Update 221
Navdampatti (2)
"Koyi khabar hai kya chote mukhiya ki? Mujhe toh kal he pata chala ke wo kahi
bahar gaya hai. Kuch din idhar raha toh bhi jaane kaha gayab rehta tha din
bhar.", Deepa bhabhi chara kaatne ke baad abhi hath mooh dho kar toliye se
sukha he rahi thi ki pichle darwaje se Jasleen unke khule aangan me chali aayi.
Chehra uska bhi bhaavheen he tha aur chaal thodi sust. Peedhi par Deepa bhabhi
ke paas baithte hue usne apna dupatta utaar kar ek taraf rakh diya.
"Aapko ye toh pata chala lekin mujhe toh itni bhi khabar nahi mili. Kal Jaggi
gaya tha inke yaha toh yahi bataya ke Arjun shehar gaya hua hai. Kaunse
shehar, kab aayega, baat kaise ho sakti hai kuch pata nahi chala. Bhabhi, meri
haalat thodi ajeeb hone lagi hai aajkal. Neend nahi aati aur garmi badhne lagti
hai aadhi raat me.", Deepa bhabhi ke salone chehre par ye sunn kar muskaan tair
gayi. Jasleen ko sehwaas ki jarurat thi aur uski pareshani dur karne wala he yaha
maujood na tha.
"Byaah hone ke baad garmi atche se niklegi tumhari. Abhi kuch din seh le jaise
taise. Pakka ilaaj toh tera pati he karega. Waise din me 4 baar toh mujhe bhi
nahana pad raha. Beti paida karne ke baad 17 baras me pehli baar mujhe ehsaas
mila poora lekin ab jaise halaat jyada dubhar kar diye tumhare chahete ne aisa
kaand karke.", Arjun ka prem bhi toh kuch kam na tha Deepa bhabhi sang aur
wo mureed bhi thi us junglee ghore ki jo ek bar chadhne ke baad jabtak maidaan
ki jameen poli na kar deta tha, peeche kaha hota. Jasleen unke jawaab par aage
kya kehti.
"Bebe aur Jaggi toh gaye chale ghar aaj. Mujhe laga tha ke ab mauke araam se
milenge aur agar wo hota na aapke paas toh aaj maine parwaah na karni thi
bhabhi.. Beech me aa jaati aap dono ke.. Kya sabhi ko itni he tadap uthti hai
bhabhi? Aapki toh shaadi 18 baras pehle hui thi na.. toh ye sab mehsoos kiya
hoga..", Jasleen ke sawaal alag he nabz daba gaye Deepa bhabhi ki. 18 baras
pehle.. Wo chehra kuch pal ke liye kahi dhundli yaadon me kho gaya jaha tadap
aur aag toh kahi dur dur tak na dikhaai padi.
"Mujhe gyaan nahi tha is sabka aur jab tere paah ji ne mere hath lagaya toh
mujhe sharam se jyada darr lag raha tha. Wo daur bhi dusra tha aur mahol bhi
alag. Uske baad kuch alfaaj tareef ke aur dher sara dard he naseeb hua. kam hone se pehle agli raat aa jaati jisme dobara sabkuch pichli raat jaisa.
Mujhe aisa lagta tha ki mard aur aurat ka rishta kisi maalik aur gulaam se alag
nahi hota. Haan kabhi kabhi bach jaati thi jab mahina wala samay hota. Dekhte
he dekhte kab peit se hui aur Nimmo paida ho gayi. Par beti ke baad bhi jyada
kuch nahi badla aur tumhare paah ji ne wo mehnat lagani band he kar di jidhar
Arjun 10-11 baras baad aa pahucha. Mujhe aurat hone ka ehsaas beshak apni
beti ko janam dene se hua lekin jo anginat naye ehsaas shaadi ke 18 baras baad
Arjun ne karwaaye, unse yahi laga ke pehle mera apna koyi astitva he nahi tha.
Tadap toh andar he andar na jaane main kabse rahi thi Jass.. Us pyaare insaan
ne toh berang zindagi ko anginat rango se bhar diya. Ab samajh aata hai ki ek
aurat aur mard ka rishta waisa nahi hota jo barso tak samjhe baithi thi. Koyi
gulaam aur maalik nahi hote Jass us rishtey me.. Pyaar hota, parwaah hoti hai
aur wo shararti toh is sabme kahi degree liye baitha hai. Tum thoda kaabu rakho
apne machalte dil par aur wo wapis lautega tab main khud tum dono ko band
kar dungi kamre me. Poori raat nikaalti rehna saari garmi. Chal tujhe aaj
badhiya shikanji (nimbu-paani) bana kar pilaati hu.", Deepa bhabhi dwara
bataya har vaakya Jasleen ne apne bhitar mehsoos he kiya tha jaise. XXXX
shehar me jaane uske aage peeche kitne phirte the, university me bhi itne yuvak
the jo Jaggi se maar tak kha chuke the lekin phir bhi dur se ya kisi aur bahane se
Jasleen ko dekhte rehte. Usko hamesha lagta tha ki wo khaas hai aur khoobsurat
bhi par us insaan se pehli mulakaat me he wo bas uski he ho kar reh gayi jisne
waise toh bilkul na dekha tha jaise baaki sabhi. Apne ghar ke band kamre me
Arjun ka uske hontho ko choomna toh aisa tha jaise kalpana se kahi dur ek
sukhad ehsaas.
"Sahi kehti ho aap bhabhi.. Aur waise ek baat pata hai aapko?", Jasleen ke
badan me ab alag si urja bhar uthi soch sakratmak hote he. Wahi khule
rasoighar me Deepa bhabhi ke saamne baith wo khudse he paani me cheeni
gholne lagi.
"Batayegi tabhi pata chalega?"
"Renam.. Nele ki behan.. Arjun ko pasand karti hai par nakhre aise dikhati hai
jaise uska koyi lena dena he na ho. Jeeti aur main kal baat kar rahe the aur wo
sunti hui bhi jaise na sunn ne ka dikhawa karti rahi. Baad me usne Jeeti se akele
me poocha tha ke Arjun se meri setting hai ya ab shaadi pakki hone par maamla
nibat gaya. Jeeti ne keh diya ke aisa waisa toh kuch nahi hai bas dosti atchi hai
aapas me jis karke majaak chalta rehta. Aur phir wo boli ki Arjun usko line de raha tha jab unke waha khaane pe gaya tha. Hahaha.. Tedhi cheej hai apni
Renam Kaur..", Jasleen ki swabhavik hansi lauti dekh kar Deepa bhabhi bhi
khush hui par Renam ke maamle par unhone kuch kehna munasib na samjha.
"Jhalli hai wo nakhro.. Tu ye bata ke October me Jaggi ka byaah aur November
me tera.. Munda atcha toh hai na? Dekh Jass.. byaah ke baad beshak shehri
mahol me he rahegi jaise pehle se rehti aa rahi hai lekin waha par Arjun ki jagah
banane ki koshish matt karna agar ladka tujhse pyaar karne wala nikle. Waise
bhi shuru me dhyaan agar naye ghar pe lagaaye rakhegi toh zindagi badhiya
chalegi. Aksar kamjor aur akela insaan aisi galtiyan ya jeene ke aas me kadam
utha leta hai par jaha bhara poora pariwar aur pyaar karne wala pati mile, ghar
ki eent majboot rakhna sabki jimmedari hoti hai. Naya jiwan shuru se he pyaar
aur maryada me reh kar shuru kiya jaaye toh shikayat nahi hogi.", Yaha bhabhi
ne toh usko Arjun ko bhulane ki he salaah de daali thi jis par shakkar gholta
hath wahi tehar gaya. Jasleen ki badi badi aankhen ektak us paani ko dekhti rahi
jisme ab shakkar ka astitva adrishya tha par usko mehsoos chakhne se he
mumkin tha.
"Isme se wapis shakkar nikaal do bhabhi toh main Arjun ko kabhi yaad nahi
karungi. Kar sakti ho kya aap aisa? Mera us se koyi jismani sambandh wala
rishta nahi hai.. Jaanti aur samajhti hu ki aap meri parwaah karti hai aur jo bhi
keh rahi hai wo mere atche jiwan ke liye bilkul thik kaha hai aapne. Par sab
fainsle insaan khud bhi nahi kar sakta. Abhi 6 mahine baaki hai mere byaah me
aur itne samay me mujhe agar kuch jaruri lagta hai toh wo 6 lamhe bhi agar
Arjun ke sath naseeb ho jaaye. Jis se shaadi hone ja rahi hai wo bhi insaan atcha
aur dekha-bhala he hai. Pati ka haq bhi uska hoga aur main sath bhi nibhaungi.
Par Arjun mujhme aisa he rum chuka hai jaise paani me ye shakkar..", Jasleen
ke itne gehre udharan par bhi Deepa bhi ke paas iska jawaab tha. Wo shakkar
ghula paani ka lauta uske hath se lete hue unhone usme nimbu, kala namak aur
pudina ghol diya jawaab dene se pehle. Fir kuch baraf ki dali gira kar hilane
lagi.
"Pehla ehsaas toh bhulaye nahi bhoolta Jass.. Aur Arjun ka toh kahi gehra
prabhaav hoga lekin dekh jara ab isme sirf Arjun wali mithaas he hai ya iska
swaad naye naye rishto ke ghulne par kuch badla hua aur behtar hai.? Yahi
duniya hai Jass..isme kisi ek ke aane aur chale jaane se uski yaadein toh bachi
rehti hai par jagah jarur bharti hai. Maa-baap, pati aur sasural ke rishtey is khatte meethe paani jaise he hai jinme Arjun ki chaap toh hogi par wajood nahi.
Mere sath bhi toh uska bandhan judd chuka hai lekin kya wo jiwanbhar mere
sath reh sakega? Pyaar ko barkaraar rakhne ke liye yaadein he bahot hai Jass..
Jab wo hansil na ho sake. Aur iska dukh manane ke bajaye zindagi ko aur behtar
karke wo yaadein apne paas rakho. Haan ye aane wale jitne din hai, unme main
tumhare sath hu aur Arjun jab bhi aaye toh tum us se yaha nischint ho kar milo.
Aur Renam ka kissa jaisa hai waisa he rahega, jitna main samajhti hu. Lo ab
chakho ye shikanji, jo chote mukhiya ji ne banani sikhaai thi. Hahaha.. iske
baad madad karna meri kapde dhulwane me."
"Wo toh kar he dungi lekin Arjun jaise nahi.. Uska andaaj bas wahi kar sakta
hai, jism par pehne kapde dhone wala.", Jasleen ne ek aankh daba kar apni baat
kehte ke sath he wo thanda khatta meetha paani ka bhara gilaas thaam liya.
Bhabhi bhi sar jhuka kar hansti hui wahi pal yaad karne lagi jab Arjun ne unke
sath yaha bahar aangan me kaise vastra dhulwaye the. Mann halka ho he gaya
tha aakhir Jasleen ka aur uska dampatya jiwan wala safar kuch dur tha jiske
pehle uski aas bas Arjun tak milne ko simit rahi.
.
.
"Ye tumhari bhabhi hai bhai, Rekha.. aur ye meri dusri bitiya.. Ritu Sharma..
MBBS kar rahi hai mujhse behtar doctor ban ne ke liye.", Jaha hall me logo ka
hujum ab kursiyon par baith chuka tha ya khaane peene me vyast ho gaya, wahi
manch par lage laal sunehrai sinhasan se sofe par abhi filhaal Vishnu ko he
baithaya gaya tha. Umed ne Rajeshwari ji aur Vinni ka parichaya karwaya tha
Vishnu se aur fir Madhuri ko milwaya uske in chacha se jinka vivaah hone ja
raha tha. Ant me Komal, Ritu aur Rekha sang stage par Shankar ne biwi aur
choti beti se mulakaat karwaai toh Vishnu ne jhuk kar Rekha ke charan sparsh
kiye.. Yaha aashirwad lena bhi dil ka ehsaas he tha Vishnu ke chahe Shankar
aur uske beech kabhi chote bade wala rishta na raha ho par Rekha aakhir thi toh
uski badi bhabhi he.
"Aap wahi Vishnu ji hai na chacha jo Inder chacha ke sath he rehte the? Ek
black and white photo hai aapki unke paas album me. Safed bell bottom, yahi
moochhen aur chaude bade collar wali skintight shirt pehne the aap.. Aaj bhi
jyada nahi badle.. Congratulations..", Ritu ne sabse pehla uphaar diya tha
Vishnu ko aur wo bhi ekdum alag uphaar. Aam aur santre ke tayaar paudhe
takriban ek feet lambe jinki jado par kuch mitti ko kapde se bandh kar surakshit
rakha hua tha. Vishnu ne pehle toh Shankar ki aankhon ko dekha aur uske sath he Rekha ke chehre ko shanik maatra.. Phir Ritu ke sar par hath firaate hue
aapas me ek dhaage se bandhe dono paudhe le kar uske sar pe pyaar se hath
rakhte hue kaha.
"Naye jiwan par jo uphaar aaj tumne diya hai na bitiya, iski aasha jara si bhi
nahi thi lekin is se anmol kuch ho bhi nahi sakta. Tum mere liye ye itni khaas
kalme laaye ho toh inhe laga bhi tum dena, apne he hatho se. Kar sakti ho apne
is chacha ke liye itna? Aur main mehsoos kar sakta hu ki tum apne pita se kahi
jyada aatmkendrit aur majboot insaan ho. Tum jo bhi karogi, usme apna 100
pratishat dogi. Inke liye toh main dhanyawaad kehta bhi atcha nahi lagunga."
"Fir matt he kahiye kyonki pariwar ke bade dhanyawaad nahi balki aashirwad
he dete hai chhoto ko, jo aapne de he diya. Haan abhi mera maali idhar nahi hai
par wo aayega tab wahi apne hatho se lagayega inhe aur baad me main inhe
paani de dungi. Aakhir mehnat toh meri he kehlayegi.", Maali ka jikar he kiya
tha ki Rameshwar ji yaha Sunanda ji sang Kundanlal ji aur Sarpanch ji ko leke
aa pahuche. Aur wo aage the jinhone Ritu ki poori baat suni thi.
"Choti doctorni sahiba, wahi maali hai jiske kharonch bhi aa jaaye toh tumhari
aankhon ki ganga jamuna nahi rukti. Is se bach ke reha Vishnu beta.. Shankar ki
kundli me baithi toh apne baap ko he saadh liya.. Tumhari maa (Kaushalya ji)
bhi bas ek is se he darti hai ya yu kaho ke iske he vash me hai. Thodi dheel mili
nahi ki phir tum bhi ghutno par rahoge hamari is subh...choti hitler ke
saamne..", Rekha ji toh Komal ke sath Krishna ji aur Lalita ji ke paas chali gayi
thi lekin Ritu hatne ki bajaaye wahi Vishnu ji ki bagal me he aa baithi. Uske
nana naani bhi hans rahe the aur Shankar ji bhi.
"Haan jara aap bhi bagal me dekh lijiye bau ji.. Daadi ko Hitler bol rahe ho wo
bhi aise sabke saamne. Hahaha. Dekh liya chacha ji aapne? Hamre bau ji
kanoon ki kitaab me toh pehle sthaan par hai lekin jaha baat daadi ki ho toh..
Hahaha.. Waise Aaru sabse jyada toh inka he laadla hai.", Ab Pandit ji ko apne
upar baat aati dikhi toh pehle chaunkne ke baad phir muskurate hue unhone
apne samdhi samdhan se Vishnu ko milawaya. Ab udhar se mile shagun Ritu ne
apni he goad me rakh liye aankh matkate hue.
Vishnu ke chehre se vivaah ke samay rehne wali ghabrahat bahot hadd tak dur
ho chali thi is hansmukh bhatiji ki wajah se. Sabhi ke jaane ke baad Vishnu ji ne
he Ritu se baat shuru ki.
"Bitiya, mere anumaan ke viprit yaha sabhi log shamil hue hai. Aur jab sabhi
log aaye toh phir ye sabse chote bhatije shri kyun nahi aaye? Main jabse wapis
aaya hu na bitiya, bas sunta raha hu tumhare Arjun ke baare me.. Aur Umed
bhai se le kar swayam bauji ne bhi yahi kaha ke ek tum ho uske sabse adhik
kareeb. Ab tum bhi apni chhutiyan beech me chhod kar aayi jo behad atcha laga
lekin Arjun ko kisi ne bhi nahi kaha aane ke liye. Maa ji se suna tha ki wo itni
dur safar karke nahi aa sakta tha toh ek din baad bhej dete.", Vishnu ji ki aisi
baat sunn kar halchal toh Ritu ke dil me bhi uthi ki sablog ek he baat kehte hai
ki Arjun bas uske he sabse kareeb hai. Bauji bhi apne shabdo ko mushkil se rok
paaye the jaha unke mooh se Subhadra nikalne wala tha. Ab uska chehra kahi
jyada he prajwal dikha Vishnu ji ko.
"Wo bulaane ya na bulaane se kaam thodi na karta hai chacha ji.. Wo aise milne
aaye na aaye lekin mauke ki samajh Arjun ko atche se pata hai. Uski parwaah ki
wajah se he daadi ne yaha aane ke liye mana kiya tha par main jaanti hu ki wo
aapke jiwan ke aise eham awsar par har haal me shaamil hoga. Lijiye ab hamari
dulhan chachi ji bhi aa rahi hai. Main chalti hu.", Ritu ne sabhi ko dwaar ki taraf
dekhte paya jaha se laal chunni ki chhaya me surkh rang ke jode me dhime
kadmo se chalti hui Kuljit Kaur jo ab Vardhan ban ne wali thi, idhar he aati
dikhi. Yaha bhi Walia ji he apni is mameri behan ke bade bhai ka jimma nibha
rahe the ek chhor us chhaya karti chunni ka thaame. Pushpvarsha ke sath he
baaki baraati gharaati bhi hath me thaame phulo ke patte chhidakne lage.
Vishnu toh apni aankhen sthir he na rakh saka aisi khoobsurti ko niharne par.
Bhare badan wali wo mahila jaha pehli mulakaat me sadharan se salwar kameej
me mili thi, aaj kalaai tak laal chooda, mehndi, gale me swarn-haar ke sath
hontho par bhi surkh laali aur hatho me kaleere pehne wo apne dono hatho se
lehnge ko sambhale thi. Sar par sunehari kinaaro wali laal reshmi ghunghat me
Kuljeet Kaur ka bhara hua aakarshak chehra saundarya ke alag he paribhasha
likh gaya Vishnu ke dil me.
"Kahi matt jana bhatiji.. hume ghabrahat ho rahi hai..", Bas itna kehne ke sath
Vishnu ne Ritu se ye guhaar lagaai ki uth kar kahi na jaaye. Wo muskurati hui ek pal ke liye uthi aur sath he apne is chacha ko bhi khada kiya kaan me ye
kehte hue.
"Chacha ji, hath abhi se thaam lijiye chachi ka. Ab ye bandhan judd chuka hai
aur main toh apne chacha chachi ke he beech baithungi. Shagun jo katthe karne
hai mujhe.. hahaha..", Walia ji aur Kuljeet ke dusre bhai sahab manch se pehle
ruke toh Ritu ne he apne chacha chachi ka ek ek hath thaam kar unhe aapas me
jodd diya. Vishnu ke sath aaj toh Kuljeet Kaur ke bhi hath me spasht kampann
thi par dono ne jaise he ek dusre ko dekha toh kahi na kahi pyaar ho he chuka
tha. Ritu kab inke beech se aujhal hui dono ko khabar na hui aur shukriya kehti
Kuljeet ko pehle manch par aane me Vishnu ne madad ki aur Alka ne unke
lehnge ko sambhala. Aarti ke sath Madhu bua le kar aayi thi wo badi
varmalayen jo dono ke hatho me saunpi gayi.
"Aise na ye rasam hone wali chacha ji.. Thodi der jarur hui aane me lekin intjaar
toh baaki sab bhi karte thoda. Chachi ji, inhone apne jiwan me aapko shamil
kiya wo bhi itne baras avivahit reh kar, thoda aur karna chahiye tha ya nahi?
Waise main hu aapka chota sa munna bhatija, Arjun. Aashirwad abhi de dijiye,
shagun baad me le lunga.", Arjun ne jis tarah se pravesh kiya tha bheed ke
beech se nikal kar, jaha kisi ka dhyaan na gaya tha wo sabko hairaan he kar
gaya. Yaha wo Kuljeet Kaur ke paanv chhoone ke baad Vishnu ji se toh seedha
gale lag kar mila jo bas achraj se is lambe chaude yuvak ko dekh rahe the jiske
sar par gulaabi pagdi aur badan badhiya kurte pajame me qaid tha. Ab Kuljeet
ka dhyaan us bala si khoobsurat ladki par gaya jo is pehalwan jaise sharir aur
masoom shakal ke yuvak sang upar aayi thi.
Jaisa aankhon ka rang tha waise he vastro me uska gulabi badan qaid tha.
"Arre mere bail tu na tik saka ghar pe aur sath isko bhi le aaya jo kal aane ke
liye mana kar rahi thi? Apna haq jamaane laga hai tu abhi se meri gudiya par.
Varmala ke he beech tapak pade tum dono. Bahu, is bailbuddhi ne toh apna
parichaya aur haq dikha diya.. Ye meri pyaari gudiya hai Preeti Puri jo padhaai
ke baad Preeti Sharma ban ke tumhari sewa karegi.", Ritu apni daadi ki bagal
me he khadi Preeti ke gaal khinch kar jaise usko tang kar rahi thi aur daadi
dwara Preeti ka haaliya aur bhaavi parichaya dene par Kuljeet ne usko bade
sneh se gale se laga kar mulakaat ki. "Matlab mera bhatija toh pehle se apni lagaam sath liye hue hai. Yahi sath me
na karwa de inki varmala bhi beeji (maa).?"
"Hahaha.. Arre bhai inka abhi ye sab chalne do jitne chal raha.. Pehle tum dono
ek dusre ko baandho..", Narinder ji ne he Vishnu ke dono hath aage uthwa kar
bhare manch par he mala Kuljeet ke gale me peharwa di. Taaliyon ki goonj se
pandaal bhar utha tha aur ek baar fir se phool barasne lage. Preeti ko toh Ritu
Alka ne apne paas he waha khinch liya par idhar se Arjun ko jarur Kaushalya ji
alag le gayi. Dulhan ne bhi dulhe ko haar pehraya aur sabne aashirwad
shubhkaamnaye di. Vishnu khush tha aur apni dulhan ko bagal me baithe dekh
kar sharmate hue chehra saamne kar liya. Wo Arjun ko he khoj raha tha jo
kursiyon ke kaafile se aage ek taraf apni daadi se kaan khinchwa raha tha.
Rameshwar ji, Arjun ke nana naani, Purnima ji aur Sambhv baba ne bhi us
bailbudhi ko gher liya tha jis wajah se khaan khinchaai toh ruki aur wo sabse
milne ke baad mundan karwaye us pahaad ke seene lag gaya. Sambhav baba the
aakhir uske aur duniya me ekmatra praani Arjun he tha jiske sath unhe pita hone
ka ehsaas milta tha. Guru-shishya, tau-bhatija aur duniya ke tamaam ras the
unke beech agaadh prem ke sath. Hath ke ishare se unhone Arjun ko apni bagal
me karne ke baad Preeti ki he jaankari li thi shayad. Manch par ladkiyan tasvire
karwa rahi thi jinme pariwar ki sabhi maujood thi, jagah adla badli karti hui.
"Aap bahot sundar ho chachi ji.. ye hamari Pinki didi hai na, inse bhi jyada..
Chacha ji ne sahi intjaar kiya jo tapasya ke badle aap jaisi khoobsurat aur pyaari
dulhan naseeb hui.", Alka ne aisa isliye kaha tha ki Priyanka ne aaj surkh salwar
kameej he pehna tha aur wo lagti bhi toh punjaban he thi poori. Kuljeet ne bhi
halke se muskurate hue sabka parichaya liya aur ab Vishnu ji akele se padd gaye
the in ladkiyon ke shor ke beech. Jab Rameshwar ji aur Kaushlya ji manch par
aaye toh unhone he ya mandali bhang ki par Ritu ko Vishnu ji ne apne paas roka
aur Preeti ka hath Kuljeet ne nahi chhoda. Bahu ke gale me Kaushalya ji aur
Purnima ji ne he mil kar ek shagun ka haar pehnaya. Dono ki jholi me shagun
dene ke baad silsila shuru kar diya gaya jisme har sambandhi mehmaan manch
par aane lage. Arjun toh tasvir karwane ke baad Ritu ke kaan me kuch batane ke
sath car ki chabhi de kar apne dost Sandeep ke sath mashgool ho gaya aur Ritu
sahi mauka dekh kar apni maa ka hath pakad kar pandaal se khisak chali. Preeti
ab Vinni, Alka ke sath Kaushalya ji ki mandali ke beech the jaha uska abhi se
bahu wala rutba ban ne laga tha. Col sahab toh gadgad ho uthe the in dono ke
eksath aise aane par.