala ji ne bhali bhaanti wo chaal aur poora drishya dekha tha jisme Arjun kahi se bhi Arjun na tha.
"Lala ji, es kill teh zehar bujhaya hoya ji.", Jugraaj kaanch ke gilaas me duba kar wo sue ka tukda liye aaya toh paani ka rang badal chuka tha. Dilbaag toh ye dekhte he khud ke gaal par thappad ki baarish karne laga jisko un 2 yuvako ne roka Suchha Singh ji ke aadesh par.
"Yahi case ab Kamlesh par banega Kewal Singh, tumhare panchayti farmaan ke baad. Pandit ji shayad khud pooch-tach karna chahenge ab Kamlesh Singh se. Ye saboot aur Kamlesh ko sath le chalo Dhiraj-Manjeet. Panchayat me pesh hone ke baad bhi ye hamari nigraani me rahega. Kewal, panchayat band kamre me lagegi aur uski munaadi matt karwana. Milte hai subah 7 baje dharamshala me. Zehar wali baat failne na paaye aur Nawaab se keh dena ki ya toh ghar rahe ya fir usko nanihaal bhijwa do kuch hafte. Tumne gaanv ko hamesha pehle rakha hai pariwar se toh itna toh tumhare liye hum bhi kar sakte hai. Dilbaag, tumhari saja shuru ho chuki hai. Nikal jao aur jab bulawa aaye toh hajir ho jana. Chaliye baba ji. Lala ji aapko Juggi chhod dega.", Rajnish ji ke aadmi Kamlesh ko jeep ke pichle hisse me fenk chuke the aur Succha Singh ji ko agli seat par baitha kar Rajnish ji waha se nikal gaye.
"Tumhe bura lag raha hoga na Kewal bhai?", Dilbaag toh andhere me jaise taise nikal chala tha par Jugraaj aur Lala ji sarpanch ke sath wahi par baithe the.
"Atcha he lag raha hai filhaal toh Juggi baai. Mera bas nahi chalta nahi toh parle pind ke saare nashedi dariyan me hath baandh kar fenk du. Dekh lo sangat ka asar. Main fauj sewa me raha aur jakhmi lauta par hara nahi. Bhagwaan, manjhla hai lekin mujhse jyada samajhdar aur is pind ka maan lekin ye sapola khud toh barbaad hua so hua, apne bhatije tak ko nahi baksha isne. Lala ji, chaupaal me ghoshna kar dena ki sabhi khiladiyon ki khuraak mere jimme hai. Is ghatna ke baare me waise toh log jyada baat nahi karenge kyunki wo toh darr he gaye the us awaaj aur tufaan se lekin ye aapne sahi kiya ki panchayat band kamre me rakhwai. Aagya dijiye, thoda apne nawaab ki bhi khair khabar leta hu.", Sarpanch ne Jugraaj se hath milaya aur Lala ji ke charan sparsh karne ke baad seedha apne ghar ki taraf chal diye, tej kadmo se.
"Kya lagta hai Juggi beta, us aandhi ko dekh kar?", Lala ji Jugraaj ke scooter ki taraf badhte hue ab thoda muskura rahe the jaise unhe is haadse ki ab chinta na ho. Waise bhi saja ka farmaan toh diya he ja chuka tha aur wo bhi bina mahol ko garam kiye.
"Aap behtar bata sakte hai chacha. Maine toh bas aaj 2 alag alag Arjun dekhe. Ek jo pehle hansi majaak me sabke sath khel khel raha tha aur dusra jaise koyi aur he tha. Apni taaqat ka ek chota sa namuna deta hua jungle ka raja. Bholu aur Sukhi ki toh hansli gir gayi hai kandha utarne ke sath. Jabki haalat baaki dono ki bhi thik nahi thi. Kamlesh ko dekha na kaise khoon ugal raha tha aur itni taaqat kisi me kaise ho sakti hai chacha? Wo sachmuch he jaise kutte aur sher wala muqabla tha. Sher ne mooh ki jagah panje se uchaal diya is dagabaaj ko. Pehle aisa kuch dekha hai aapne?", Jugraaj ne scooter me chabi lagane ke baad unki taraf dekha.
"Tulna toh nahi kar sakta par bade Pandit ji rehte toh hamesha he shaant aur hanste bolte the par jab unke gusse ko dekha toh tumhare jaisa he haal mera tha. Lekin unhone saja us vyakti ko kuchal kar di thi jabki Arjun ne unse viprit ksham-daan diya. Waha ek vyakti tha jo apradhi tha aur yaha 7 saamne the jinme se ek khud piche chala gaya aur 5 khade hone laayak na rahe wo bhi itni jaldi ki kisi ko samajh nahi aaya. Bas dikha toh wahi jor jiski tulna tum kutte aur sher ki taaqat se kar rahe ho. Akhaade me ho sakta hai peshewar log ho lekin ye insaan dohre swaroop wala hai aur agar dusra swaroop nikhar kar saamne aaya toh waha manjar qayamat bhara hone wala hai. Yahi wajah hai ki Rameshwar bhai ne eitraaj nahi kiya. Dekha kaise mauke par he saja suna di thik apne dada ji ki tarah? Chalo bhai ghar chhod do bas, neend toh is ladke ne udaa he di hai par araam toh karna hoga.", Jugraaj bhi muskurata hua scooter chalu karne ke baad unhe peeche baitha kar chalne laga.
"Dohra swaroop, kya sahi naam diya hai aapne. Ladka toh pehle se he tayaar hai aur jhalkiyan bhi dikha raha hai ki uski najar aur jism sabkuch samajhta hai. Bache darr na jaaye bas is ghatna se."
"Arre unhone dekha he kaha sabkuch aur hua bhi toh itni jaldi. Waise bhi charcha ke liye kuch toh hona chahiye beta. Khabar honi chahiye ki sher aa chuka hai.", Lala ji ne aadtan hanste hue baat khatam ki aur dono nikal chale, chowkidar ko gate subah 5 baje kholne ka bolte hue.
.
.
"Bhabhi, aap yaha raat me akeli khadi ho? Aap pareshan hai na bhabhi?", Nihal apne ghar ki taraf ja raha tha aur jaise he Dipa bhabhi ke ghar ke saamne pahucha usne dekha ki bhabhi bahar thaddi par akeli baithi hai mooh par dupatta liye. Kareeb aane par Nihaal ne paya ki chehre par kuch gilapan tha jo shayad aankhon ya garmi ki wajah se hoga. Uski awaaj sunte he Dipa bhabhi ne hadbadahat me chehra saaf karte hue jhooti muskaan di.
"Na ve, main toh bas tere paah ji ka intjar kar rahi thi. Aaye nahi na roti lene aaj akhade se jaate hue. Tujhe mile kya kahi?", Kitni safaai se wo jhooth bol rahi thi jabki Nihaal jaise unhe sach batane se he darr raha tha.
"Wo bhabhi.. main paah ji ki taraf se aa raha hu Shahid bhai ko khet pe chhod ke. Khana toh aapko bhi pata hai ke yar dosto ke ghar se bhi aa jana. Aap garmi me bahar na baitho, mausam bhi ghuta hoya. Barish hui toh bimaar padd jana aapne.", Nihaal ki bholi baatein sunn kar ab Dipa bhabhi kya jawaab deti.
"Shahid inke paas rukega ya milne gaya hai bas? Aur tu akela he aaya itni dur se?"
"Maaf karna bhabhi pehle maine jhooth kaha ke main paah ji ke pas se aa raha hu. Main aur Arjun baai Shahid paah ji ke naal he the kaafi der tak. Fer unke ghar se khana bandhwa kar paah ji toh Dilbag paah ji ki taraf nikal gaye khet pe aur main abhi Arjun ko haweli chhod ke apne ghar ja raha tha. Kisi ne aapko kuch kaha hai kya bhabhi?", Nihaal darr raha tha ke kahi unhe kisi ne galti se sach na bata diya ho. Pehle he bahot se aise sach the jo Dipa bhabhi ke kaan tak nahi pahuche the aur aaj bhi unhe ye batane koyi na aaya tha ke unke pati ne galat kaam me Kamlesh ka sath diya hai. Gaanv kya poora pariwar he tha ye jisme bache bhi samajhdar he the aise maamlo me.
"Na ve mujhe toh kisi ne nahi kaha kuch aur mausam kharab hone ki wajah se Raano ko andar baandh ke aayi thi na toh bas tumhare paah ji ko udeek rahi thi. Ab Shahid unki taraf chala gaya hai toh mujhe chinta nahi. Nahi toh tujhe he bhejti unka khana dene ke liye. Aur ye Arjun itni der se jata hai kya akhaade se?"
"De vi aana si bhabhi main aap bas keh deya karo. Arjun baai da mood thik c ni kuch aur Shahid paah ji ne thoda bahot hansi majaak karke sada dova da makhol kitta teh oh khush ho gaya. Bada mehanti munda hai bhabhi aur dil da vi changa. Keh raha tha ke kal toh kahi jana hai savere lekin shaam ko akhade jarur aayega. Keh raha tha ke aaj bahot thakaan hai chote pradhan ji bhi haweli nahi hai toh bas time se so jaayega. Maalish ke liye main badi bebe ko bol ke aaya hu baai ki. 2 baje se 5 tak toh wo mitti he khodta raha kalla udhar. Fer practice aur uske baad kabaddi wali kushti. 8 baj gaye.. Bhabhi 8 baj gaye aaj toh ghar se bahar. Bebe idhar he na chali aaye, main jata hu ji. Rabb rakha.", Hath jodd kar ye bhola insaan chala gaya aur peeche chhod gaya us insaan ko jo samajh nahi pa raha tha ke uske jiwan ka saar kya hai. Aaj Arjun ne bas uske aansuo ko dekh kar apna kadam peeche le liya tha jabki wo khud dohre mann se ek taraf waisa hone dena chahti thi aur dusri taraf apradhi ki biwi ke bojh se bachna bhi. Dipa jaanti thi kii uske pati ko maafi jarur mili hogi. Lekin ab Arjun jaise us se aur dur ho gaya tha. Din me toh uski awaaj kam se kam suni thi lekin ab uska bhi wajood rehna tha ya nahi, sab kismat pe tha. Aur wo toh Dipa se tabhi rooth gayi thi jab Dilbag ne usko badchalan bata diya tha parle gaanv ke nashediyon ki sohbat me.
