Update 220
Maksad (3)
"Ye Gajju toh bol raha tha ke shaadi me ek raat pehle pahoch jaayega. Abhi tak toh uska koyi phone bhi na aaya. Tujhse baat hui kya Inder?", Rameshwar ji ka poora pariwar aur khas khas log XXXX gaanv pahuch chuke the jaha shaam ko he Vishnu ki haldi aur mehandi ki rasam karwayi gayi. Aayojan aur sthiti anusaar sabhi log ek sarkari school me he ruke the jaha niche kamro me gadde aur cooler ki vyavastha ke sath khaane ke liye khule me he bhatti lagwaayi gayi. Mahilayen aur bujurg toh samay par he sone ja chuke the aur Vishnu ko bhi Rameshwar ji apne sath he lete gaye. Ab khuli chhat par Shankar ke sath Narinder, Gulati, Sangwan, Ashok ji aur Bhuppi ki mehfil jami thi. Unhe toh khabar he nahi thi ki Umed aur Arjun mil kar kya karnama karne me lage hai. Haan Rajkumar ji bhi yaha aana chahte the lekin unki mata ji ne badhiya se kaan khinch kar unhe niche apni najro ke saamne he sone par majboor kar diya.
"Purnima chachi ne phone kiya tha yaha pahuchne ke baad. Bol raha tha ke wo subah hone se pehle pahuch jaayega aur agar thodi deri hui bhi toh bade bhai ki wajah se he hogi. Ab Sambhav bhai ko leke aana toh tedha kaam hain thoda. Waise Daleep bhai kaha reh gaye? Le Mehul, tu peg bana bhai sabke.", Ek gatte ke dibbe se kaali bottle nikaal kar Gulati ko dete hue Narinder ne apne joote khol kar ek kinare rakhne ke baad wahi hath dhoye aur gadda khinchte hue sabke kareeb he bicha liya. Pehle se sabhi log gaddo ka he ghera banaye the. Gulati ne bhi samay vyarth na karte hue bottle ka dhakkan khol kar sabke jaam banane shuru kar diye. Bhuppi toh abhi se alsaya sa dikh raha tha.
"Hume bhi milna hai bhai in bade bhai sahab se. Waise jiska byaah ho raha hai usko he chacha ji ne aaj band kar liya apne paas. Waise Ruchita (Ruchi) kuch pooch rahi thi Shankar. Byaah me toh wo kal he aayegi Annie aur Marina ke sath lekin usne mujhse kaha ke main he ye baat karu.", Param Sangwan baat ko khul kar keh nahi pa raha tha aur idhar Shankar ke dimaag me jaane kya chal raha tha jo uske badle jawaab Narinder ne diya.
"Tum kabse pooch kar kehne lage ghodu-chand? Arre Vishnu bhi aaj apne bapu ke he paas rehna chahta tha isliye papa ne Shankar ko daat pilaai ki ye usko jabaran na le jaaye. Hamara kya hai, jyada bhi chadhi toh farak nahi padega lekin Vishnu ko samay lagta hai kyonki roj wala system toh uska hai nahi sharaab ka aur upar se uski aastha bahot hai dharam karam me. Apni honewali biwi ke sath phere lete samay wo shudh rehna chahta hai aur hum sammaan bhi karte hai uski itchha ka. Daaru party toh waise bhi honewali hai jab parso Karamjit bhabhi apne yaha meetha banayegi aur Vishnu rahega hamare sath khet pe. Tu bata kya keh rahi thi Hitler (Ruchi) devi? Shankar se toh wo dabka maar ke baat karti hai, itni nautanki tum dono mil kar kyun karne lage aaj?", Narinder ka kehne ka andaaj he aisa tha ki waha baitha har shaksh hanse bina na reh saka. Ek baniyaan dhoti pehna halki taund wala rasoiyaa 2 badi plate me salaad aur daal sabji liye yaha aaya aur uske peeche he dusra yuvak baraf ki silli todd kar tukde ek jug me bhar kar yaha rakh ke wapis nikal chala. Gulati he paani aur baraf bharne ka kaam kar raha tha.
"Inder yar, maamla aisa hai ki isme ijatt se he baat ki jaaye toh sahi rahega. Ruchi ne apni he koyi baat kehni hoti toh wo sochti he nahi. Baat uske devar Manjeet se judi hai. Tumne bhi shaadi me dekha he tha usko aur jabse wo wapis apne ghar gaya hai, lagbhar har roj phone aata hai uska apni bhabhi ke paas. Kal Ruchi ne aakhirkar mujhe he bata diya ki Manjeet.. Uska devar Akshara ko pasand karta hai lekin wo chahta hai ki pehle Akshara ke pariwar ke bade uski jaankari le le waha ghar pariwar dekh kar. Ab Ruchi toh shehar me rehti hai jabki uska devar jamindari sambhalne ke sath pashuo ka farm chalata hai. Main khud he mana kar sakta tha kyunki Akshara bitiya padhi likhi bachi hai aur haal he me toh usne Chandigarh me daikhila liya hai. Par mera naa kehna anyatha liya ja sakta tha isliye agar Shankar khud ye kare toh behtar rahega.", Ab kahi Shankar ka dhyaan in baaton par tha aur Sangwan ki kahi poori baat usne bina toka-taaki ke suni. Narinder ko jaise wajah pata thi ki Akshara ke maamle me Param kyun Shankar se baat kar raha hai.
"Aisa nahi hai ke isme seedhi na bolna uchit hoga. Akshara padhna chahti hai kyonki wo apne paanv par khade hona chahti hai. Manjeet apne bade bhai jaise beshak jyada padha likha nahi aur na wo desh videsh me company sthapit karke pariwar se dur rehne wala ladka hai Jaat. Umar badhne ke bawjood wo gaanv me apne maa-baap ke sewa karne ke liye unke sath rehta hai. Jameen ke maamle me wo kattar hai jo pehle se raees hone ke bawjood khud mitti me mitti hota hai.. Maine dekha tha usko jab hum log gaanv gaye the Chacha (Dharamveer Sangwan) ke sath unke. 100 majdoor lagaane ke bawjood Manjeet khud unke beech reh ke kaam dekhta hai. Murraah paalan ka risk liya lekin 3 saal me he wo apna naam bana chuka hai. Bolchal me beshak thoda theth hai lekin aise toh jyadatar log hai hum me se. Tu khud he college me kade-vade, aathe, inne binne karta rehta tha aur aaj bhi kabhi kabhi tu waise he bolta hai. Mujhe harj nahi, ulta mujhe Manjeet jaise insaan jyada pasand hai jo pariwar ki mehta samajhte hai aur bade chhote ka farak bhi. Haan fainsla Akshara he legi aur wo haan bhi kehti hai toh padhaai poori hone tak shaadi ke liye intjaar karna padega. Waise us ullu ne Akshara kaha dekh li? Shaadi me dekhi bhi hogi toh kaise pata chala uske baare me? Ruchi ne bhi mujhse he baat karne ka bola?", Ab Shankar bhi baat pakadne laga tha aur ye dekh kar Ashok ji bhi apne in bade saale sahab ko tareef se dekhne lage. Sangwan jarur sar khuja raha tha kyonki ye toh usne bhi nahi socha tha ke ye maamla jama toh jama kaise.
"Chhod sar khujana aur tu peg laga ghodu-chand. Ab Ruchi aur Manjeet ko jisne bhi Akshara ka bataya hoga wo apne is doctor se waakif he hoga aur bahar wala toh nahi. Is Bhuppi ki nalki kyun band hui padi hai?", Narinder ne mahol ko he badal diya tha sustate Bhuppi par seep laga kar.
"Is Bhole bhandari aur panjabi se toh na dosti bhali na dushmani. Dono ko pata hai ke mere beer na pachti aur pee bhi li toh peit aur sar bhari ho jata mera. Upar se yaha tumhari baatein Surender Mohan Pathak jaisi uljhan se bhari. Main toh ye peg leke bhai sone he chala. Sabne 6-6 beer dakaar rakhi wo bhi daaru mila kar. Abhi roti ke baad phir se mehfil saja li.", Bhuppi ki haalat par taras khaate hue Gulati ne he usko ishare se sone ka kaha aur gilaas ek ghoont me khaali karta Bhuppi bhi unke peeche wale gadde par ja ludhka.
"Shankar, yar jabardasti na kiya kar tu aise. Bhuppi bhai ka tujhe pata hote hue bhi beer daru eksath pilana sahi nahi. Le mere wale me jara thodi baraf mila. Ye silli wali toh bas dikhne me badi hai par baraf kehlane laayak jara bhi nahi.", Ashok bhale Pandit ji ke damaad the par hamesha se dostana rishta adhik tha inka Shankar aur Narinder sang. Shankar ne bhi apni chuppi todte hue dusra he masla chhed diya.
"Bhalla aur Raunak ji toh kahi aur vyast the yar Inder.. Gajendra bhai apni biwi aur bacho ke sath Palampur me the jinhone abhi 2 din aur waha rukna hai. Raunak ji bhi Delhi se bahar hai lekin apna Gajju Delhi he ruka hua hai jitna mujhe pata chala. Ab wo bade bhai ke kandhe par baat phira raha hai jo subah hone se pehle aane ka jawaab diya. Mamla kuch aur he lagta hai mujhe.", Ab Narinder aankhon ke ishare se usko chup rehne ko kehta us se pehle Shankar baraf milane ke liye chehre he jhuka baitha. Sangwan garmi ka ulahana deta hua apna jaam liye tehlne nikal liya aur waisa he kiya Mehul ne Shankar se gilaas lene ke baad.
"Tu jab bhi dimaag lagata hai toh baat kehne se pehle bhi thoda socha kar. Wo dono samajhdar hai jo uth khade hue. Ab bata tu aakhir kehna kya chahta hai?", Ashok se jaise unhe khaas pareshani nahi thi kisi bhi mudde par baat karne par. Lekin Umed se judi baat Narinder Shankar ke sath uske dosto ke beech nahi karta tha agar waha Umed maujood na ho. Galti ka ehsaas toh Shankar ko bhi ho gaya tha aur ab apna jaam niche farsh par rakhte hue usne baat kahi.
"Wo papa bhi Delhi se aaye na aaj aur waha se idhar bhi aaye toh Satish chacha se kisi Delhi wale masle par baat kar rahe the. Arjun ka jikar kayi dafa hua lekin unki baaki baat mere palle nahi padi. Ab Gajju aane ka bol kar bhi deri kar gaya aur Arjun hai he Delhi me jiski wajah na papa se pooch sakta hu aur na Gajju se. Par aisa lag raha hai ki ye phir se koyi karnama karne me lage hai. Tere sath koyi baat hui thi kya Gajju ki jisme usne kisi tarah ki pareshani ya koyi bhi gor karne laayak baat ki ho business ki? Binodiya toh Nepal hai nahi toh wo jarur bata deta.", Shankar kaha taar jodd raha hai ye dekh kar Narinder ne apne maathe par hath rakh liya.
"Tere dimaag ki daad na he du toh atcha hai bhai. Ab tu waha par bhi Arjun ko Gajju se jodd le pehle. Arjun kaha hai ye tujhe nahi pata lekin mujhe maa ne bataya tha. Gajju pehle Gurgaon ki taraf tha jaha kaam poora hone ke baad wo Delhi kisi meeting ke liye pahucha shaam ko. Waha se abhi bhi niklega toh 5-6 ghante lagenge aane me. Arjun ko bata diya tha maa ne ki wo kal subah seedha ghar pahuche aur wahi rahe jabtak ki hum log nahi pahuchte. Na Gajju ne uske sath aana aur na milna toh tu baat kaha jodd raha hai.?", Shankar ko is baat se eitraaj tha beshak Narinder ki daleel majboot thi aur sahi bhi. Kyonki Umed bhi kabhi jhooth nahi bolta tha aur meeting wali baat thi bhi sach. Par Ashok hairaan tha ki inke beech aakhir ye charcha ho kya rahi hai.
"Aisa hai Inder ki jaha uska ladla hoga wo toh ek baar uska haal lene jarur jayega. Dusri baat ye ki Arjun le kar bhi wahi gaadi gaya hai jo Gajju ne gift kari hai usko. Aur jab main haweli gaya tha chachi ko lene toh waha se dono safed gaadi Gajju ne Delhi mangwaa rakhi thi, security wale 6 bando ke sath. Ab tu bata ke jab uske paas pehle se waha itna sabkuch hai toh ye karna kaha fit baitha? Maa ki Arjun se baat hui toh wo number mobile ka tha aur sahab Cannaught place the. Yaha aane ke baad papa ne us se baat ki thi tab wo film dekh raha tha. Ek cheej toh mujhe atchi lagi ki Arjun ab sab bata raha hai ki wo kaha hota hai, kiske sath hai aur khabar bhi khud he dene laga. Lekin iska dusra pehlu hai ki wo batane ke baad nischint bhi hota hoga. Wo number mere paas hai aur jara tu Ashok ke phone se mila ke dekh ki wo kaha hai?", Ab samay he aisa tha ki Narinder ne ek baar ko toh hath he jodd diye.
"Dekh Shankar ye phone karna kahi apne upar he na mehnga pade. Agar wo nischint karwa raha hai toh matlab waisa karna jaruri hoga na. Ab maan le ki wo kisi ladki ke sath hua toh? Ya soya hua hoga aur neend khulne ke baad wo jaldi dobara nahi sota. Phir jooti bhi tu mere sar padwa raha hai. Agar tujhe itna he kuch gambhir masla lag raha hai toh Arjun ki jagah Gajju ka number kyun nahi milane ko bola? Wahi na bata dega.", Shankar ne hathiyaar he daal diye is baat par lekin baat rakhne ke liye Ashok ke phone se Umed ka number bhi laga diya. Beshak yaha par signal kuch kamjor rehte the par filhal ghanti saaf jaati suni.
"Haan Bhole, soya na tu abhi tak?", Saamne se ye awaaj Umed ki he thi jisne bina laag lapet he bata diya tha ke phone karne wala kaun hai. Speaker ki wajah se baaki dono ne bhi suna aur muskura diye jabki Shankar thoda jhemp sa gaya unhe dekhte hue.
"Na na.. Wo toh Inder ne sone se pehle bataya ki tu kal savere aayega isliye poochne ko phone kiya ki aise ekdum se tu kaha busy ho gaya jo aana mushkil ho gaya tera? Chachi ko lene gaya toh waha se bhi tune 2 gaadi Delhi bulwa rakhi thi.", Shankar ab tukdo me bata toh raha tha par wo bhi saaf sunn raha tha ki Umed chalti gaadi se baat kar raha hai.
"Arre wo ek meeting thi Singla ke sath hotel redisson me. Dinner ke baad thoda deri ho he gayi aur ab nikle hue ek ghanta hone ko hai. Agar Inder yaha hota toh meeting dopehar me ho jaati, meri jarurat he nahi padti phir. Bas 4-5 ghante me tere pas aur phir naachenge dhol ki thaap par. Speaker pe hai phone?", Umed har baat par gor karne wala insaan tha aur Narinder bhali bhanti is se avgat tha chaahe Shankar itne saalo me ye dhyaan na rakh saka ho.
"Oh.. Wo Inder ne he bola tha na ke tujhse pooch lu. Waise mujhe laga ki tera ladla bhi Delhi hai toh kya pata tu uski taraf chala gaya ho. Ab uske pas hone ke liye toh tu waqt nikaal he leta hai.", Ye tanj bhi Umed ko bhala he laga jo hansne laga tha.
"Gaadi toh bhai isliye mangwani padi ki ek site par thoda jarurat thi apne aadmiyon ki. Ab main toh 2 din idhar hone nahi wala isliye peeche koyi toh ho dhyan dene ke liye. Arjun se baat hui thi meri aur wo tab film dekhne ja raha tha Cannaught place kisi didi ke sath. Unke he ghar ruka hai aaj raat wo kyonki college dikhane unke he ghar se koyi gaya hua tha usko. Waise bhi usne toh shaadi me aana nahi tha. Chal ab main wahi milta hu aur ab gilaas rakh de. Tumhari beer party ki khabar mil chuki hai mujhe chacha ji se. Shubhratri.", Yaha toh Umed ne baat ko he Shankar par ulat kar line kaat di thi aur Narinder hans hans ke dohra ho chala.
"Hans le .. lekin mera dimaag nahi maan raha ke wo bail waha kuch kar nahi raha. Papa ne gaanv bhi yahi bata ke bheja tha ke wo chuttiyan bitane ja raha hai. Aur sabne dekha ki kya jalwe dikhaye usne udhar. Aur ab papa waha se aa gaye, Gajju bhi palla jhaad gaya aur wo wahi ruka hai jabki aane ko wo iske sath bhi laut sakta tha. Raat ko kal bhi toh gaadi leke wo akela he nikla tha phir aaj bhi aa jata. Milau kya usko phone?"
"Tu phone idhar de yar Shankar. Raat beet rahi aur tu kal ke din itne kaam hai unki jagah abhi tak hamare bete ke peeche pada hai. Wo doodh peeta bacha nahi hai aur agar tu thoda sa apna itihaas yaad kare toh bilkul bhi aisa nahi karega. Tab hum 12 ki umar se logo ki naak me dum karke rakhe hue the aur ye bechara ab pehli baar toh nikalne lage hai duniya me lekin ab tu iski nigrani karne se baaj nahi aa raha. Wo tujhse, mujhse ya kisi se bhi kahi jyada saksham aur paristhiti samajh kar chalne wala insaan hai. Hum pagal the aur aaj bhi khudko rok nahi paate jabki Arjun.. papa tak usko khudse samajhdar maante hai isliye us se salaah karte hai. Agar koyi masla hoga bhi toh wo handle kar lega na bhai? Usko khud par vishwas badhane de Shankar.. Usne hamari betiyon ko beta banaya hai toh us par sandeh karke hum apne aap par he sawaal uthaye?"
"Inder sahi keh raha hai Shankar bhai.. Main bhi kal tak usko sirf ek bacha he maanta tha lekin tumhari behan aur bhanji ke sath sath jitno se meri charcha hui, sabka yahi kehna hai ki aulaad aur insaan ke roop me Arjun jaisa sabke naseeb nahi. Maanta hu tum pita ho uske isliye chinta lajmi hai lekin wajah bhi toh iske peeche?", Ashok ki baat sunn kar Shankar ne apne chehre ko pas rakhi apne kameej se paunchte hue gehri saans bhari.
"Hum 7 bhai the Ashok.. 7 jinme se sabse bade ka pata toh abhi haal he me chala jab wo 51 baras paar kar chuka. Ek khoya jab wo 13-14 k raha hoga aur phir dusra jo sabka ajeej aur thik is Arjun ke jaisa he diler tha.. wo apni jawaani bhi thik na jee saka. Inder se behsak kuch mahine chhota tha Ajju lekin uski dileri he hume diler bana paayi. Arjun ne apni behno ko saksham banaya hai thik waise he lekin dimaag se beshak samajhdar ho par gussa.. gussa toh usme mujhse bhi jyada hai jo roj roj nahi nikalta. Darr mujhe lagta hai kyonki wo sirf meri aulaad nahi hai. Gajju ne dusri paida na ki, Naitik duniya ko sahi se dekhne se pehle he chala gaya aur ab bacha hai toh le de kar ek Sanjiv jo pehle se he aisi naukri par hai ki har waqt lagta rehta hai kahi koyi durghatna na ho jaaye.. hui bhi toh hai.. Aur uske baad ek ye bewkoof Arjun hai jiske sath sirf 2 he pariwar nahi balki dhero zindagiyan judi hai. Itna daayra aur pyaar toh hamare Ajju ko bhi naseeb na hua tha. Aur aaj wo jaha hai waha hamari pakad abhi bhi poori bani nahi balki udhar dushman jyada hai jis wajah se hume udhar kadam rakhne he pade. 2 saal pehle tak hamare bete ke baare me kisi ko khabar tak nahi thi lekin 2 mahine pehle usko he ghera gaya jaha Umed aur Sanjiv na pahuchte toh tasvir kuch bhi ho sakti thi. Mujhe Arjun ke jaane se utna dukh nahi hoga jitna har insaan ko toot-ta bikharta dekh hoga. Mere gusse me mere peeche Inder, Gajju aur mere dost hosh me rehte hai. Wo toh akela hai.. na wo kabhi batata hai ki kar kya raha hai. Ab sthiti 1973 wali nahi hai Ashok jaha zindagi lene par bachne ke mauke hajaro rehte the. Ek choti si durghatna aur pariwar ki saari saakh jhatke se khatam.", Shankar ke vichaar aur gehri baat sunte hue Narinder ko bhi laga ki uske bhai ka dard aaj bhi wahi atka hua hai jaha hospital me wo dahaade maar maar ro raha tha. Shankar ek janwar tha jis se duniya khauf khaati thi lekin darr usme bhi tha jisko jaan ne wale jyada nahi the lekin utna he dard unhe bhi tha us haadse ka.
"Chal main baat karta hu Arjun se. Waise jitna main jaanta hu na toh Gajju ne wo suraksha Arjun par he lagwaai hogi kyunki aisi he chinta usko bhi rehti hai. Arjun nahi batata ki wo kab kya kar raha hai kyonki wo anjaam dene se jyada usko safal karne me yakeen rakhta hai bhai. De jara number, waise mere paas Malhotra ji ki beti ke sasural ka bhi number hai.", Narinder ne he Ashok se wapis phone lene ke baad Shankar dwara bataye 11 ank mila diye. Ghanti jaane lagi thi par koyi utha nahi raha tha. Dobara milane par bhi wahi nishkasrh nikla.
"Nahi uthaya.. shayad so chuka hoga. Main dusra milata hu.. landline ka number hai par tera bhi dil halka kar dete hai.", Abhi Narinder number milane he laga tha ki phone ki ghanti he baj uthi. Ye Arjun wala he number tha jisko dikhate hue Narinder muskuraya Shankar ki aur.
"Haan mere laal.. so gaya tha kya? Tere chacha bol raha hu."
"umnnnn.. namastey chacha ji.. bas thodi thakaan thi.. aur phone silent. Abhi bathroom ke liye utha toh phone ki display jalti dikhi. Aap thik hai?", Awaaj halki si goonj rahi thi aur nal chalne ki awaaj se matlab tha ki Arjun shauchalya me he tha. Narinder ke sath Shankar ne bhi apne bete ki unindi si awaaj suni.
"Wo bas teri chachi maa ne mujhe bola tha ke tu 2 din ghar ruk jana agar ho sake toh. Main bhool he gaya tha aur laga ke tu jaag raha hoga toh abhi bol deta hu. Kahi tu waha se he seedha gaanv na nikal jaaye.", Ab chahe Narinder ji jaisi bhi daleel dete lekin us aalishan bathroom me aaine me khudko niharta Arjun muskura raha tha.
"Ji.. chachi maa ne kaha hai toh 2 din kya 4 din ghar rahunga. Par abhi thodi thakaan hai chacha ji.. din bhar toh didi ke sath market me shopping aur cinema.. kal raat aur savere itni lambi driving... Uhmmm.. neen.. neend aa rahi hai.. Goodnight..", Arjun ke sab vivran par Narinder ne bhi saamne se goodnight kaha aur dhyaan se gaadi chalane ki hidayat bhi de daali.
"Padd gayi tasalli doctor sahab? Arre Delhi gaya hai toh dekhne ka chaav bhi hoga na thoda? Khamkhwaah neend haraam kar di laadle ki. Ab khatam kar bhai tera gilaas aur soya jaaye. Dekh 1 se upar samay ho chala hai aur maa 5 baje utha degi. Mera kuch nahi jata, lekin teri neend poori na hui toh tu sab par barasta rahega. Chalo ghar ke damaad ji, aap bhi ab bas karo. Tum dono he pichle 10 minute me 2-2 peg khali kar chuke ho. Udhar Param aur Mehul bhi leit chuke.", Shankar ne dhyaan diya toh Narinder sach he keh raha tha. Is khuli chhatt par bas yahi teeno he toh baithe the ab.
"Haan sahi keh raha hai tu.. Ab soya he jaaye aur waise bhi Arjun ko phone tune he milaya. Main toh Umed ki baat se santusht tha aur Delhi jaisi jagah kaun is ladke ko dekhega.. ? Idhar toh log jaante bhi honge thode bahot.", Ab Shankar ko apni he kahi baat se palat-te dekh Inder ne halke se kamar me ghunsa tika diya.
"Dekh jija, ye vyakti na katai paltu-ram hai. Pehle Gajju ke kandhe par talwar dhari thi aur ab mere sar gilaas fodd diya. Waah re Doctor .. teri maya koyi samajh na paya. Main toh ye Bhuppi ke sath he laga sone.. Goodnight.", Bartan ek taraf rakhne ke baad kisi ne bhi gadde jhaadne tak ki jehmat na dikhari. Gaanv ka khula vatavarn aur ye thandi khuli chhat.. sukoon se neend ke liye aur kya chahiye tha.
.
.
"This is gents washroom, if I'm not wrong.", Yaha dhwani badhit shauchalaya se bahar nikalte he darwaje par khadi hari aankhon wali Shelli ko dekh kar Arjun ne chaukhat pe he hath tikaate hue kaha. Ek choti si skirt aur poori kamar dikhau bra si tshirt me wo bala se khoobsurat haseena kuch ghabraai si dikhi.
"Listen.. Tum ek atche ladke ho isliye warn kar rahi hu. Kaise bhi yaha se nikal sakte ho toh carefully nikal jao. Tension mat lo idhar camera nahi hai aur ye mera loo (bathroom) break hai. Rasool is not just a bodyguard.. He is Sahaye mam's personal hitman and cold blooded murderer.", Ye batate hue un hari aankhon me jitna khauf tha us se Arjun hairat me he padd gaya.
"Tumhe hindi aati hai Russian hone ke bawjood.? Aur ye sab tum mujhe kyun bata rahi ho Shelli? Yahi naam hai na tumhara?"
"Shahnoza Rakhimova.. Main Uzbekistan se hu, Russia nahi. Waha ke club se mujhe yaha laya gaya atchi salary aur ek behtar life dilane ke vaade ke sath. Sahaye mam staff ke sath bahot atchi hai lekin.. Rasool ek janwar hai. Tum baaki sabke jaise nahi ho young man.. Aur first time maine mam ko itna frustrate dekha hai. Mostly unke office room se nikalne wala ladka apne paanv par khada ho kar nahi jata dekha club se. Nikla toh bhi bahar Rasool and his goons.. wo bahot maarte hai unhe. Yaha se ek ventilation dukt hai, tum wahi se bahar kood jao. Kapde toh aur mil jaayenge par life kharaab ho gaya toh.. "
"Shhh.. thank you Miss Rakhimova.. Mujhe ehsaas hai ki jaise aapne bhi kuch khoya hai is atchi job ke badle me lekin main idhar se bhaagne ke liye nahi aaya. Rasool ho ya fir koyi bhi.. wo mujhe hath lagane ki galti bhi nahi karne wale. Arshi agar atchi hai toh main uske sath kuch galat nahi karunga. Aur tum waise he muskurati hui atchi lagti ho jaise bar counter par dikhi thi. Now that green spark is missing.. Apna dhyaan rakho, main chalta hu.", Arjun ne us ubhre hue fakk gore gaal ko halke se sehlane ke sath he apne kadam galiyare se aage badha liye jaha wahi kaanfodu sangeet apne charam par tha aur yaha Shelli bebas si dekhti he reh gayi.
'Madman..'
Andar agar kuch tasvir badli thi toh itni ki bar counter par ab swayam Arshi Sahaye khadi thi Shelli ke sthaan par aur uski agal bagal 2-2 bar-tenders, jinke upari vastra lagbhag sabkuch jhalka rahe the. Ab jo bheed bhi thi wo sirf jawaan jodo ya phir gine chune sharaab-sundariyon ke chahne walo ki he bachi thi. Matlab saaf tha ki yahi charam samay tha is club ka jiska naam Fire-shot tha aur jaam ke upar aag laga kar parosti bar-bala apne kulho ki lachak bhi sath parosti dikhne lagi.
"Where is that doll face green eyed beautiful girl?", Arjun ne thodi si unchi awaaj me Arshi ki bagal me khadi sundari se poocha jaise uska maksad ye Arshi ko sunane ka he ho jo halki roshni me bhi apne gusse se surkh chehre ko chhipane me asaksham thi.
"Drink banwana hai ya date par leke jana chahte ho usko? This is my club and you must not forget your limits Mr Casanova.", Arjun bhi wahi gol stool par aise baith gaya jaise ab usko inse koyi matlab he na ho. Wo ladki hairaan thi ki is ladke ne koyi order nahi diya aur uski maalkin bhi itna bhadki hui hai. Bagal me he ek aur khoobsurat aadhunika aa baithi jiske jism se paseene aur khaas itra ki aakarshak mehak baras rahi thi.
"Hi handsome. Main apne gang ke sath aayi thi lekin wo log toh nikal gaye. You want some drinks? Main toh ek vodka with lemonade lene lagi hu.", Kaajal abhi tak aankhon me barkaraar tha is yuvti ke aur patli lambi ek khoobsurat chehre ki ye maalkin seene se beshak sapaat thi lekin nitamb hahakari kataav liye aur us stool ke daayre se bahar nikle hue. Chehra Arjun ki taraf kiye wo badi kaamukta se usko dekhne lagi.
"One Vodka with lemonade for my beautiful guest..", Aur is baar ye nirdesh Arjun ne 500 ki 2 patti Arshi Sahaye ke saamne lagbhag patakte hue diya jo ghoor kar dekh rahi thi in dono ko lekin paise is tarah dene ke sath seedha order dena usko pasand nahi aaya.
"You.. Order dena hai toh bartenders ko do."
"Dekhne se toh tumhi inki junior lagti ho aur ye log pehle se he busy dikhi isliye tumhe order de diya. Ab drink nahi dena toh koyi baat nahi. Hum apni is pyaari aur tanha mehmaan ko kahi aur le jaate hai. 5 stars band toh nahi ho gaye Delhi ke sabhi? Chalogi Miss..?"
"Vendi.. Aur drink ke sath tumhari company mile toh phir chahe duniya se he dur le jao.", Ab jis adaa se is haseena ne apne honth kaatne ke sath Arjun ki majboot baah ko thama tha, Arshi ne bhunnate hue jabde kass liye. Wo toh thik waqt par bagal wali bartender ne kaanch ke ek patle lambe gilaas ko idhar badha diya nahi toh ye ladki shayad Arjun ko choom he leti.
"Thank you. Hey.. you are still here Shelli.. Repeat my drink gorgeous.", Arjun ne bar ke peeche aayi Shelli ko dekhte he ek lambi muskaan dete hue dono hath he counter par tika diya jaise wo uska didaar he kar raha ho. Bagal me baithi Vendi toh apna drink le kar phir se naachne chali gayi par Arshi Sahaye jaane kya soch kar itraati si couter ki taraf se nikal kar thik us jagah aa baithi jaha pehle Vendi thi. Shelli bechari toh jhooti muskaan ke sath Arjun ke liye seb ke ras me baraf aur jaane kya kya milane me vyast thi par apne itne najdeek baithi neele baalo wali tamtamati ghamandi Arshi ko dekh kar Arjun ne apni najre uske chehre par he sthir rakhi.
"Tum already bahot badi musibat me ho richi rich. Aaj tak kisi ki majaal nahi ki wo Arshi Sahaye ki ijajat bina najre utha kar baat bhi kar sake. Aur tumne toh.. Aisi galti ki hai ki iski saja sochne me he mujhe ek ghanta lag gaya. Haan dushman ki tareef jarur karungi jo pooch daba kar bhaagne ki jagah abhi bhi yahi baitha hai. Bewkoofi bhi keh sakte ho isko agar tumhe apne un bahar khade chamcho ka bharosa hai ki wo tumhe kuch nahi hone denge.", Ye baat Arshi ne kohni counter par tikane ke sath chehra Arjun ke aur kareeb karte hue is andaaj me kahi thi jis se wo uska gussa aur taqat samajh sake. Parantu ek baar phir usne wahi galti ki jo pehle hui thi. Arjun ke itna kareeb aane ki. Aur is baar wo jabtak kuch samajh sakti, apne patt par dono hath rakha Arjun uski patli kamar ko unki giraft me liye goad me baitha chuka tha. Chehra toh pehle se kareeb tha aur dono ke honth is baar jo jude wo kahi ekaant nahi tha. Arshi kuch samay uske kandho par mukke barsati rahi, machalti rahi lekin uska jisma tass se mass na hua jo Arjun ki giraft me is kadar tha jaise pakka juda ho. Wo jordaar hontho ki qaid samay ke sath unme dheel karti hui hontho ko choomne, choosne aur aakhirkar Arshi ki gulabi jivha ko mooh me bharne tak ja pahuchi. Khel yahi tak na ruka. Arjun pakad dhili karne ke baad uski choti si skirt ke bhitar chikni jaangho aur kulho ki talhatti tak sehlate hue Arshi ko saans lene ke sookshm mauke dete hue nirantar laal hontho ko khaali karta raha.
'Oh baap re.. dekho yaha toh live he chal raha is couple ke beech.'
'Wow they both look wild n hungry hun..'
'Shelli.. wo kya ho raha hai tere samne?', Kayi jode jo kuch duri par baithe the aur jo naach kar abhi nikalne lage the, sabki najar counter se sati is stool par ja ruki jidhar ek majboot lambe chaude yuvak ki baahon me chipki Arshi hosh he kho baithi. Par dekhne wale duri aur bolne wale awaaj dhimi rakhe rahe kyonki ye mahol kabhi bhi bhuchaal ban sakta tha. Shelli fati aankhon se bas dekhti he reh gayi aur uske sath wali baaki 4 videshi balayein bhi. Saansein ukhadne me koyi 3-4 minute lage honge aur chehre juda hote he jaha Arjun apni goad me aankhein band kiye baithi is neele baalo wali apsara ko bade he pyaar se nihaar raha tha wahi Arshi apni saansein durust karne ke sath ek hath counter par fislaati rahi. Shelli us mocktail ke gilaas ko jabtak apni taraf khiskati, Arshi ki ungliyan uski golaai par kas chuki thi.
'Thaaakkkkkk', Poori taaqat se Arshi ne wo motte kaanch ka gilaas Arjun ki kanpati se kuch upar de mara. Vaar itna jordaar tha ki kareeb khade logo tak kaanch ki tukde aur wo meetha taral uchhalta gaya. Us mohak chehre wale yuvak ke ghungrale baalo aur gaal se pehle mocktail aur uske baad khoon ki mamuli si lakeer fisalti gayi.
"How dareeeeeeeeeeeeeeeeee youuuuuuuuu.. ??? Khud ko samajh kya rakha hai? Mujhe tumne bajaaru samjha hai jo itni himmat...Alice, call Rasool immediately and tell him to throw this scumbag outside. Huhhhhhh..", Log jis tarah se bahar nikle the dhadadhar bhaagte hue unke ulat Arjun waise he araam se baithe baithe napkin ki gaddi se apne chehre ko saaf karte hue bhi Arshi ko he dekhta raha. Wo aag me jhulas rahi thi lekin wajah usko bhi nahi pata thi ki gussa kis wajah se hai. Udhar ek bar-bala ne bahar suraksha ko bulawa bheja aur idhar Arjun ne khade ho kar ab lagbhag khamosh ho chale is club me dobara se Arshi Sahaye ko apne aagosh me bhar liya. Uski patli kamar Arjun ke ek he hath ka sparsh mehsoos karte hue kanpkanpane lagi. Chehre par chhaya gussa aur jalti aankhein Arjun ke dekhne se ab katrane lagi thi.
"Ye neele baal tumhe suit nahi karte baby.. Wo laal he atche the.. Shirt me buttons kholne se atcha hai ki tum apne shoulders dikhane wale top ya singl piece pehno. Mujhe tumhara wo tattoo bahot pasand hai jo ye left shoulder se upper arm tak bana hai. Aajtak tumne jitne bhi bulaye wo tumhari chahat nahi maje aur paise ke laalach me aa pahuche. Aur mujhe tumne nahi bulaya, kyonki main khud he sirf tumhare liye aaya aur pehli najar me tum mujhe bilkul atchi nahi lagi.. Wo laal baal bhi missing the aur strp floral gown bhi, knee length wala jisme tum aisi dikhti ho jaise mere bachpan ki wo Ariel jeeti jaagti saamne aa khadi hui, jiske liye special cartoon dekhta tha aur aaj bhi dekhta hu.", Arjun jis andaaj me baat kar raha tha aur har baat ka ullekh bhi, sab sunti hui Arshi ka chehra he safed padne laga. Ab uski najre na aag ugal rahi thi aur na unme pareshani thi. Arjun ke maathe aur kanpati ke beech se kahi khoon ki patli si lakeer fir se behne lagi. Shayad koyi kaanch bhitar laga tha. Rasool ke sath kul 4 log idhar aa pahuche jo saamne ka drishya dekh khud bhochakke se reh gaye kyonki unki maalkin apne staff ke saamne he us yuvak ki ek baah kamar se peeth par ghumwaye tukur tukur dekh rahi thi.
"Tumhe aadat pad chuki hai sabko apne saamne jhuka hua dekhne ki aur ye buri baat bhi nahi. Lekin mere jaisa sanki jhukna nahi jaanta Miss Sahaye.. Mujhe jo pasand aata hai main ye toh usko apna leta hu, ya uske kadmo ke niche se jameen khinch leta hu. Tum pehli option ho kyonki najuk aur sharmili ladkiyan bahot boring hoti hai. Jab pyaar se kiss dene ke baad tum gussa karti ho.. uff.. that sweet and bitter taste.. Lafz nahi hai mere pas uske liye. Kehte hai jab baat kiss ki ho toh ye kabhi even nahi hone chahiye.. Odd se pata chalta hai kaun jyada pyaar karta hai. Ummmm", Idhar Arjun ke honth Arshi ki taraf badhe aur waha Rasool ne baseball ka bat Arjun ki taraf ghuma diya. Arshi ki band aankhon me koyi virodh na tha lekin sabke saamne Arjun ke aise dussahas se uski najre band ho chali. Is baar bas honth he aapas me mile aur Arjun Rasool ki taraf palta jiski aankhon par hairat aur hath us lakdi ke gol dande par jame the.
"Aisa hai barkhurdar ki tum insaan kam aur darinde jyada ho. Ab jo baat humne kahi thi, usme dusri option tum jaise janwaro par laagu hoti hai jo apna kaam sahi karne ki bajaye apne ohde ka faayeda jyada uthate hai. Tumne jitni galtiyan ki hai ab unki saja poori milegi..", Arjun jaha pehle ek jagah sthir khada tha, apni baat poori karte he usne danda apni taraf khinchne ke sath uske peeche aaye Rasool ki gardan pakad kar hawa me upar uthate hue aise patka ki chamde ka wo sofa aur Rasool dono he farsh me ja mile. Tej cheekh ke sath wo niche tadap raha tha aur uske sathi gusse me pistol ki jagah majboot dando se Arjun ki taraf kood pade.
"Somebody please stop this...", Par Arshi ki ye dabi si dari hui awaaj kaha sunaai padti inhe. Ek danda jaha Arjun ki baah par laga toh saamne wale 2 log jagmagti roshniyon se bhare farsh aur diwaar par ja bhide. Unme se ek toh apne boss ki tarah tadapta he reh gaya fata hua sar liye jabki dusri behosh.
"Vaar aisa karna chahiye ki saamne waale ko mauka he na mile. Aur yaha main apni darling ke sath ghonsla banane ki baat chala raha tha aur tum toh peeth par he vaar karne lage. Meri pakad me ye kalaai aane ka matlab hai dost ki ab tumhara kandha, kohni aur kalaai...... gaiiiiii.", Arjun ne jaha kandhe aur kohni par jordar prahaar karke kataak se unke jodd nikale the wahi kalaai 180 ghuma kar poora hath he nakara kar diya. Aakhiri wala toh waha ruka he nahi jo bahar madad ke liye daud pada.
"Tum kyun sehmi khadi ho meri totapari? Kabhi kabhi josh me log galtiyan kar jaate hai. Yaha ka nuksaan inki salary se kaat lena. Aur agli baar jab milenge tab baal kaise hone chahiye?", Arjun ne Arshi ki thuddi upar karte hue poocha jo lagbhag sadme me thi. Rasool ne koshish ki thi apni rivolver nikalne ki lekin uski hatheli ko he Arjun ne paanv ke niche masalte hue daba liya.
"Red.. Ariel jaise.. with strap gown.."
"ummaaahhh.. Jo tumhe pasand ho, waise raho.. Mujhe ye ghamand aur nakhra he pasand hai, bas isko mat badalna.. siwaye mere liye. Kab milogi?", Arjun ne thuddi chhod kar niche padi rivolver kholne ke baad uske purje Rasool ke he seene par fenk maare. Us majboot vyakti ke chehre par dard ki anginat rekhayen thi jo badi aas se apni madam ko dekh raha tha Arjun ke agla kadam lene se pehle.
"Tum.. Tum kaun ho?", Arshi ko jaise aaj ehsaas hua tha ke wo ekmatra he taqatwar insaan nahi thi us ilaake me. Aur jo saamne tha wo bas usko he surakshit chhode tha jabki uske 4 aadmi toh uthne ki haalat me he nahi the. Shelli ne he pryaas kiya tha is beech Arjun ko rokne aur napkin ki madad se uske chehre par aate khoon ko saaf karne me.
"Main kaun hu ye jyada maayne rakhta hai ya hum phir kab milne wale hai wo din? Main isko ab tumhara inkaar he samajh raha hu, jabardasti ke rishtey waise bhi kaha tikte hai. Thank you Shelli.. you are way better than your employer.. but she is slightly beautiful. Kabhi club se fursat mile toh, ye mera number hai. Thoda advance me bata dena. Aur apne in paltu bacho ko thoda tameej sikha dijiye Miss Sahaye.. Mere jaisa junooni agli baar kisi hari aankhon wali ke rokne se nahi rukne wala.", Arjun Shelli ko jeb se ek kaagaj nikal ke dene ke sath he aage nikal chala. Pravesh dwar par he Arshi ke 5 angrakshak aur wo suraksha karmi ghutno par jhuke the. Sabke hath peeche ko bandhe hue aur Umed Singh ke aadmi maje se unke sar par nishana saadhe khade muskurate hue
"Jaane do inhe kaka.. Inki maalkin ab dobara galti nahi karegi. Bade bade sheharo me aisi choti choti baatein hoti rehti hai.", Arjun ke kehne bhar se wo log inhe aise he chhod apni gaadiyon ki taraf badh gaye. Unhe wapis lautne ka nirdesh mil chuka tha lekin jaate hue unhone sabki pistol jarur apne sath le li thi. Bhitar hatprabh khadi Arshi ko jaise hosh aaya aur bahar daudte he saamne apne aadmi is kadar bebas dekh kar bhi wo unhe laanghti hui khule hisse me aa pahuchi. Club ki baaki pancho ladkiyan bhi apni maalkin ke liye peeche aayi aur sabne wo 4 safed car jaati dekhi jinme Arjun ke surakshakarmi the.
'Sala chehre par nahi maarna tha. Dil me he lag gayi ye fuljhadi..', Arjun ne kameej ko utaar kar wahi rakhi ek bottle se sar aur chehra dhone ke baad pauncha toh ab uske saamne pistol liye Arshi khadi dikhi.
"Ab tum akele ho..", Arshi jaane ab kya karna chahti thi ya uska dil is khel se bhara he nahi tha. Par ek baar fir wo uski baahon me thi jo ab upar se nirvastra tha. Pistol wala hath Arjun ki hatheli me daba Arshi ki he skirt ke bhitar naram kulho par us thande lohe ka ehsaas karane laga jisme se garam goli nikalti hai.
"Aur main akela he bahot hu. Wo log mere sath isliye the ki main tumhare logo ki durgati na kar du. Aaj se pehle kisi aur ne Arshi Sahaye ko itna asahaye kiya hai kya meri totapari? Tumhari jagah, pehle tumhare usi band kamre me jaha jaane kitno ki tumne band bajaai hogi aur uske baad club me sabke saamne.. aur ab dekho hum khule aasman me lipte hue hai. Tumhara hathiyaar us jagah hai jaha aajtak kisi ke hath rakhne tak ki himmat nahi hui. Abhi bhi tumhe lagta hai ki mera kuch bigaad sakti ho? Lo phir daba do ye trigger lekin khud se sachhai nahi chupa sakti. Pehli baar jab kiss hua toh tumne he kamar uthaai, dusri baar tum mujhse jyada chahat dikha rahi thi lekin mahol najar aate he wahi jhoothi shaan aur rasookh ke badle me mere sar pe kaanch de mara.. Par teesri baar.. Teesri baar tumne he honth aage kiye the.. aur main peeche hata.. Mujhe maut ka darr nahi hai aur ye tum bhi jaan he chuki ho. Bas ek baar tumse waise he milne ki itcha thi jaisi jhalak dekhi thi jo mujhe yaha tak le aayi.", Arjun ke chaude seene par wo khud he Arshi ka pistol wala hath dabaye khada tha. Ab naal uski chhaati ke kataav par dabi thi aur Arshi dobara ektak usko dekhti apni aediya unchi kar gayi.
"Tum yaha ke nahi ho?"
"Nahi."
"Milna chaahu toh?"
"Bas keh dena.. number toh tum Shelli se le he chuki ho.. Advance me pata rahega toh..Ummmmmm", Yaha ab drishya kuch jyada he kaamuk tha jisme Arshi ne apni dono lambi chikni taange uchal kar Arjun ki kamar me lapete hue uske hontho ko mooh me he bhar liya. Ghutno ke bal baithe, hath bandhe wo angrakshak apni maalkin ko bas dekh he sakte the lekin Shelli chamakti aankhon se muskurati hui darsha rahi thi ki wo bhi is yuvak ki diwani toh ho he chuki hai. Rasool apne aadmiyon ko sath jaise taise bahar nikla tha aur abhi bhi seene par hath rakhe wo dusre hath se ek kapda sar ke peeche lagaye wahi dekhne laga jaha baaki sabki najar thi.
"Mam..."
"Shhhhh.. Fir kabhi beech me tokne ki galti ki toh main dad ka lihaaj bhi nahi karungi Rasool.", Niche utar kar apni kameej thik karte hue Arshi ne jis tarah se chetawani di thi, Rasool ke sath baaki sabhi ki najre jhuk gayi. Wo Arjun ki taraf mudi jo apni kaali aalishan jeepnuma gaadi ki aur chalne laga tha.
"Naam nahi bataya? Aur ye shirt tabhi wapis lena jab dobara miloge.. Miloge na?", Arjun ne apna hath dekha toh uski kameej jis par khoon ke daag aur paani laga tha, wo ab Arshi ke paas thi.
"Bahot pahoch hai na tumhari? Mobile number toh aa he chuka, naam bhi pata lagwa he logi. Rasool, tumse milne nahi aaya tha aaj. Lekin agar dobara ye suna ki tum aur tumhare ye gurge apne auhde ka galat istemaal karte ho toh phir bas tumse he milna hoga. Chaaho toh V.C. Sahaye sahab ko aapbiti suna sakte ho lekin waha se sirf humdardi he haansil hogi. Haan baby face, ek date udhaar rahi hamari. Jab bhi Delhi aaya toh tumse jarur milunga.", Arjun ke gaadi ka darwaja kholte he Arshi teji se udhar lapki. Ab dono he sabki aankhon se pare the.
"Hey.. tum mere papa ko kaise jaante ho? Aur ye kya bol rahe the tum Rasool aur Shelli se? Tumne kaha tha ke tum sirf mere liye he aaye the. Main tumhe Ariel jaisi lagti hu aur tumhe mere tattoo ka bhi pata hai.."
"Tumse dil judd chuka hai lekin maksad zindagi ke kayi aur bhi hai. Logo ko khush rehne ka haq hai Arshi aur jo kaayde me nahi rehte, unhe saja ka. Kabhi kabhaar apne he staff se mil liya karo agar bahar ki duniya matlabi aur laalchi dikhti hai. Sorry, meri wajah se aaj tumhara bahot nuksaan hua hai lekin main filhaal kaam nahi karta aur papa mahine ke sirf 1500 dete hai jebkharchi ke liye. Umaahhh. Bbye Miss Rainbow.", Arshi ko ye aakhiri baatein jaise majaak si lagi aur wo apne hontho par laga halka sa geelapan ungli se utarti dekhne lagi toh waha Arjun ka khoon he tha jo ab aujhal he ho gaya viraan sadak par jis raftaar se nikla tha.
'Totapari jyada thik hai.'
"Mam, police complaint karni hai ya peecha.?", Abhi bhitar se wo bahar nikla tha jo sabse pehle behosh hua. Bahar ke halaat dekh usko kuch samajh he nahi aaya kyonki abhi tak aadhe log bandhe the.
"Tumhe 30 hajaar salary complaint karne ki milti hai Robie?"
"Pata nahi mam.. Kuch jyada he trained aur peshewar aadmi tha wo.. Par main kaise bhi usko dhoond he lunga. Camera me toh aaya he hai."
"Tum apna ilaaj karwao aur baaki log club thak karo. Shelli, tum aaj mere sath chal rahi ho.", Shelli hairaan thi par maalkin ki baat sunn kar dhime kadmo se wo us car tak aa gayi jo Arshi ki thi.
"Mam, aap bina security?", Rasool najre jhukaye sharmindgi bhare swar me itna he keh saka.
"Club ki proctection he atche se kar lo toh bahot hai. Waise inke hath khol do aur jo salamat hai wo 2 log hamari gaadi ke peeche. Alice, tum sab log ek gaadi se jao. Rasool doctor ko yahi bula lena filhaal.", Arshi ke gaadi me baithte he ek car me 2 log baithne lage.
'Sala pistol tak le gaya wo.'
'zinda chhod diya ye kam hai kya bhai? Unhe dekha kitni maar padi hai? Batao madam he fansa li pehli baari me. Agli baar aaya toh damaad na ban baithe.'
"Abhi bhi tumhe shak hai kya? Dekha nahi kaise madam ko goad me uthaye khada tha kameej utaar kar. Sala jarur khas training leke aaya hua hai bahar desh se.'
'Gaadi badha bhai.. nahi toh madam sachmuch naukri se nikalwa degi.', Dono ki najar maddim hoti car ki pichli lights par padi toh race daba di. Aaj Fire Shot par 4 ghanto me bahot aag lagi thi. Beshak dhuaan na dikha par jo apne maksad se aaya tha wo jarurat se jyada he kar gujra.
.
.
Copyright to Enigma203
Join Our
Discord Server
For Daily Updates
