Update 2
November ki ek raat main late night show dekhkar akela ghar laut raha tha. Charon taraf gehra Kohra tha. Sheher ki sadkon par har gaadi ki speed dheemi ho gayi thi aur kyunki vo ilaaka jahan main rehta tha, Kalp Residency, pedon se ghira hua tha vahan kohra kuchh zyada hi gehra tha. Main colony ke gate se andar dakhil hua to ek kadam bhi aage badhana mushkil ho gaya. Main yahan pichhle 2 saal se tha isliye sadak ka andaza lagata hua apne ghar ki taraf badha. Kyunki sadap par lage lamp post ki roshni bhi neeche sadak tak nahi pahunch pa rahi thi isliye maine sadak ke dono taraf bane railing ka sahara lena theek samjha. Railing ka sahara leta main dheere dheere aage badha. Sardi itni zyada thi ke ek bhaari jacket pehne hue bhi main sardi se kaanp raha tha.
Main dheere dheere andaza lagate hua apne ghar ki taraf badh hi raha tha ke saamne se ek bhaari aawaz ne mujhe chaunka diya.
"Kaun hai?" Maine rukte hue puchha
"Ek khoya hua insaan" Phir vahi bhaari aawaz aayi "Ek bhatakti aatma jise bhagwaan maaf karne ko taiyyar nahi hai"
Main uper se neeche tak jam gaya. Dhyaan se dekha to saamne ek saaya kohre ke beech khada tha. Uske dono haath sadak ke kinare bani railing par the aur usne jhuk kar apna chehra bhi apne haath par rakha hua hua. Maine dheere se aage badhkar us aadmi ke kandhe par haath rakha par vo vaise hi jhuka khada raha. Apna sar apne haathon par rakhe aise rota raha jaise kisi baat par pachhta raha ho. Aawaz mein dard saaf chhalak raha tha.
"Kya hua? Kaun hain aap?" Maine kandhe par apne haath ka dabav badhate hue puchha
"Sharab" Us aadmi ne vaise hi jhuke hue kaha "Main ek sabak hoon har us insaan ke liye jo nasha karta hai, vo insaan jo apni zindagi ko seriously nahi leta, har vo insaan jo rishton ki kadar nahi karta, vo zindagi jo apni samajh nahi paata. Main ek sabak hoon un sabke liye"
"Aapko ghar jaana chahiye" Maine kaha
"Mil hi nahi raha" Us aadmi ne kaha "Yahin kahin hai par kahan hai samajh nahi aa raha. Mujhe pata hi nahi ke main kahan hoon"
"Aap is waqt Kalp Residency mein hain" Mera haath ab bhi us aadmi ke kandhe par tha aur vo ab bhi vaise hi jhuka hua tha.
"Bungalow No. 13" Vo aadmi sidha hua "Is kohre mein Bungalow No. 13 nahi mil raha. Vahan jana hai mujhe"
"Ohhhhh" Maine us aadmi ko sahara diya "Mere saath aaiye Mr Manchandha. Main aapko ghar tak chhod aata hoon"
Jaise hi unka naam mere zubdaan par aaya vo fauran 2 kadam pichhe ko ho gaye aur meri taraf aise dekhne lage jaise mujhe pehchanne ki koshish kar rahe hon. Aankhen sikudkar mere chehre ki taraf ghoorne lagi.
"Kaun ho tum?" Mujhse sawal kiya gaya "Mujhe kaise jante ho?"
"Mera naam Ishaan Ahmed hai. Yahin Kalp Residency mein hi rehta hoon. Aapne Bungalow No 13 ka naam liya to main samajh gaya ke aap hain, Mr Manchanda, Bungalow ke kirayedaar" Maine jawab diya
"Bungalow ka bhoot kaho" Unhone mere saath kadam aage badhaye "Jiski halat bhoot se bhi zyada buri hai"
Bhoot se bhi zyada buri?" Maine unhen sahara dete hue kadam aage badhaye
"Mere gunahon ka sila bete. Main aaj vahi kaat raha hoon jo maine kabhi khud boya tha. Mere saath ..... "Achanak unhen zor se khaansi aayi aur baat adhuri reh gayi
Mujhe unki halat par kaafi taras aaya. Bungalow mein is haalat mein raat bhar unhen akela chhodna mujhe theek nahi lag raha tha par main is baat ke liye bhi taiyyar nahi tha ke bhoor Bungalow mein main unke saath poori raat ruk jaoon.
"Kahan le ja rahe ho mujhe" Unhone sawal kiya
"Aapke ghar" Maine jawab diya
"Tum un logon mein se to nahi ho na?" Unhone phir mere chehre ki taraf dekhte hue sawal kiya
"Kin logon mein se Sir?" Maine sawal ka jawab sawal se diya
"Vahi jo mujhe nuksaan pahunchana chahte hain" Jawab aaya
Mujhe lagne laga ke ye aadmi shayad pagal hai aur is waqt apne pichha chhudane mein hi samajhdaari thi isliye maine bahut hi aaram se unki baat ka jawab diya, behad pyaar se.
"Maine aapko koi nuksaan nahi pahunchana chahta Mr Manchanda."
Dheere dheere ham Bungalow No 13 tak pahunche.
"Mera khyaal hai ke aapko fauran so jana chahiye" Maine unhen darwaze par chhodte hue kaha.
"Jana mat. Mujhe akele andar jaate hue dar lagta hai. Kitna andhere hai, kitni sardi, kitni khamoshi" Unhen phir se mera haath pakad liya " Ruko thodi der jab tak ke main roshni ka intezaam nahi kar leta"
Tab mujhe dhyaan aaya ke Bungalow mein light nahi thi. Kyunki vo itne saalon se veeran pada tha isliye vahan ka electricity connection hata diya gaya tha aur pichhle 6 mahine se Manchanda us ghar mein bina electricity ke reh raha tha.
"Theek hai main aapko andar tak chhod deta hoon" Maine kaha aur jeb se lighter nikalkar jalaya. Bungalow ke saamne bane garden se andhere mein hote hue main unhen lekar bungalow ke darwaze tak pahuncha. Andhere mein us ghar ko dekhkar main samajh gaya ke kyun usko Bhoot Bungalow ke naam se pukarte hain. Gehri khamishi aur kohre ke beech khada vo makaan khud bhi kisi bhoot se kam nahi lag raha tha. Charon taraf sirf hamare kadamon ki aahat hi sunai pad rahi thi. Meri dhadkan tez ho chuki thi aur main khud bhi kaanp raha tha. Kuchh sardi se aur kuchh dar se.
Manchanda ne dawaza khola aur andar dakhil ho gaye jabkimain vahin bahar darwaze par khada raha. Vo mere haath se lighter le gaye tha isliye main andhere mein khada hua tha. Thodi der baad andar table par rakha hua ek lamp jal utha aur charon taraf kamre mein roshni ho gayi.
Maine ek nazar kamre mein daali. Lamp ki halki roshni mein jo nazar aaya use dekhkar lagta nahi tha ke main kisi bhoot bungalow mein dekh raha tha. Maine Manchanda ki taraf nazar daali par halki roshni mein chehra nahi dekh paya.
"Main chalta hoon" Maine apna lighter bhi vapis nahi liya aur kadam pichhe hataye
"Good Night" Andar se sirf itni hi awaz aayi.
Main bungalow se jaldi jaldi nikalkar apne ghar ki taraf badha. Ye thi meri aur Mr Manchanda ki pehli mulaqat.
To be continued....