Update 17
"Muneem, tumko humne ek kaam par lagaya tha. Yaad hai ya naswaar ne sab bhula diya?", Bade mehalnuma ghar ke bahar bane bagiche me chai ki chuskiyan lene ke dauraan apni angrez ardhangini ke sath baithe Sterling sahab ne dwar se bhitar aate apne aalishan taange ko dekha jo patthar ki smatal pagdandi par dhimi gati se chalta hua unke sthaan se 20 gaj dur aa ruka tha. Taangewala sar pe bandha gamcha utaar kar unhe jhuk kar pranaam karne ke baad ek taraf jameen par ukdu ja baitha. Is drishya ko unke sath ye ghaagh muneem bhi dekh raha tha jo kuch panne chai ki mej se utha kar badi kitaab me rakhne ke baad hukum ki pratiksha me tha.
"Ji huzur main poori nishtha se aapke diye kaam par kendrit hu. Kaam ke waqt main kabhi bhi naswaar ka sewan nahi karta. Us ek baar ke liye fir se maafi chahta hu.", Muneem ko jhempte dekh Sterling sahab ki khoobsurat jawaan biwi bhi muskuraye bina na reh saki. Wo itni gori thi jaise mom ko piglane ke baad moorat bana kar jaan phoonk di gayi ho. Baal laalima aur narangipan liye hue jinke sath behad aakarshak neeli neelam si aankhein jo unke videshi vyaktitva ko aur bhi pukhta karti thi.
"Dekh rahi ho Margo, kaise hamare vafadar muneem ji ek saal se us kaam ki maafi maang rahe hai jo inhone duty ke samay kiya tha? Duty ka matlab sirf aur sirf duty. Aaj hume bade shehar jana hai aur wapis aane me waqt lag sakta hai. Itne samay muneem yahi maujood rahenge. Muneem, Madam Margret Sterling ko kisi bhi tarah ki pareshani hone par tumhe dugni pareshani ka inaam milega.", Chai ki pyaali mej par rakhte hue Sterling sahab ne ek choti si kanghi se apni muncho ko sanwarte hue ek najar apni khoobsurat jawaan biwi ko dekha aur fir sar jhukaye khade muneem ko. Adhiktar baatchi angrezi bhasha me he hui thi beshak pati patni hindi ki atchi khaasi samajh rakhte the.
"Hujor ka hukum sar aankhon par. Madam Margret ji ko kaisi bhi pareshani nahi hone di jaayegi.", Muneem jaise sirf muneem he nahi tha. Ghar ke sabhi jaruri kaam-kaaj tak ki jimmedari uske he sar thi.
"Waise kaunsa jaruri kaam diya hai tumhare sahab ne tumhe Muneem?", Margret ke is sawaal par ghabraate hue muneem ne sahab ki taraf dekha toh wo samajh gaye the ki ye insaan unhi ka vafadaar hai aur bina unki ijajat toh wo unki patni ko bhi jawaab nahi dene wala. Ek tarah se dekha jaaye toh ye pati patni ki jaanch ka he tarika tha.
"Ye kaam hum he bata dete hai Margo. Manohar yaad hai?", Sterling sahab ne ye naam jis andaaj me liya tha wo kuch rehasyamayi sa tha aur jaise wo vyakti kuch khaas raha ho inke darmiyaan.
"Atche log hamesha yaad rehte hai aur yaha par pichle 5 saal me Manohar se atcha insaan aur sewak humne nahi dekha. Dukhad haadsa.", Margret ne is se adhik kuch na kaha jaise wo apne shabdo ka chunaav dhyaan se karti lagi.
"Sarkaar ki naukri ke sath usne yaha bhi din raat sewa di thi bina kabhi sawaal kiye. Uska pariwar jyada bada nahi tha yaha jaisa hum pehle bhi bata chuke hai. Humne Manohar ki tamaam jama tankhwaah aur apni taraf se uchit rakam uske jawaan bete ko di thi jo ab apni maa ke sath yaha se kuch dur ek gaanv me bas chuka hai. Manohar ka khudka pariwar tha lekin pehle uske pita chal base aur fir uski maa. Bhai ne sab apne naam le liya tha jis wajah se Manohar ko kuch haansil nahi hua aur na wo insaan aisa tha jo kuch chahta ho apni zindagi me. Margo, humne jhoot kaha tha ki Manohar dil ki dhadkan rukne se mara tha.", Sab batate hue achanak itna bada khulasa karne par Sterling sahab ki biwi ke sath sath muneem ka bhi mooh khula reh gaya. Jabki Sterling saab waise he khamoshi aur gambhirta se in dono ke sath us teesre vyakti ko bhi dekhte rahe jo inse 20 gaj dur ukdu baitha tha, bilkul shaant aur apne aap me khoya hua.
"Itni badi baat chhupane ki wajah darling?", Memsahab ne jo sambodhan diya tha wo sunn kar muneem kanni kaatne laga jaise usko in shabdo ke alag matlab pata the.
"Wajah dhero hai Margo aur sabse jaruri 2 he wajah thi. Kaam ke waqt mrityu hone par jaanch upar tak hoti jis se bahot kuch prabhavit hota humare aur tumhare sath bahot kuch. Dusri wajah hai ki Manohar hamara sabse khaas aur vafadar sewak tha. Pehle uske mata-pita wala maamla aur phir thoda gehraai me jaanch karne par Paatan gaanv se uska rishta saamne aana. Paatan kisi haqdaari me nahi aata kyonki wo apne aap me ek badi samasya hai. Udhar bhi Manohar ki patni wale ghar me bahot kuch hua tha jaisa pata laga aur wo gaanv ek paheli he hai. Hume lagta hai ki ye sab aapas me juda hua ek bahot bada shadyantra hai aur uske tehat he Manohar ki hatya hui. Manohar ko mara gaya tha Margo aur jisne bhi waisa kiya usne ye dhyaan rakha ki jism par kahi bhi chot ke nishaan na bane. Ye bahot pechida maamla hai jo hume apne he boote pata lagana hoga. Muneem ko humne tehkikaat karne me he lagaya hai lekin ye dhyaan rakhte hue ki Manohar ke bete aur biwi ke sath Paatan me iska prabhaav na pade. Waise bhi Manohar ka beta samajhdar hai wo bhi kaafi kam umar se. Ab hume nikalna hoga Margo aur tumhe kahi bahar bhi jana ho toh muneem prabandh kar dega.", Sterling sahab bina kisi ki parwaah kiye apni khoobsurat biwi ke gaal choomne ke sath uth khade hue aur unse pehle wo taangewala vyakti. Jaruri kaagjaat aur kitaab ko unse pehle taange me rakhwate hue muneem ne ek jordaar salaam thoka toh uska bhi kandha thapthapa kar Sterling sahab apne bagginuma taange me sawaar hote hue nikal liye. Margret tab tak hath hilati rahi jabtak dwaar khulne ke baad dobara na band ho gaye.
"Muneem, tumhare sahab ne agar tumhe aisa jaruri kaam saunpa hai toh iska thoda bhi halke me nahi lena. Milna toh hum bhi chahte the Manohar ke pariwar se parantu aisa karke hum galat sandesh nahi pahuchana chahte yaha ke samaaj me. Hamare liye tanga bulwaya jaaye. Tayaar hone ke baad hum aaj bajaar ghumne jana chahte hai.", Margret ke kadam apne aalishan mehalnuma bangle ki aur taraf badhe the ki muneem peeche khada jaise barso se bhari hawa apne fenfdo se bahar nikalte hue ab sukoon me aaya.
'Ek aadmi kya marr gaya dono angrez pagla gaye. Khud toh marenge so marenge par pehle meri maut pukhta karne me lage hai. Paatan hai he manhoos aur us se jyada ye Manohar ka kutumb. Jaane kya paap kiye honge pichle janam me par kuch bhi kaho saale ke naseeb me jaisi lugaai thi waisi ke liye toh insaan kuch bhi kar gujre. Chalo is bahane he sahi par darshan toh honge Manohar ki bewa ke aur mamla jama toh kya pata kismat se.. ummm', khinse niporta wo apni he soch me hansta sa dwaarpal ki taraf badh chala.
.
.
"Badi amma, main Shabri hu.", Yaha Chandan bailgaadi tyaar karke usme apni maa aur dono bhavi sanginiyo ko le kar ghar se nikla tha aur darwaja band karke har duvidha aur samasya par vichaar karne ke liye is ekaant me Jaanki Devi pichli aangan me baithne he ja rahi thi ki 3-4 dastak darwaje par hone se wo aagantuk ka parichaya puchti hui palti. Sushil ki choti behan ki awaaj sunn kar unhone turant darwaje ki saankal kholi.
"Arri kya hua jo aise darwaja peet rahi thi? Teri sakhiyaan toh abhi abhi nikli hai kasbe ke liye aur thoda pehle aati toh tu bhi chali jaati unke sang."
"Aap mere sath chalo badi amma. Wo bhabhi ke peit me joro ka dard uth raha hai aur bhai kasbe me he bharti hai chot aane ki wajah se. Unhe chot aayi hai ye sunn kar he maa aur bhabhi ka bura haal ho gaya. Ab maa toh thik hai jab Darshan kaka bata gaye ki unhone bhai ko dekha aur baat bhi kar li lekin bhabhi bister par haath paanv patak rahi hai. Ye Gulaabo ko bhi abhi jana tha?", Shabri ke paseene se surkh hue chehre aur himmat ko dekhte hue Jaanki devi ne bade he sneh se uske sar pe hath phera aur gamche se uska chehra saaf karti hui bahar se he ghar ka dwaar band karti hui paidal sath chal di.
"Maine teri maa ko chetaya bhi tha ke Sushila ka sahi mahina chal raha hai par wo toh alag he ganana karti hai. Aksar tanaav aur apratyakshit ghatna hone se bacha thoda pehle bhi janam lene lagta hai par chinta karne ki baat nahi hai. Sushila kaunsa pehli baar maa bann rahi hai? 2-2 swasth bachhiya paida kar chuki hai wo pehle he aur dil ki majboot bhi hai. Waise aaj toh vaidh aur us biwi bhi kasbe he hai jitna mujhe pata hai. Teri maa toh sath na de sakegi isliye ghar pahochte he Darshan ki biwi ko bula laaiyo daud ke.", Jaanki Devi he toh is gaanv me har ghar ka aakhir sahara thi jarurat padne par aur yaha toh garbhavti mahila ka mamla tha jisme purush kahi se bhi madadgaar nahi the.
"Unhone he bheja hai ki aapko bula lau. Gauri mere he ghar thi jab Manoj aur Parveen bhaiya sandesha dene aaye the aur baad me Darshan kaka bhi aaye the jinhone bhai se kasbe me mulakaat ki thi. Maa ke liye bahot mushkil hai na badi amma jab 2-2 choti bachiyan pehle se unke paas ho? Na ye Dinu ki sangat me bhai padta aur na itni musibat eksath gale padti. Agle hafte se kheto ki jutaai bhi hai aur udhar bhai apna hath tudwaye baitha hai.", Shabri jitni chahe himmat wali thi lekin sab varnan karte hue uski bhi badi badi aankhon me aansu panap he uthe. Jaanki Devi ne gor kiya tha Dinu ka jikar sunn kar aur yahi toh Gulaabo unhe aksar kehti rehti thi ki wo dhurt insaan hai. Kal bhi uski durgati Gulaabo ne he ki jo uchit tha jaisa kukritya Dinu ne kiya tha uske mutabik. Par wahi shaksh laapta tha ab aur uske hisse ki chot padi bhi toh Sushil ko, bure ka sath dene par.
"Buaai-gudaai ki chinta tu na kar meri bachi. 2 darjan sewak hai mere paas jo khet he sambhalte hai. Bas Sushil ne bahot badi nasamjhi dikhaai ek ghar ka mukhiya hote hue. Gairjimmedarana baat hai jab biwi peit se ho, maa ke ghutne kaam na karte ho aur 2-2 bacho ke sath ek jawaan behan ki jimmedari kandhe par ho. Sushila mehnati aur tu samajhdar nahi hoti toh fir uparwala bhi ghar na sambhaal sakta. Main Phulwa ko tere ghar kaam karne ke liye keh dungi. Bandana jyada daksh hai par uski khudki tabiyat utni behtar nahi.", Shabri ke chehre ko ek baar fir saaf karte hue unhone santvana di. Agle kuch pal bas wo dono he tej kadam leti khamoshi se chalti rahi jabtak ki wo log Shabri ke yaha na pahuch gaye. Aangan me he Sunehari Devi apni dono pautiyon ko liye ek chaarpayi par baithi inki baat dekh rahi thi. Yaha jyada samay vyarth kiye bina Jaanki Devi Shabri ke sath Sushil ke kamre ki dehleej aa ruki. Bhitar ek dari par he Sushila karwate badal rahi thi aur uske sirhane baith kar himmat dene ke kaam Gauri khud kar rahi thi. Uski maa Sushila ke hath pakadti lekin dard me cheekhti Sushila jaise unke bhi bas se bahar he thi.
"Shabri, ja jara rasoi se garam paani kar la aur Gauri bitiya apni badi maa ko bula la. Tum bachiyon se ye nahi sambhalne wali.", Jaanki Devi ne apni laati ek taraf rakhne ke baad wahi jameen par Sushila ke peit ke kareeb baithte hue aadesh diya toh sehmi hui Gauri turant daud chali jaise ajaadi mili ho.
"Seeta, jara ye teil idhar de aur darwaje par chaadar kar de.", Gauri ki maa ka naam Seeta tha jo Jaani devi ke charan sparsh karne ke baad unhe teil ki katori pakdane ke baad pravesh dwar par parda karne lagi. Idhar jaane Jaanki devi ne kaunsi naadi dabaai thi Sushila ki apne teil sane hath se jo cheekhne chillane ki bajaye bas aansu bahati hui unka hath apne dono hatho me pakde dekhti rahi. Seena haath paanv patakne ki wajah se aadha nirvastra tha uska aur kamar par lipti dhoti ast-vyast. Bhare poore sharir ki majboot Sushila is pal me behad dard me dikh rahi thi jiske maathe par dusre hath se sparsh karte hue Jaanki Devi ne lalaat sehlaya aur fir gaalo se behte aansu paunche.
"Himmat rakh beti. Devi maa sab sahi karengi aur teri toh unme pehle he itni aastha hai. Dard ke baad he sukoon ka ehsaas ho pata hai. Ab main aa gayi hu na apni bachi ke paas toh usko darne ki jarurat nahi.", Usko baaton me lagaye hue he Jaanki Devi ne pehle hath se poore peit ki ubhri golaai ki narmi se maalish kar daali. Ab unka hath is tagdi dikhti khoobsurat aurat ki jaangho ko sehla raha tha. Waha ki nasso ko araam pahuchati Jaanki Devi nirantar santvana deti rahi. Is beech Seeta devi bhi unke dusri taraf aa baithi thi aur Darshan Singh ki dusri biwi Geeta Devi, jo Seeta ki he behan thi wo bhi bhitar aa gayi, kapda aur paani ki degchi liye. Unhone he Gauri ko bahar rok diya tha sthiti anusaar. Dono mahilaon ko Sushila ke agal bagal baitha kar swayam Jaanki Devi uske ghutne modd kar unke beech baithte hue apne anubhav ko ek baar fir dohrane me jutt gayi.
"Ab bhabhi ke chillane ki awaajein toh nahi aa rahi Shabri. Tum nahi jaanti kitna mushkil ho raha tha unhe rok ke rakhna. Gulaabo nahi aayi badi amma ke sang?", Kamre ke bahar he kuch duri par ye dono kishori baithi thi aur apne beech ki khamoshi aur chinta ko kam karne ke liye Gauri ne he apna chehra saaf karti Shabri se baat shuru ki. Uske gore gore hatho par lagi chulhe ki kaalikh bata rahi thi ki Shabri jyada chulha chauka nahi jaanti thi aur ek degchi paani garam karna he kitna mushkil kaam tha uske liye. Is maamle me Gauri kahi jyada paripakva thi kyonki wo apni badi aur choti maa ke sath ghar ke kaam-kaaj jyada seekhti thi.
"Dard toh hai unhe kyonki karaahne ki awaaj abhi bhi aa rahi hai. Himmat mili hogi na badi amma ke paas hone se. Chhutki ke paida hone par bhi toh aisi he haalat thi unki lekin tab toh pehle se pata tha par is baar sab achanak he ho gaya. Gulaabo kasbe gayi hai Kavita aur kaaki ke sath. Par wo kaunsa is maamle me kuch kar leti agar yaha par hoti toh. Badi amma hume kabhi shamil nahi karegi aise kaam me. Waise jab tu peit se hogi toh tera haal bhi aisa he hoga Gauri.", Ye aprayakshit neeji humla tha Shabri ka is gambhir samay par aur Gauri aankhe faade tajjub se usko dekhne lagi.
"Laaj nahi aati tujhe jo aise samay par kaisi baat bol rahi hai? Har ladki ka byaah hota hai aur byaah ke baad wo maa banti hai. Main aur tum bhi toh paida ho kar he duniya me aaye hai. Baaki main abhi byaah nahi karwa rahi toh tu ye apne baare me he soch.", Shabri ko toh aadhi adhuri jaankari Sushila bhabhi se he mil chuki thi jo vartmaan me sthiti niyantran me dekhte hue ye ek aur baat keh uthi.
"Tere byaah ka suna hai tabhi toh tujhse kahi nahi toh main bhala kyun kehti. Ab jo mujhe kisi aur se pata laga hai wahi baat main Gulaabo aur Kavita ko batau toh kya wo dono tumhe tana nahi dengi? Pakki saheliyan hai na hum chaaro tab bhi tumne is baat ka jikar nahi kiya aur ulta abhi bhi bol rahi ho ki tum abhi byaah nahi karwa rahi. Main dua maang lu kya tumhara byaah deri se hone ki?", Ab Gauri ne sakpakate hue apne aaspas dekhne ek baad ye antim baat sunn kar hatheli Shabri ke hontho par rakh di. Bhitar se dabi dabi karahne ki awaajein jaari thi lekin yaha jaise kuch alag he gehra maamla jam chuka tha. Naam ki tarah doodh si gori Gauri ke mulayam hath apne mooh par lagte he Shabri ne usko choom bhi liya. Gauri ki najre sharam se jhukti chali gayi apna raaj pata lagne par aur uske baad sakhi ki aisi harkat se.
"Kuch pakka nahi hua hai abhi jo main batati. Aur mujhe bhi jyada nahi pata kyonki pita ji ne badi maa aur meri maa se kaha hai ki wo abhi is baare me thodi salaah lenge aur badi amma ne bhi yahi sujhaav diya ki pita ji pehle sabkuch vichaar kar le aur pehle saavan wale din unhe apna jawaab de. Baba ji ki wajah se baatchit shuru hui thi is sab par aur tum bhi koyi doodh ki dhuli nahi ho jo mujhe tana maar rahi ho. Tumhari maa bhi kal mili hai baba ji se. Maine toh isliye charcha nahi ki kyonki tumhare aur mere liye jiska chunaav ho raha hai wo insaan ek he hai. Agar tumhari maa ne swikaar kiya toh fir main tumhare liye apne pita ji ko taal dungi. Isliye kaha tha ke mera byaah abhi nahi hoga. Main apni sakhi ki khushiyon ko jyada maan deti hu.", Matlab saaf tha ki saral aur niswarth Gauri yahi samjhi thi ki Chandan ka rishta un dono me se kisi ek se he ho sakta hai aur agar Sunehari Devi haan kar deti hai Shabri ke liye toh wo apne pita Chaudhari Darshan Singh ko mana kar degi, jinse pehle poocha gaya tha Chandan aur Gauri ke liye.
"Tumhari aur Kavita ki samajhdari ek jaisi he hai Gauri. Bura matt maan na lekin ho toh tum bhi uske he jaisi mandbudhi. Arri tujhe kurbaani dene ke liye kisne kaha aur ye baat kisne kahi ki dono me se ek ka he vivaah hoga unke sath? Kaka ne samay shayad isliye manga hai kyonki badi amma ko hum dono he pasand hai unke naati ke liye. Matlab jaisa kaka ki 2-2 biwi hai, tumhari maa aur badi maa waise he hum dono.", Gauri ka mooh ab toh pehle se bhi adhik khula reh gaya tha ye poori baat sunn kar. 2 ladkiyon ka vivaah ek he vyakti ke sath wala maamla tha ye aur jaise poori baat toh is se bhi adhik chaunkane wali thi jis wajah se na sirf Darshan Singh ne samay manga tha balki Sushil ki maa ne bhi wahi kiya tha kyonki unhe bhi iski charcha apne bete se karni thi. Yaha aage kuch aur baat hoti us se pehle he Sushila ke jor jor se cheekhne ki awaajein sunaai padi aur kuch pal baad sab shaant.
.
.
Saaf samtal aur chhayadar raaste par bailgaadi haankne ka aanand uthata Chandan reh reh kar bagal me he baithi Gulaabo se baatchit kar leta jo usko kasbe ka rasta batane ke sath beech me kahi kahi dikhte vann aur kache pakke gharo ke baare vistaar se batane lagti. Aaj badi amma ke kehne se he Gulaabo ne sar pe audhni bhi li thi aur aasmani rang ki kurti ke niche gottedar ghaghri bhi pehni jaisa wo kabhi nahi karti thi. Aankhon me kaajal aur thuddi par najar se bachane ke liye till jaisa chota sa teeka. Hamesha chanchal aur beparwaah si rehne wali Gulaabo ki shaukhi dekhte he banti thi is naam-matra ke parivartan se. Aaj ek purn yuvti si dikhaai padti hui wo Chandan ko baar baar apni aur aakarshit kar rahi thi ya Chandan swayam uski taraf jhuk raha tha.
"Aur kitni samay lagega Gulaabo kasbe pahuchne me?", Pichle hisse me naram gaddi par Kavita ke sang baithi Anuradha ka dhyaan bhi barbas jata apne bete par jo filhaal uske sath koyi baatchit nahi kar raha tha, dhyaan raste aur Gulaabo par hone ki wajah se. Wahi Kavita bhi thik Gulaabo ki tarah tyaar ho kar apni bhaavi saas ke sath he simit thi jisne ab kahi aage dhyaan diya jab Anuradha ko Gulaabo se baat shuru karte dekha.
"Pahoch he gaye hai kaaki. Ye idhar se bas saamne aur bajaar-haat shuru. Par anaaj mandi me hamare kaam ka kuch nahi hai toh uske aage he jana hai hume.", Gulaabo ki baat uchit he nikli jab is tiraahe se bailgaadi chaudi raah par mudi toh kuch pakki dukaane aur dusri taraf se aati ghoragaadian, bail, aur paidal chalte log najar aane lage. Chandan saamne dekhta bailgaadi hanktra raha, bajaar ki chehal pehal par bhi dhyaan dete hue aur beech beech me Gulaabo ke khoosburat chehra niharte.
"Maa ne anaaj mandi se bhi toh thoda samaan laane ke liye kaha tha. Shayad Kavita ko parchi bana kar di thi unhone. Hum teeno ko waha chhod kar Chandan he samaan le lega toh samay bachega.", Anuradha bhi inke he samaan kurti aur ghaghri ke sath audhni liye thi jaise dono yuvtiyon ki badi bahin wahi ho. Par uska ye kehna ki wo teeno ko mahilaon wale bajaar me chhod akela chale jaaye wo Gulaabo ko nagawaar gujra.
"Bhai, jara yahi roko gaadi.", Gulaabo ne toh jara bhi samay ganwaaye bina raste ke kinare gaadi rukwate hue parchoon ki us badi dukaan ke bahar khade ek palledar vyakti ko awaaj di jo bade wajan wale kaante par tulaai kar raha tha.
"Suno kaka. Mutalli jara parchi de... Haan ye samaan likha hai is parchi par aur isko lala Ghanshyam ji ko de dijiye. Keh dena ke wo sab tyaar rakhe jaisa likha hai isme aur wapsi me lautne par hum ye lete jaayenge. Jaanki Devi ji ko jaante ho na? Badi amma ke ghar se hai hum.", Wo vyakti apna maila kurta gamche se dhanpte hue hath jodd kar haami bharne ke baad Gulaabo se kaagaj le kar Chandan ko dekhne laga.
"Chote maalik hai?"
"Chandan.. Chandan Singh aur koyi chota ya bada maalik nahi kaka. Hum log aate hai thode he samay me.", Gulaabo ne bhi hath hila diya tha us vyakti ko jiske sar par gine chune he kesh the aur bhari jism ke upar atche vastra. Wahi tha is jagah ka maalik Lala Ghanshyam. Palledar bhi turant unki he taraf chal diya paseene me bheege vastro sahit.
"Aise shobha nahi deta Gulaabo kisi ko bhi awaaj de kar bulana aur jaane wo kaisa samaan de hamari peeth peeche. Main Chandan ko jyada samay ke liye toh nahi bhej rahi thi agar tumhe is baat ki chinta hui ho toh.", Anuradha swayam he jawaab de rahi thi jo uske mann ka sach tha lekin pratiuttar me waisa jawaab bhi nahi mila.
"Kaaki, ye lala ji se badi amma ki barso ki pehchaan hai. Karja bhi liya tha inhone jab inka samay thik nahi tha aur aksar toh ye khud he ghar samaan bhijwa dete hai ya dene aa jaate hai samay lagta hai toh. Bhai ko bhejna na bhejna farak nahi karega. Inhe kaunsa pata lagega ki masaale shudh hai ya saamagri jaisi likhi hai wo wahi hai jo lala ji denge. Vishwas bahot jaruri hai aur tab toh kahi jyada jab saamne wala pehle se aapka shubhchintak ho. Aap nahi thi jab badi amma ko bimari ki wajah se agle sehar bharti karna pada tha. Tab yahi lala ji samaan dene aaye the apne ghar aur bina deri kiye badi amma ke sath mujhe aur mutalli ko liye aaye the waha. Haspataal.. haan waha vaidh se bhi bade bade aadhunik vaidh the badi amma ka upchaar karne ke liye jinhe sab daakdar (doctor) bulate hai. Badi amma aise thodi ne yaha bhejne lagi aapko aur hume.", Gulaabo ne toh bolti he band karwa di thi Anuradha ki jo ye sunn kar aatmglani se bhar uthi ki uski maa ko upchaar ki jarurat bhi padi tab unke paas koyi majboot sahara tak nahi tha.
"Ye kabki baat hai?"
"Jaane do kaaki. Aap iska jikar matt karna badi amma se nahi toh phir meri khair nahi. Unhe peela jwar hua tha aur pehle sahi upchaar nahi mila pehchaan na hone ki wajah se isliye pareshani hui. Ho gaye is ghatna ko 3-4 baras parantu aap badi amma se bhool kar nahi kahengi iske baare me. Wahi kehti hai ki insaan wahi kehlata hai jo bhale he aapki khushiyon me shaamil na ho parantu dukh me jo aapka sahara bane us jaisa sacha koyi nahi. Bhai, ye tumhari taraf jo rasta ja raha hai.. ye phalo aur mewo ki dukaane hai. Is se aage he manihaari aur suniyare hai. Aur bagal me he vastro ki haat dukaan jaha sabhi vastra uplabdh rehte hai. Waha par koyi na koyi mard toh hona chahiye na kaaki.?", Ye mard wali baat apni taraf se lagate hue Gulaabo ne chupke se Kavita ki jaangh par choonti kaat di jo iska aashaya samajhti hui laal ho chuki thi. Anuradha toh beeti baaton me he khoyi rahi jab tak Chandan ne he pukarne ke sath apna hath aage na badha diya, utarne me madad karne ke liye. Is samay Anuradha ki aankhon me koyi dwand he nahi tha apne bete ke prati aur uska hath thaamte hue usne sharmindgi me najre jhukaye rakhi jabtak kadam jameen par na rakhe gaye.
"Naani ne kaha tha ke khidkiyon par taangne ke liye sooti chaadar le lena apni pasand ki. Unke liye bhi 5 gaj kapda lena hai kurti ka. Main waha peeche Nandi ko chhaya me bandh kar thode phal aur mithaai khareed leta hu.", Chandan ne bhali bhaanti dekha tha un saji hui dukaano ko jaha Kavita ka hath thaame Gulaabo khushi se har vastu dekh rahi thi aur fir wapis apni maa par dhyaan gaya jisne hath chhoda nahi tha abhi tak.
"Mujhe bheed me ghabrahat hoti hai. Tum sath rahoge toh thik hoga.", Ab us chehre par itni saadgi thi ki Chandan mana he na kar saka. Subah wali Anuradha jo vyathit aur gusse se bhari thi uski jagah ek baar fir wahi stree thi jisko hamesha apne bete ka majboot sahara pasand tha.
"Wo thik hai par bhitar sabhi mahilayen he hongi jaha se vastra lene hai aur Gulaabo-Kavita toh aapke sath hai he. Yaha main hu jitne aap apna samaan nahi le leti. Chaliye.", Bailgaadi ko wahi ek taraf khoonte se baandh wo apni maa ke sang he udhar chal diya jaha adhiktar mahilayen ya ladkiyan he thi. Gulaabo ne toh Chandan ke udhar aate he dusra hath pakad kar apni pasand dikha di.
"Bhai mujhe aur mutalli ko na wo wali laali leni hai aur na mujhe wo neeli kaanch ki choodiyan bhi. Haan mutalli ke liye.. Kavita ke liye najar ka dora bhi le lo. Badi amma kehti hai isko najar jaldi lagti hai. Choti maa, aap kaunse rang ki choodiyan lengi?", Gulaabo ka utsaah dekh kar jaha Chandan muskuraye bina na reh saka wahi apni baat sudhaar kar naam se bulane par Kavita ne bhi bade sneh se usko dekha par Chandan ke kareeb aane par wo Anuradha ke peeche ja khadi hui.
"Tumhe jo bhi pasand ha wo le lo aur main choodiyan nahi pehan sakti. Haan ek kaajal aur salaai jarur le lena. Chandan tum bhi madad kar do Kavita ki kyonki choodiyan toh iske liye bhi leni hai.", Der se he sahi par Anuradha me wahi apanatva jaga Kavita ke liye aur usko apne sang lagate hue usne he saamne saji choodiyon me se hare kaanch ki choodiyan aur laakh ke laal rang ke 4 kade pasand kiye jinhe Kavita ne bhi dekha tha par kuch kaha nahi. Chandan kuch asehaj tha apni maa ki baat sunn kar isliye Anuradha ko he chunaav karna pada. Yaha se samaan jaldi liya gaya toh paise dene ke baad agli manzil wo badi dukaan thi jaha maap ke hisaab se kapda aur yuvtiyon ke liye dhoti-audhni ityaadi milte the.
"Aap log bhitar jaiye, main bahar he pratiksha karta hu. Keemat dene ke samay bula lijiyega.", Unhe dukaan ke bahar pahucha kar Chandan ruka toh Anuradha ne is baar virodh na kiya. Aakhir wo karta bhi kya unke beech jaha sab mahilao ke hisaab se tha aur dukaandar bhi pati patni he the. Teeno ke jaate he Chandan ne Nandi ke saamne bora bicha kar hara chara parosa aur tehalta hua aaspas lagi choti badi rehdiyan, dariyon par saja bhanti bhanti ka samaan, mewe masaale dekhta badhta raha. Chandan kuch aage nikal aaya tha jaha najar padi ek taraf gol ghera banaye khadi bheed par uske kuch aage alaav par hathode se aujaar ko peet kar akaar dete luhaar par. Ye wahi Kallu luhaar he tha jaha aaspas ke jyadatar log apne aujaar banwate ya durust karaate the. Bheed ko najarandaaj karta Chandan luhaar ke paas ja pahucha jaha pehle se he ek adhed vyakti ukdu baitha hua apna aujaar hisaab se banwa raha tha.
"Ram ram kaka. Sabhi tarah ke aujaar banate ho ya sirf sudharne ka kaam hai?", Chandan bhi apni ujli dhoti ko thoda uncha uthane ke baad ghutne modta hua kareeb ja baitha. Luhaar ke sath he us vyakti ne ek bharpoor najar is 2 gaj se unche aur tagde yuvak par ki toh ek dusre ko dekhne lage jaise pooch rahe ho ki jaante ho isko.
"Ram ram beta. Sab kushal mangal? Dekho aaj toh naya aujaar nahi ban sakta beta parantu tum agar bata do toh kal tumhe tumhari pasand ka hal, phal, chhini, khurpa, balti, kudaal aur kassi tayaar mil jaayegi. Kuch alag aur khaas chahiye ho toh wo samjha dena. Haan aadhi keemat pehle deni padegi. Waise kaun gaanv se ho? Pehle kabhi idhar dikhaai nahi diye.", Chandan is aupcharik sawaal par halke se muskuraya aur kareeb he rakhe ek dhaardar hal ko hath laga kar dekhne laga.
"Main bhi yahi se he hu kaka aur mujhe aise he 6 phal wale 4 hal chahiye. Sath me 2 kassi jinki hathhi shisham ki ho aur 2 belche waisi he hathhi ke sath. Haan 2 majboot daraatiyan bhi sath he bana do toh baar baar nahi aana padega.", Chandan ne jitna samaan bataya tha usko luhaar ke sath he wo kareeb baitha vyakti bhi sunn kar hairaan reh gaya.
"3 phal wale hal ka daam 2 chandi ke sikke hai beta aur 6 wala kisi badi jameen par he chahiye hota hai jaisa bahot kam he jamindar banwate hai. Uska daam 5 sikke rehta hai. Par tum 4 hal maang rahe ho toh nyuntam daam baithega 15 sikke aur 2 badiya kassi aur belche tumhari bataai lakdi ke sath 3 sikke. Poore 20 sikke lagenge sab samaan ke parantu kal nahi de sakunga itna samaan ek sath. Parso milega aur 10 sikke sauda karne ke sath. Dekh kar toh nahi lagta ke tum koyi maskhare ho.", Chandan ne kurte ki bagal wali jeb me hath ghusa kar mutthi bhar sikke bahar nikale aur dono ko tajjub me rakhne ke sath he poore 20 sikke luhaar ki hatheli par rakhte hue kaha.
"Daam poora le lijiye kaka par aujaar bhi waise he banana ki aapko swayam tasalli ho. Aur khetibaadi me toh kisaan hone ke naate aapse mulakaat hoti he rahegi.", Chandan keemat adaa karne ke baad wahi rakhe matke ko ludhkate hue lauta paani ka bhar kar uncha karte hue peene laga toh is baar us adhed se vyakti ne sawaal poocha jo aur jyada khud ko na rok saka tha.
"Kaunse gaanv se ho barkhurdar? Kallu tumhe batana bhool gaya lekin yaha ek aur niyam hai ki 6 phal wala hal wahi jamindaar rakhta hai jiske paas 4 bail ho aur aise jamindaar is halke me gine chune he hai. Na toh tum Kotda ke jaan padte ho aur na is kasbe se ho. Main swayam Gwalisar se hu aur aaspas ke lagbhag har jamindaar sahukar seth ko jaanta hu."
"Chandan Singh naam hai mera kaka aur kul mila kar hamare paas 15 bail honge kheti me kaam aane wale, 4 bailgaadi wale aur jarurat padi toh 3-4 khareed lenge. Jameen ka mujhe bhi andaja nahi hai kitni hogi par main us poori jameen ki jutaai karke rahunga jis wajah se mujhe kam se kam itna samaan toh chahiye he hoga.", Abhi bhi Chandan ne poora parichaya na diya tha in dono ko aur khaali lauta wapis ghare ke upar rakhne ke baad mooh saaf karta wo uthne laga toh dobara pooch liya.
"2 din baad aa jaun na kaka?"
"Haan beta jab tumne uchit daam pehle he chuka diya hai toh Kallu is baar aujaar bhi aise bana kar dega ki tum poora gaanv jaut dena par wo dhokha nahi denge. Waise kaunse gaanv se ho?"
"Paatan se hu kaka, swargiya Saaheb Singh ka naati. Chalta hu, abhi aur bhi kaam hai yaha bajaar me.", Unhe bhochakka chhod kar Chandan apna gamcha gale me lapet kar sadak se dusri disha me ho liya jaha aur bhi log usko dekh rahe the. Atche vastro ke bawjood na usne kahi swarn kangan pehna hua tha aur na gale me motti janjir jaisa aksar jamindaaro ke jawaan ladke ya swayam raees log karte the.
"Arre Kaalu ye badi amma ka naati tha? Aa kar toh aise baitha tha jaise koyi naya naya sahukar ho ya chota mota jawaan kisaan. Mujhe he samajh jana chahiye tha ke itna kheti baadi ka samaan bhala aur kaun lene aayega. Sabke paas toh pehle se hai toh wo sirf marammat ko he laate hai ya ek aadh naya le liya toh le liya. Hmmmm.. kadd toh apne nana se bhi uncha tha ladke ka."
"Jimidaar ji, hume pata rehta toh kya keemat ki baat karte? Upar se daam thoda jyada bata diya lekin ye toh mol bhaav kiye bina he poora pehle he pakda gaya. Ab majaak me keh toh diya ke chaahe poora gaanv jaut de lekin baat galat saabit hui toh badi amma swayam padhaarengi. Chalo koyi baat nahi jab chunoti le he li hai toh Kallu bhi ab tak ke sabse behtar aujaad tyaar karega. Lo aapke sabhi aujaar durust ho gaye.", Thaile me paani se nikaal kar aujaar bharne ke baad Kallu luhaar ne ghare ko hath lagaya toh yaad aaya ki Chandan toh wahi se paani pee gaya jaha hath lagna bhi aur jamindaar apmaan samajhte the. Kuch khaas toh Kallu ne bhi dekh he liya tha is naujawaan me jo apni he dhun me chalta hua wapis bailgaadi tak ja pahucha tha. Aaspas jaanchne ke baad wo usi manihaari ki haat par gaya aur apni marji ka samaan khareed kar usko thaile me band karte hue bailgaadi ke nichle hisse me rakh diya. Tab tak Gulaabo bhi usko bulaane aa pahuchi thi jisne kuch nahi dekha.
"Idhar sab le liya hai aur bas sunaar kaka ke waha jana hai. Daam adaa kar do uske baad bahar nahi rukna waha.", Chandan ne ye aadesh aise swikaar kiya jaise wo sachmuch he uska sewak ho. Sar jhuka kar hath hilate hue wo bhi yaha beech raah. Gulaabo bhi hansti hui uski baah par mukka jadd kar sath liye bhitar chali gayi. Yaha se sab nibta kar Chandan ne sunaar ke idhar dono ladkiyon ko paayal dilwane ke sath apni maa ko bhi vivash kar diya tha 4 sone ki choodiyan aur paayjeb lene ke liye. Jis tarah se Chandan ne swayam Anuradha ki kalaai me wo choodiyan pehnaai thi uska aisa karna Anuradha ke mann me gehra asar kar gaya. Kavita aur Gulaabo jaha poore raaste phuli na sama rahi thi, khaas kar Gulaabo jo ijhaar karne me samay nahi ganwati thi wahi Anuradha bas apne me khoyi rahi jabtak wo dopehar khatam hone se pehle ghar na laut aaye.
.
.
"Badi amma Sunehari kaaki ke yaha hai kaaki ji aur unhone mujhe yaha bhijwaya tha ke aate he sandesha de du. Sushila bhabhi ke beta janma hai aur badi amma ne kaha tha ke chote maalik waha pahuche ghar aate he. Unhone bhojan karna hai toh main thoda aur intjaar kar leti hu.", Ye Laali thi, Bandana ki bitiya jo is ghar me bhi pashuo ki dekhbhal ke liye aane lagi thi.
"Bhojan toh kasbe me he kar liya tha hum sabhi ne aur wo abhi hath mooh dho le toh tumhare sath chale jaayenge. Badi amma ne mere liye nahi kaha ki mujhe sath aana hai? Shabri bua bani hai toh khushi me mujhe bhi toh nyota dega."
"Saaf mana kiya hai unhone ki tumhe toh bilkul bhi nahi le kar aana. Sirf chote maalik he akele aaye waha.", Laali ne aankhen nachate hue jab ye baat sunaai toh Gulaabo ne mooh bichkaate hue pichle aangan ka rukh kar liya. Anuradha toh ghar aate he apne kamre me band ho chuki thi jabki Kavita vastra badalne upar wale kamre me thi. Kuch samay baad Chandan Gulaabo sang lauta aur bail ke paani peene ke baad usko dobara gaadi me bandh chal diya Sushil ke ghar jaha uska khaas intjaar ho raha tha us shubh ghari me jaha Sushil pattiyon me lipta ghar pahucha toh ek putra ka pita ban ne ki khushi me dard bhul chuka tha. Idhar Chandan apne sang Laali ko liye nikla toh udhar jachha bachha ki sthiti ko jaanchne ke baad Sushila ki chhati se uske navjaat ko laga kar Jaanki Devi Seeta Devi aur Geeta Devi sang aangan me baithi thi. Hath mooh dhone ke baad wo thakaan mita rahi thi aur chulhe par chai rakhti Gauri ko niharti bhi rahi. Shabri laddu lene nikli thi sabka mooh meetha karwane aur yahi waqt tha jab hath par lakdi ki fatti aur kapda bandhwaye ladkhadata hua Sushil dakhil hua tha Darshan Chaudhary ke sang. Apne bete ke paida hone ki khushi me sabse pehle wo apni biwi aur aulaad se mila tha. Ab Jaanki Devi ke paanv chhone ke baad sabke beech jaha Darshan Singh ne he usko aangan me khaat par litane ke baad khud moodha grehan kiya.
"Bada he shubh din hai Sushil beta jo tum salamat ghar laute ho aur ghar me waaris ka janam hua. Dekh lo isme bhi hamare paas badi amma he hai jinhone mushkil ki ghari me na sirf bahu ko sankat se nikala balki itni athak mehnat karke Sushila bahu ko bhi niyantrit rakha aur bache ki bhi uchit suraksha ki. Suna maine Seeta se ki pareshani hui thi par ab dono sukoon se hai.", Sushil toh apraadhbodh se grasit kuch kehne ki haalat me he nahi tha siwaye mook dhanyawaad ke. Uske param mitra ki wajah se jo jhatka usne khaya tha us se ubarne me waqt lagne he wala tha.
"Ye toh ghar ke bado ka farz hota hai Darshan ki wo pariwar ko sambhale. Maine kuch alag nahi kiya bas thodi umar badh rahi jis wajah se kuch pareshani hui. Nahi toh ye Gauri ke samay daai bhi hatt gayi thi par mujh par Geeta ne bharosa jataya kyonki ye maanti hai mujhe. Aapsi vishwas he rishtey ko majboot banata hai jo Sushila se bhi mera utna he hai ab. Dekha jaaye toh auhde ke hisaab se ye badi amma padd-paute wali ho gayi aaj.", Jaanki devi ne yaha bhi Gauri ka jikar kiya aur uske baad Sushil ke pariwar me apna sangyaan yaad dilaya toh Sunehari Devi ne aage badh kar unke dono hath thaam kar maan bakshne ke baad ek garam shawl unki goad me rakhi. Gudd, chandi ka sikka aur khopra upar rakhte hue.
"Geeta aur Seeta yahi hai toh main apna fainsla suna he deta hu badi amma. Ye meri bitiya jo aapko chai paros rahi hai, jiwan bhar ab din ki chai ka jimma iske he hath hoga. Aitraaj ho toh mere ghar me meri dono patniyon ko purn adhikar hai apna paksh rakhne ka. Shabri bitiya bhi meri samaan putri hai lekin abhibhavak haq Sunehari bhabhi ke sath he Sushil bete ka hai toh wo jaisa thik samjhe kare.", Idhar Gajju halwaai se laddu ka lifafa liye Shbari bhitar aayi aur udhar Gauri chai ka kop Jaanki Devi ko pakda rahi thi jab Darshan Chaudhary ne apna fainsla sunaya. Jaanki Devi ne wahi vastra aur shagun Gauri ka haath thaam kar usko supurd kar diya, sath he apni tarjani ungli se sone ki anguthi Gauri ki usi ungli me pehnaate hue.
"Ye chai bahot mehangi padi hai mujhe Darshan lekin unki (Saaheb Singh) nishaani sabke saamne saunpte hue main bhi prann karti hu ki Gauri ke jiwan me kabhi dukh aaya toh wo mujhe naseeb ho. Aaj se ye meri hui.", Shabri ne ye suna aur wahi khadi khadi apalak apni maa ko dekhne lagi jo jyada dur tak dekh toh nahi sakti thi par apni beti jarur dikhi unhe. Sushil us sthithi me nahi tha ki wo kuch samajhta ya usko pata hota ki asal baat kya chal rahi hai.
"Mooh toh meetha karwa Shabri sabka. Tu bua bani hai aur dekh tera bhai bhi laut aaya, bhagwaan ki daya se haalat utni kharaab nahi jaisi Manoj bata raha tha.", Shabri ko toh jaise apne us bhai se kuch lena dena he nahi tha jisne kuch samay pehle he bhai behan ke rishtey ka anaadar kiya tha. Rukte chalte wo jab Jaanki Devi ke saamne pahuchi toh himmat he jawaab de gayi. Aankhon me paani ubharne laga aur udhar dwaar se Laali ke sang Chandan bhitar prakat hua.
"Pooran se kaha tha maine ki uski beti mere ghar ki bahu banegi aur ye teri maa gawaah hai Shabri. Baat chahe kaise bhi nikli thi us waqt lekin ab pehle tera mooh meetha mera naati khud karwayega. Chandan.. Apni hone wali biwi ka mooh nahi meetha karwaoge bua bann ne ki khushi me? Tumhari teen saas aur ye bade sasur bhi hai jinka aashirwad lena hai iske baad.", Ye toh jaise jyadatar ke liye kisi bhuchaal sa tha, khaaskar Sushil aur Laali ke kareeb khade Chandan ke.
"Aage badho damaad ji is se pehle ki Shabri bitiya ko pallu lene ka aadesh ho. Iske baad seedhe milna nahi hoga ab tumhara Gauri aur Shabri sang.", Chandan toh Darshan Chaudhary ki baat ko sunn kar swachalit sa aage badha par khaat pe lete hue Sushil ki dhadkan itni badh gayi ki wo isko ek bura swapan samajhte hue chakshu band kar baitha.
"Ye meri sabse choti bahu ke liye. Sunehari, Shabri ke kal mehandi lagwa dena. Aaj toh sootak hai isliye munasib nahi. Shagun kal dono he ghar mera naati aur iski maa le kar pahuch jaayenge. Tithi nikalwa lena. Aamantran dur dur jaayenge toh ek maah ka samay jaruri hai.", Ye Sushil ka swapan nahi tha balki satya tha jaha uski manchaahi muraad kabool hone ke bajaaye uske saamne he kisi aur ki hone ja rahi thi. Ab usko fainsla karna tha ki wo khilafat kare ya sath jaaye.
Copyright to enigma203
Join Our
Discord Server
For Daily Updates
.gif "friends :friends:")
update
update
Please bhai update de do
