Update - 4
Sab ko lag raha tha ke Mai ammi se gussa hokar bahar nikal gya tha. Ghar se mai aur saad mamu lagbhag 1 km dur aa gaye the aur abhi tak dono me se kisi ne baat ki shuruwat nahi ki thi. mujhe pata tha mamu kuch nahi bolenge aur chupchap mere sath chalte rahenge, jab tak mai chalta rahunga.....
" mamu aap jao mai aa jaunga thodi der me....." maine unki taraf dekha toh unhone mujhe ek smile paas ki... jaise keh rahe ho ki beta mai toh tere sath hi chalunga...
" chal aaja, ice cream khate hai aur wahi baat karenge " mamu ne mera hath pakda aur mujhe us taraf le jane lage...
" mamu mera mood nahi hai........." maine ek baar koshish ki shayad mamu mujhe akela chhod de lekin nahi.....
" arey koi na mujhe comapany hi de dena, itna toh kar hi sakta hai apne mamu ke liye " hum dono samne us shop me chale gaye jo mere bachpan se yahi par thi aur hum hamesha yahi aate hai. Saad mamu hamesha mere sath ek dost ki tarah rehte the aur mai bhi unke sath utna hi frank hu aur apni sare bate share karta hu. Jabki baki sab mamu ke sath mera baap bete wala rishta jyada tha. Qasim mamu bhi frank the par saad mamu jitne nahi........Hum dono ke bonding alag hi level par hai....mujhe bhi unke bahut sare kand pata hai jaise dosto me hota hai.....
" mamu aaj tak ammi ne kabhi mere sath aisa nahi kiya, chahe kitni hi badi galti kyu na hui ho...... " 5 min me Hamara order aa chuka tha lekin maine uski taraf dekha tak nahi....
" arey kabhi kabhi ho jata hai, wo aaj thoda pareshan thi, isliye tujh par gussa ho gayi " mamu ne mujhe samjhana chaha taki mai unse kahi asli wajah na puch lu
" nahi mamu, wo kabhi aisa nahi karti. Chahe sab par gussa karle par mujhe kuch nahi kahegi aur jaha tak mujhe lagta jo bhi baat hai pakka mujhse related aur aapko bhi pata hai " Mamu ko lag gaya ki mai jawab sune bina nahi manunga, Toh hum dono shop se uth kar bahar aa gaye. Mamu mujhe apne sath lekar paas me hi ek garden me aa gaye aur wha ek shant jagah par baith gaye.
" Dekh mai tujhe bata toh raha hu lekin abhi ye baat kisi ko mat batana aur jahir bhi mat karna ki maine tujhe kuch bataya hai. Nahi toh Omar bhai meri waat laga denge " Phir unhone mujhe jo bhi ab tak hua sab bata diya. Kaise mere dada aur taya meri shadi Rubina aur Ambreen se karana chahte hai. Mamu ne bataya ki abhi ammi ko keval ek ke bare me bataya hai, jab dono bare me pata chalega tab wo kya karegi.......Mai toh ye sab sunke sadme me hi chala gaya,
" mamu meri shadi aur wo pagal rubina baji se , unko bali ka bakra mai hi mila tha. Aur ek se shadi ka toh chalo samajh me bhi aaye par ye 2 shadi wala kya natak hai... " meri halat dekh kar mamu has rahe the .
" arey log toh khush hote hai shadi karne par aur tujhe toh itni khubsurat biwiya milegi wo bhi do-do" mamu mera majak bana rahe the , unko bhi pata tha ki rubina aur meri bilkul nahi banti thi. Wo hamesha mujh par rob jhadne ki koshish karti thi. Lekin mai tehra Maha ziddi insan, jo kisi ki nahi sunta....... Isliye uska aur mera 36 ka nahi 72 ka aankda hai. Na wo mujhe pasand karti hai aur na mai use. Ambreen baji phir bhi thik......
"mamu pls yaar, ye koi majak wali baat hai kya........yaha logo ki ek shadi nahi hoti aur wo meri 2 kar rahe hai."
Mamu haste huye " Tujhe pata hai tere dada ne kitni shadi ki hai"
" unki toh sirf ek hi shadi huyi hai, Jaha tak mujhe pata hai.?????" Mai mamu ko sawaliya najro se dekh raha jasie mai kuch miss toh nahi kar raha hu..............
" yaar tere dada ke khandan ki history bahut hi pechida hai, jaha tak mujhe pata hai teri jo wo dono dadi hai unka nikah bhi tere dada ke bhai ke inteqal ke baad unse ho gaya tha " Ye baat sunkar mujhe laga shayad abhi mai apne khandan ke bare me kuch nahi pata aur mai wha kabhi itna raha bhi nahi........
" yaar mamu aisa bhi hota hai kya "
"arey aisa keval tumhare khandan jis kabile se belong karta hai, udhar hi hota . Un logo ko humse koi matlab nahi hai. chal ab ghar chal teri ammi pareshan ho rahi hogi. Jab tak tujhe dekh nahi legi roti rahegi. Waise ek baat bata jaha tak mai Zini ko janta hu, wo kabhi tujh par bina baat gussa nahi karti, Tune kuch to kiya hai?????" Mamu aur mai dono garden se bahar nikal kar ghar ki taraf chal diye. Unki baat sunkar maine socha aisa kya kar diya maine ??????? Achanak mere dimag ki batti jali...... Mere chehre ke expression dekh kar Mamu ne ishare se pucha, bata de beta kuch to kand tune bhi kiya hai.
" Wo pichli baar summer vacation me, mai gaon gya. Ammi to mujhe bhejne ke liye raji nahi thi lekin mai jid kar ke chala gaya. Aap us waqt delhi gaye hue the " toh hua aisa tha ammi mujhe kabhi gaon nahi jane deti thi. Shayad unhe darr tha iss baat ki, ye din jarur aayega. Jab ammi nahi maan rahi thi toh mai nani ke paas chala aur unke kehne par ammi ne mujhe 7 din ki permission dedi. Par mai wha 20 din ruk gaya, kyoki mujhe waha acha lag raha tha. Aur mai itne salo me pehli baar gaya tha toh sab mera bahut khyal rakh rahe the toh unke rokne par mai ruk gaya.
" beta kam toh tu bhi nahi hai, apni ammi ko pareshan karne ka ek moka nahi chhorta hai. Wo bhi keval teri hi bato me aati hai. baki pure ghar me kisi ki majal jo uski baat kat de. Sale teri ammi se Nana aur Omar bhai bhi darte hai. Gussa naak pe rehta hai us bandariya ke " Mamu mere gale me hath dalkar chal rahe the. " ye baat to mai pakka ammi ko kahunga. Isi tarah hum dono masti majak karte huye ghar aa gaye.
Idhar mere ghar se jate hi abbu, nana ke ghar chale gaye jaha sab hall me hi baithe aur unko bataya ki abhi ghar par kya hua.................
" Iss ladki ka kya karu mai, Gaon me bhi sabke samne aise hi uth kar chali aayi aur ab bechare par gussa nikal rahi hai" Nani ne pareshan hote huye kaha aur wo sab doude chale aaye, Nana ne nani ko mana kiya ki ammi ko kuch bhi na kahe ........... Ammi hall me sofe par baithi thi aur choti mami unhi ke paas baithi. Baki sab bacche bhi niche aa gaye the. Achanak ye sab hone se sab pareshan the. Thodi der bahar sab ne batein ki, us bare me nahi kyuki bacche yahi the. 10 min baad Nana, nani , Omar mamu aur abbu unke kamre me chale gaye baat karne ke liye...... Omar mamu ne badi mami se dhyan rakhne ko kaha ki koi us taraf na aaye............sab log andar aa gye, abbu aur mamu sofe par, nana ammi ke sath bed par baith gaye. Nani wahi khadi thi aur ammi ko ghur kar dekh rahi thi. Jaise puch rahi ho kya hai ye sab.
" sorry ammi, wo gusse me maine use daant diya, mujhe kya pata tha wo itni si baat par gussa ho jayega. kya mera itna bhi haq nahi us par jo use do baat keh saku " ammi ki aankh bhar aayi toh nana ne ammi ko apne side se gale laga liya....
" tu haq ki baat mat kar, tujhe bhi pata hai wo sabse jyada kise manta hai. aur mai nahi keh rahi use kuch mat keh lekin koi wajah toh ho kehne ke liye...... yu bewajah dantegi toh naraj hi hoga...... aur tu toh aaj tak galti karke bhi kabhi apni galti nahi manti. Subah apne sasural se aise uth kar chali aayi, hamari aur tere shohar ki kitni beijjati huyi hogi. Kya soch rahe honge wo log, hamesha apni manmani karti hai. Kya tere shohar ka koi haq nahi javed par, ya uske liye faisle sirf tu hi le sakti hai "
" lekin ammi, mai....." Ammi ne kuch kehna chaha toh nani ne unhe bich me rok diya
" chup, bilkul chup...... bahut sun li teri baat........Tune subah se apne shohar se baat nahi ki, us se pucha ki aisa kyu kiya usne, kyu wo apne bete ki shadi waha kar raha hai......... Nahi bas faisla suna diya aur uth kar chali aayi maharani ki tarah. " Sab chupchap nani ki batein sun rahe the.
" bas karo tum ho jati hai galti, bacchi hai abhi............." Ammi ko bacchi kahe jane abbu aur mamu khusar phusar karte huye has rahe the, Ammi ne unhe aankhe dikhate huye ishare se kaha aap ko to baad me dekhti hu. Yahi iss pariwar ki khas baat thi, Jo har mushkil me khush rehne ke tarike dhund lete hai.....
" ha.....aap ise jindagi bhar bacchi hi banaye rakhna, aap hi ne sar chada rakha hai iss ladki ko.... kisi ki baat man na toh dur sunti bhi nahi hai" Nani toh nana ki baat par bhadak hi gayi aur ammi ko dekh kar " dekho kaise apne bade bhai aur shohar ko aankhe dikha rahi hai, badtameej ladki "
" aap bhi toh baba ko daant rahi ho " Ammi ki baat sunkar abbu , mamu aur nana teeno jor se hasne lage, ammi ko jaban ladate dekh nani or gussa ho gayi aur marne ke liye badhi toh ammi nana ke piche chhup gayi " babaaa...bachao ammi........." aur ammi bed ke dusri taraf chali gayi. " ya khuda kab is ladki ka bachpana jayega............ " Nani wahi bed par nana ke pas hi baith gayi aur ammi bed ke dusri taraf.....
" Ammi aap ko kya lagta hai, mujhe samajh nahi aata ki kya chal raha, Jab javed summer vacation me gaon gaya tha tabhi mujhe darr tha ke aisa kuch na ho jaye....aur whi hua jo mujhe darr tha " ammi khisak kar nani ke paas baith gayi " Aap sab ne mujhe puri baat nahi batayi. Wo Rubina aur Ambreen dono se shadi karana chahte hai. dono hi us se badi hai lekin problem ye nahi hai ke wo us se badi hai. Agar javed ko koi ladki pasand hai aur wo us se 10 saal badi hai toh mujhe koi paroblem nahi hai. Mai uski khushi ke liye kuch bhi kar sakti hu. Lekin yaha baat hai jabardasti kisi ko ek dusre ke upar thopna. Jaha tak mujhe lagta hai, Rubina ko bhi javed pasand nahi hai, un dono ki kabhi nahi bani. "
"ab kya javed ko apne baap ke ghar bhi nahi jane degi aur tujhe kisne kaha????? Rubina tyar hai shadi ke liye, maine khud baat ki us se aur us par koi dabav nahi hai " ammi ne is baat ko koi jawab nahi diya. " dekh beta, hasan ek acha beta hai aur uski apne ghar taraf bhi jimmedari banti hai. Wo inn riwajo ko hamesha ke liye khatam karna chahta hai aur isliye javed ki shadi waha kara raha hai taki aane wali pidhi ko in sab se jhutkara mil sake, nahi toh hamesha yahi sab hota rahega "
" koi baat nahi ammi rehne do, lagta hai javed keval isi ka beta hai. Mera us par koi haq nahi.....Par apne baki dono beto ki toh kar sakta hu ya uske liye bhi............" Abbu ne ammi ko dekh kar ye kaha aur bahar jane lage toh mamu ne unhe rok liya.
"Mujhe bhi aapke kabile ke riwaj pata hai. Aap apne pariwar ya apne kabile ke kisi pariwar me shadi kar sakte hai toh Aapke kabile me aur bhi toh pariwar hai wha kyu nahi kar dete unki shadi. Kab tak tumhi kurbani dete rahoge. Meri Asma se baat huyi thi, wo log sehrish ki shadi rashid se kar rahe hai. ammi aap batao us ladke ke upar kai murder case chal rahe hai aur sehrish kitni achi ladki hai jisne masters kiya hai. Uski toh jindagi barbad ho jayegi, aisa mai hargiz nahi hone dungi "
" Tumhe pata hai na wo log kya karte hai, aur kitne ghatiya log hai. Waha koi insan kyu apne baccho ki shadi karega. Phir bhi tum aisi baat keh rahi ho. Agar tumhari beti hoti toh tum kya karti " Ammi ki baat se abbu thode naraj ho gaye the.
"Meri beti hoti toh aapko bhi pata hai. wo kya karti..................." Ammi ko abbu ki ye baat bilkul pasand nahi aayi aur baat bigadte dekhkar nana ne baat yahi khatam karna thik samjha.
" Raat bahut ho gayi hai, iske bare me hum kal baat karenge " phir sab log uth kar bahar aa gaye.......
Join Our
Discord Server
For Daily Updates
