Adultery Bungalow No. 13

[Ravi Prakash]

 

[Ravi Prakash]

Update 1​

Main Peshe se ek wakeel hoon. Naam Ishaan Ahmed, umar 27 saal, kad 6 foot, rang gora. Law college mein har koi kehta tha ke main kaafi handsome hoon. Kaise ye mujhe ab tak samajh nahi aaya kyunki meri zindagi mein ab tak kabhi koi ladki nahi aayi. Main shehar ke us ilaake mein rehta hoon jahan sabse zyada ameer log hi baste hain. Nahi ghar mera nahi hai. Kiraye par bhi nahi hai. Bas yun samajh lijiye ke mere yahan rehne se us ghar ki dekhbhaal ho jaati hai isliye main yahan rehta hoon.
Meri maali halat kuchh zyada theek nahi hai. Badi mushkil se law college ki fees bhar paaya tha. Jaise taise karke apne law ki padhai poori ki aur practice ke liye sheher chala aaya. 3 saal se yahan hoon par ab tak koi khaas kaamyabi haath nahi aayi par main mayus nahi hoon. Abhi to poori zindagi padi hai.Par ek din main kamyaab zaroor kehlaoonga, ye bharosa poora hai mujhe apne uper.
Jis ilaake mein main rehta hoon yahan shuru se aakhir tak vahi log baste hain jinke paas andha paisa hai. Itna paisa hai ke vo saari zindagi bethkar khaayen to khatam na ho. Bade bade ghar, unke saamne bane shandaar gardens, saaf suthri sadak. Colony ke theek beech mein ek park bana hua tha jiske chaaron taraf takreeban 6 foot ki iron ki fence bani hui thi.
Par is saari khoobsurati mein ek daag tha. Bungalow No 13. Us poore ghar par uper se neeche tak dhool chadhi hui thi. Khidkiyan gandi ho chuki thi jinpar maine aaj tak koi parda nahi dekha tha. Ghar ke saamne garden to kya ek flower pot tak nahi tha. Paint utar chuka tha. Ghar ke saamne jaane kabse safai nahi hui thi aur kaafi kachra jama ho gaya tha. Ghar ka darwaza dekhne se aisa lagta tha ke bas abhi gir hi jaayega. Ghar ka haal aisa tha ke hamare desh ke mash-hoor bikhaari bhi us ghar mein bheekh mangne nahi jaate the.
Us ghar ke baare mein kahaniyan kuchh aisi thi ke koi bhi usmen rehne ke khyaal se hi kaanp uthta tha. Us ghar ke baare mein log baaten bhi itni khamoshi se karte the ke jaise kisi ne sun liya to unpar museebat aa jaayegi. Kaha jaata tha ke us ghar par kaala saaya hai aur koi bhatakti aatma us ghar mein niwas karti hai aur isi vajah se pichhle 20 saal se us ghar mein koi reh nahi paaya tha. Kuchh in kahaniyon ki vajah se, kuchh akelepan, kuchh purani khasta halat ki vajah se us bungalow ko bhoot bungalow ke naam se jaana jaane laga tha. Iske kisi ek kamre mein bahut pehle ek khoon hua tha aur kaha jaatha ke usi din se is bungalow mein usi ki aatma bhatakti hai jiska khoon hua tha. Dekhne walo ka kehna tha ke unhone aksar raat ke waqt ek roshni ko bungalow ke ek kamre se doosre kamre mein jaate dekha tha aur kayi baar kisi ke karahne ki aawaz bhi suni thi. Safed saree mein lipti hui ek aurat ko us ghar mein bhatakte hue dekhne ka dawa bahut saare log karte the.
In kahaniyon mein kitna sach tha ye keh pana bahut mushkil tha par jabki vo ghar bahut hi kam kiraye par mil raha tha koi bhi insaan usmen rehne ko raazi nahi tha. Vo ghar poore sheher mein dheere dheere mash-hoor ho gaya tha. Jo us ghar mein rahega vo maara jaayega aisi baat har kisi ke dimag mein beth chuki thi. Aur ek saal garmi ke mausam mein ye saara bhram us din khatam ho gaya jab Mr. Bhairav Manchanda us ghar mein rehne aaye. Vo koi 70 saal ke dikhne mein ek sidhe saade se aadmi lagte the. Koi nahi janta tha ke vo kahan se aaye the par Bungalow No 13 unhone kiraye par liya aur us ghar ki hi tarah khud bhi ek akelepan se bhari zindagi vahan jeene lage.

Shuru shuru mein to baat yahi chalti rahi ke bhoot bungalow mein rehne wala insaan ek hafte se zyada nahi tik paayega par jab dheere dheere ek hafta 6 mahine mein badal gaya aur Mr Manchanda ne vahan se nahi gaye to logon ne bhoot bungalow ke bhoot ko chhodke unke baare mein hi baaten shuru kar di. Bahut thode waqt mein bungalow aur bhoot ki tarah unke baare mein bhi kai tarah ki ajeeb ajeeb kahaniyan sunayi jaane lagi.
Aisi kayi kahaniyan maine apne ghar ke malik ki biwi se suni jo aksar mujhse milne aaya karti thi ya yun kahun ke ye dekhne aati thi ke main ghar se kuchh churakar kahin bhaag to nahi gaya. Vo mujhe bataya karti thi ke kaise Mr Manchanda us ghar mein akele pade rehte hain, kaise vo kisi se baat nahi karte, kaise unhen dekhne se ye lagta hai ke unke paas bhi bahut sa paisa hai, kaise vo aksar raat ko sharab ke nashe mein ghar aate dekhe gaye hain aur kaise vo kaam wali bai jo aksar din ke waqt bhoot bungalow mein jaakar kabhi kabhi safai kar deti thi ab vahan nahi jaati kyunki use lagta hai ke Mr Manchanda ke saath kuchh gadbad hai.
In sab baaton par maine kabhi koi dhyaan nahi diya. Mera saara dhyaan to bas is baat par rehta tha ke main kaise apni zindagi mein kaamyabhi hasil karun. Aur isi sab ke beech ek din meri Mr Manchanda se mulaqat hui. Vo mulaqat bhi badi ajeeb thi.


To be continued....

 

[Ravi Prakash]

Update 2​

November ki ek raat main late night show dekhkar akela ghar laut raha tha. Charon taraf gehra Kohra tha. Sheher ki sadkon par har gaadi ki speed dheemi ho gayi thi aur kyunki vo ilaaka jahan main rehta tha, Kalp Residency, pedon se ghira hua tha vahan kohra kuchh zyada hi gehra tha. Main colony ke gate se andar dakhil hua to ek kadam bhi aage badhana mushkil ho gaya. Main yahan pichhle 2 saal se tha isliye sadak ka andaza lagata hua apne ghar ki taraf badha. Kyunki sadap par lage lamp post ki roshni bhi neeche sadak tak nahi pahunch pa rahi thi isliye maine sadak ke dono taraf bane railing ka sahara lena theek samjha. Railing ka sahara leta main dheere dheere aage badha. Sardi itni zyada thi ke ek bhaari jacket pehne hue bhi main sardi se kaanp raha tha.
Main dheere dheere andaza lagate hua apne ghar ki taraf badh hi raha tha ke saamne se ek bhaari aawaz ne mujhe chaunka diya.
"Kaun hai?" Maine rukte hue puchha
"Ek khoya hua insaan" Phir vahi bhaari aawaz aayi "Ek bhatakti aatma jise bhagwaan maaf karne ko taiyyar nahi hai"
Main uper se neeche tak jam gaya. Dhyaan se dekha to saamne ek saaya kohre ke beech khada tha. Uske dono haath sadak ke kinare bani railing par the aur usne jhuk kar apna chehra bhi apne haath par rakha hua hua. Maine dheere se aage badhkar us aadmi ke kandhe par haath rakha par vo vaise hi jhuka khada raha. Apna sar apne haathon par rakhe aise rota raha jaise kisi baat par pachhta raha ho. Aawaz mein dard saaf chhalak raha tha.
"Kya hua? Kaun hain aap?" Maine kandhe par apne haath ka dabav badhate hue puchha
"Sharab" Us aadmi ne vaise hi jhuke hue kaha "Main ek sabak hoon har us insaan ke liye jo nasha karta hai, vo insaan jo apni zindagi ko seriously nahi leta, har vo insaan jo rishton ki kadar nahi karta, vo zindagi jo apni samajh nahi paata. Main ek sabak hoon un sabke liye"
"Aapko ghar jaana chahiye" Maine kaha
"Mil hi nahi raha" Us aadmi ne kaha "Yahin kahin hai par kahan hai samajh nahi aa raha. Mujhe pata hi nahi ke main kahan hoon"
"Aap is waqt Kalp Residency mein hain" Mera haath ab bhi us aadmi ke kandhe par tha aur vo ab bhi vaise hi jhuka hua tha.
"Bungalow No. 13" Vo aadmi sidha hua "Is kohre mein Bungalow No. 13 nahi mil raha. Vahan jana hai mujhe"
"Ohhhhh" Maine us aadmi ko sahara diya "Mere saath aaiye Mr Manchandha. Main aapko ghar tak chhod aata hoon"
Jaise hi unka naam mere zubdaan par aaya vo fauran 2 kadam pichhe ko ho gaye aur meri taraf aise dekhne lage jaise mujhe pehchanne ki koshish kar rahe hon. Aankhen sikudkar mere chehre ki taraf ghoorne lagi.
"Kaun ho tum?" Mujhse sawal kiya gaya "Mujhe kaise jante ho?"
"Mera naam Ishaan Ahmed hai. Yahin Kalp Residency mein hi rehta hoon. Aapne Bungalow No 13 ka naam liya to main samajh gaya ke aap hain, Mr Manchanda, Bungalow ke kirayedaar" Maine jawab diya
"Bungalow ka bhoot kaho" Unhone mere saath kadam aage badhaye "Jiski halat bhoot se bhi zyada buri hai"
Bhoot se bhi zyada buri?" Maine unhen sahara dete hue kadam aage badhaye
"Mere gunahon ka sila bete. Main aaj vahi kaat raha hoon jo maine kabhi khud boya tha. Mere saath ..... "Achanak unhen zor se khaansi aayi aur baat adhuri reh gayi
Mujhe unki halat par kaafi taras aaya. Bungalow mein is haalat mein raat bhar unhen akela chhodna mujhe theek nahi lag raha tha par main is baat ke liye bhi taiyyar nahi tha ke bhoor Bungalow mein main unke saath poori raat ruk jaoon.
"Kahan le ja rahe ho mujhe" Unhone sawal kiya
"Aapke ghar" Maine jawab diya
"Tum un logon mein se to nahi ho na?" Unhone phir mere chehre ki taraf dekhte hue sawal kiya
"Kin logon mein se Sir?" Maine sawal ka jawab sawal se diya
"Vahi jo mujhe nuksaan pahunchana chahte hain" Jawab aaya
Mujhe lagne laga ke ye aadmi shayad pagal hai aur is waqt apne pichha chhudane mein hi samajhdaari thi isliye maine bahut hi aaram se unki baat ka jawab diya, behad pyaar se.
"Maine aapko koi nuksaan nahi pahunchana chahta Mr Manchanda."
Dheere dheere ham Bungalow No 13 tak pahunche.
"Mera khyaal hai ke aapko fauran so jana chahiye" Maine unhen darwaze par chhodte hue kaha.
"Jana mat. Mujhe akele andar jaate hue dar lagta hai. Kitna andhere hai, kitni sardi, kitni khamoshi" Unhen phir se mera haath pakad liya " Ruko thodi der jab tak ke main roshni ka intezaam nahi kar leta"
Tab mujhe dhyaan aaya ke Bungalow mein light nahi thi. Kyunki vo itne saalon se veeran pada tha isliye vahan ka electricity connection hata diya gaya tha aur pichhle 6 mahine se Manchanda us ghar mein bina electricity ke reh raha tha.
"Theek hai main aapko andar tak chhod deta hoon" Maine kaha aur jeb se lighter nikalkar jalaya. Bungalow ke saamne bane garden se andhere mein hote hue main unhen lekar bungalow ke darwaze tak pahuncha. Andhere mein us ghar ko dekhkar main samajh gaya ke kyun usko Bhoot Bungalow ke naam se pukarte hain. Gehri khamishi aur kohre ke beech khada vo makaan khud bhi kisi bhoot se kam nahi lag raha tha. Charon taraf sirf hamare kadamon ki aahat hi sunai pad rahi thi. Meri dhadkan tez ho chuki thi aur main khud bhi kaanp raha tha. Kuchh sardi se aur kuchh dar se.
Manchanda ne dawaza khola aur andar dakhil ho gaye jabkimain vahin bahar darwaze par khada raha. Vo mere haath se lighter le gaye tha isliye main andhere mein khada hua tha. Thodi der baad andar table par rakha hua ek lamp jal utha aur charon taraf kamre mein roshni ho gayi.
Maine ek nazar kamre mein daali. Lamp ki halki roshni mein jo nazar aaya use dekhkar lagta nahi tha ke main kisi bhoot bungalow mein dekh raha tha. Maine Manchanda ki taraf nazar daali par halki roshni mein chehra nahi dekh paya.
"Main chalta hoon" Maine apna lighter bhi vapis nahi liya aur kadam pichhe hataye
"Good Night" Andar se sirf itni hi awaz aayi.
Main bungalow se jaldi jaldi nikalkar apne ghar ki taraf badha. Ye thi meri aur Mr Manchanda ki pehli mulaqat.


To be continued....

 

[Ashu 0000]

Kya ye story complete karoge ya adhuri chhodoge

Isliye ke ye story dusri site pe adhuri hi padhi thi