Update 224
Wajah aur Vishwas (3)
Saal 2008-09
'Sagar ki.. gehraai se.. gehra hai apna pyaar..... Sehraaon ki.. in hawaaon me.. kaise aayegi bahaar...Kaha se ye hawa aayi...Ghataaye kaali kyun chhaayi.. Khafa ho gaye hum... Juda ho gaye hum...', tej raftaar chalti us chamchamati kaali car ke bhitar ye geet jis tarah goonj raha tha, uske anusaar he steering par taal thokne ke sath bol gungunata hua ye aakarshak yuvak jaise duniya me aaj sabse jyada khush tha. Bagal wali seat par baithi us se bhi kahi jyada khoobsurat yuvti usko dekh dekh kar he khush hoti rahi. Chaude highway par 130-140 ki raftaar se toh inhe koyi lena dena he na tha aur pichli seat par chamchamate dher saare uphaaro ke packet batate the ki inki manzil is khushi ki wajah thi. Dono ke darmiyaan rakhe us kaale phone ki ghanti toh sunaai di lekin motorola likhe us khulne wale phone ke upar he jalti neeli roshni par khaas naam ubharta dekh yuvti ne awaaj dhimi karne ke baad phone khol kar seedha yuvak ke kaan par he laga diya.
"Tum ek ghanta deri se nikle ho aur phone karke bataya bhi nahi. Kitni der lagegi tumhe aur contract mila?", Saamne se jo awaaj aayi wo yakinan yuvak par bhadakne ka poora haq rakhti thi lekin badle me wo muskuraye ja raha tha.
"Na main jaanu.. na tu jaane..."
"Oh shutup Mr idiot.. Stop singing and answer my question. Batao na baba kab tak aa rahe ho? Contract toh tumhe mil gaya hai. Dekho maa-papa aur wo billi bhi nikal chuke hai. Unke aane se pehle dhero kaam baaki hai aur Abhi apne papa ko miss kar raha hai.", Yuvti ki awaaj me kuch gambhirta thi lekin yuvak sab sun kar bagal me baithi khoobsurat sangini ko dekhte hue jawaab dene laga jo usko saamne najar rakhne ka ishara de rahi thi.
"Bhaiya aur bhabhi mujhse pehle pahoch jaayenge aur farmhouse par sab tayaari ho chuki hai. Tau ji ka phone aaya tha didi ko thode time pehle. Mujhe bas ek ghanta lagega ye 100 kilometer paar karne me. Abhi ko bolo ki aaj uska birthday hai aur Innu gift me usko, mumma, papa aur mausi ko Disneyland leke jaane wali. Motti pahuch gayi na udhar? Aur uski bua?", Yuvak ne gati par dhyaan dene ke baad saamne dekha toh ek car us se bhi kahi tej nikalti hui aage aage chalne lagi jisko dekh kar wo aise muskuraya jaise wo gaadi jaankar ki ho. 0404
"Didi ko phone do. Tumse baat karna he bekaar hai kyonki main jo pooch rahi hu wo bata nahi rahe ulta disneyland ki baatein liye baithe ho. Idiot tumne abhi chachi ko lena hai aur wo pichle 2 ghante se wait kar rahi hai tumhara. Do phone didi ko.", Is baar phone wahi sunn ne lagi jo bagal me baithi thi. Yaha highway par alag he race chaalu ho chuki thi us aage daudti chamchamti car aur is yuvak ki gaadi me. Kabhi ye aage toh kabhi wo aur dekhte he dekhte raftaar 210 ja lagi lekin haar koyi maan ne ko tayaar he nahi tha.
"Stop this madness.. Wo toh paagal hai he aur tum usko badhava dene lagte ho.", Phone rakha ja chuka tha aur daant sunte he yuvak ne saamne wale ko jeetne diya lekin kuch duri taye hone ke baad ye dono he car sadak kinare ruki thi. Andhere me bas indicator chas-bujh karte timtimate rahe aur fir jaise wo gaadiyan, sadak aur sabkuch andhere me vileen ho gaya.
"Aahhhhhhhh. Mera sar... mera sar dukh raha hai.", Chehre par kuch purane jakhmo ke nishaan aur ghani daadhi wala ye vyakti aankhein kholne ke baad tadapne sa laga jiska hath thaamti wo 35-36 baras ki khoobsurat mahila doctor usko shaant karne lagi.
"Sab thik hai Mr Arjun aur aaj tumhari progress pichli baar se bhi jyada successful rahi. You know, jitne hum apne andar se dardbhara ateet bahar nahi fenk dete itne hum bahar ki duniya me khush nahi reh sakenge. Waise abhi bhi tumhara subconscious brain bahot jyada strong hai aur hume aise 8-10 sessions aur karne padenge. Ek doctor aur tumhari dost hone ke naate mujhe ye mahine me 2 se jyada nahi karne chahiye lekin tumhare maamle me har week bhi possible hai. Toh summery kya hai pichle 6 sessions ki Mr Arjun?", Ab ye mahila doctor uska hath chhodne ke baad araam se apni kursi par peeth tikate hue peshewar andaaj me najar aayi. Arjun Sharma bhi mareej wale bister se uth kar uske saamne paanv latakye baitha kuch pal us khoobsurat lekin sapaat se chehre ko dekhta raha.
"Mera dard aur ateet jyada purana nahi hai Mrs Singh, bas jakham bahot gehre hai. Main ab chalne phirne ki haalat me hu aur ab mera yaha rukne ka koyi matlab nahi rehta. Waise aapne kaha ki aap meri dost hai toh 2 sawaal pooch sakta hu?", Steel ke mej se paani ka gilaas utha kar ek ghoonte lene ke baad wo apni jaangh ko jaanchne laga. Shayad bhitar kuch ho jo mareej wale hare gown ki wajah se dikhai na diya. Gown ke upari 2 button band karne ke sath seene par lagi taare utaar kar usi mej par rakh kar wo ab is mahila ko dobara dekhne laga tha jiske chehre par ab sapaat bhaav nahi the.
"Dr Singh bhi keh sakte ho agar naam nahi lena toh. Aur pucho jo puchna hai.", Ye sapaat sa jawaab dene ke baad wo khud he Arjun ki jaangh ka jaayja lene lagi jaise najre milane se bach rahi ho.
"Kya hum aaj bhi dost hai? Kya aap apne ateet ya dard ko poori tarah se nikalne me kaamyab ho paayi? Agar mere pehle sawaal ka jawaab haan hai tabhi dusre ke jawaab dena Dr Singh. Sach kahu toh mujhe jara si bhi ummeed nahi thi ki duniya ke is kone me meri mulakaat aapse hogi aur wo bhi aise halaat me jab main chalne firne ki haalat toh kya hosh me he nahi tha.", Arjun ke chehre par aayi hatasha aur dukh dekhte hue is mahila ko jaise ek sukoon sa mila. Wo sard si muskaan liye usko aise taak rahi thi jaise Arjun ki haalat par taras ke sath usko khushi mili ho.
"Dost. Ye rishta tumne banaya tha Arjun jabki maine sirf aur sirf tumse sacha pyaar kiya. Us waqt tumne mujhe wajah di thi ki abhi samay lena chahiye aur hamare darmiyan waisa rishta mumkin nahi. Maine tumhara kaha mana kyonki pyaar me aisa karna bhi toh jaruri hai. Kya kehte the tum ki vishwas har rishtey me sabse eham tatva hai, particle hai ya element I don't care. Sagi bua ki beti nahi thi main tumhari chahe sage se badh kar pyaar kyun na ho aapas me lekin tumne kya kiya Arjun? Batao tumne kisko apna jiwansathi chuna? Mujhe wajah do aur wajah thos honi chahiye waisa karne ki.", Is baar waha koyi doctor nahi thi balki ek itihaas he saamne aa khada hua tha jisme ye dono he shamil the kabhi.
"Main.. main is baare me baat nahi karna chahta Aaisha. Jiwan me dhero galtiyan hui hai mujhse lekin koyi bhi maine jaan boojh kar nahi ki. Par saja.. saja toh sabke hisse ki akele mujhe mil rahi hai. Tumhari maa ka bhi gunehgar main, tumhara bhi, apne pariwar ka bhi doshi main he hu lekin aaj tak mujhe khud wajah nahi pata chali ki 4 peedhiyon ke beech hui galtiyon ka kasoorwar main akela kaise hua. Jiwan me wajah dhoondte dhoondte dekho main apna sabkuch kho baitha. aahhhh", Paanv farsh par rakhne ke baad abhi ek kadam he liya tha usne aur mooh se dard bhari aah ke sath wo uncha tagda sharir dhamm se deh gaya. Aaisha, haan ye wahi Aaisha thi jisne kabhi Arjun se sachi mohabbat ki thi. Shalini Singh ki beti aur Umed Singh ki bhanji. Arjun dwara diye dard ke bawjood aaj wo us shaksh ko girte na dekh saki. Turant uski baah pakad kar poora bojh apne upar leti hui wo us bhari jism ko jaise taise dobara bister par litane me kaamyab ho he gayi.
"Tumhe abhi ek mahina lagega Arjun, kam se kam ek mahina khudse dobara chalne phirne me. Khud ko dosh dena band kar do ab aur khudko batorne ke baad apna pariwar aur pyaar wapis jodo. Tumhe ek saal se jyada hone ko aaya hai is gumnaami me jeete hue. Jaante bhi ho tumhare peeche se waha kya kya hua aur kitna kuch badla hai?", Ab Aaisha ek atche sanrakshak ki tarah uske chehre ko sehlane ke baad dono paanv ehtiyaat se bister par sahi karti hui kamar tak chaadar udha kar kareeb he aa baithi. Arjun ek pal uske chehre ko dekhne ke baad aankhein band kar chuka tha. Pandit Rameshwar Sharma ke sansar ka sabse majboot stambh asahaye aur akela tha apne pariwar se dur aur Aaisha ke sehlane maatra se uski band aankho se aansuo ki boonde bahar behne lagi jinhe dekh Aaisha bhi apne upar niyantran na rakhti hui uske seene se lipat fafakne lagi.
"Kaash main swarthi hota Aaisha. Meri maa ne mujhe jo sikhaya wo nahi sikhana chahiye tha unhe. Jabtak main sabse badla na le lunga mujhe chain nahi milega... chain nahi milega mujhe."
"Shhhhh.. Tumhe badle ki nahi pariwar ki jarurat hai Arjun. Jinhe doshi samajh rahe ho, wo tumhe itna pyaar karte hai ki unhe jaan de kar saabit karna bhi manjoor. Keh nahi sakenge apne mooh se kyonki tumhare sath sath unhone bhi toh dard saha aur apno ko khoya. Us raat ka aage ka sach thoda bahot mujhe bhi pata hai lekin usko ek saal se jyada ho chuka hai Arjun. Wo kaali raat apne sath bahot kuch le gayi lekin tumhe sirf utna he dikhaai diya jitne daayre me tum jee rahe the. Main waha nahi thi aur tum jaante he ho ki mujhe ghar chhode 4 saal se jyada ho chuke hai.", Arjun jaanta tha ki kyun Aaisha apna ghar pariwar chhod kar akele jiwan bita rahi thi par usne shaadi kar li thi ya nahi ye nahi pata tha.
"Aaj mujhe mera purse mil sakta hai Aaisha?"
"Aisa kya khaas hai us purse me jo tum har baar mujhse wahi maangte ho? Chalo aaj hamari dosti dobara hui hai toh main tumhe purse bhi de deti hu lekin shart ye hai ki jo bhi usme khaas cheej hai wo tum mujhe jarur dikhaoge.", Arjun ne geeli aankhon se seharsh he sar hilate hue khushi dikhai. Aur is kamre ki he ek almaari se tatolne ke baad wo bhoore rang ka chamde se bana purse liye Aaisha ek baar fir uske barabar aa baithi toh Arjun kuch samay tak apne batue ko bahar se he sehlata raha.
"Tumhari ID nahi hai isme jo police ne hospital me jama karwayi thi jab wo log tumhe yaha le kar aaye the. Baaki harek cheej andar he hogi. 5 manzil se koodne ki wajah se tumhara phone toh chaknachoor ho gaya, repair bhi nahi ho sakta.", Aur Aaisha ke itna batane ke baad Arjun ne kaanpti ungliyon se wo gupt jeb kholte hue 3x2 ki 4 tasvire bahar nikaali. Sabse upar tasvir uski maa ki he thi lekin shwet shyaam jaise wo tasvir ki tasvir khinchi gayi ho.
"Rekha maami. Inse khoobsurat aurat hamare pariwaro me toh koyi nahi dekhi aur shayad ye unke college ke samay ki hogi?", Ab Aaisha uske he sath leti tasvir dekh rahi thi. Parantu Arjun koyi jawaab diye bina bas us tasvir me he khoya raha. Dhero yaadein jinme sirf ek maa ki aseem mamta, uska pyaar aur wo saadgi jo sabse khaas thi. Aankhon me ek bar fir 2 boonde chalchala uthi aur iske sath he usne tasvir sabse peeche karte hue agle wali dekhi.
"Ye tumhare bache hai? Bas suna tha ki tumhari beti aur beta lagbhag ek umar ke hai. Isme ye dono he tumhare upar lete tumhe he dekh rahe hai par tumhara chehra nahi hai isme. Waise Inu aur Abhi, yahi naam hai na inke aur ab toh ye bade ho gaye honge thode.", Arjun toh tamatar se laal gaal wali us gol matol si gudiya aur apne jaise ghungrale baalo wale us nanhe se ladke ko dekhta he raha. Wo bheegi aankhon se muskura raha tha. Aur ab uske honth thartharaye jo kuch sookh chuke the.
"Inayat. Isko bas yahi pasand tha. Neend me bhi apni maa se khisak kar mere seene par aa letna. Ye 2 saal se upar ho gayi hogi ab toh aur bolne bhi lagi hogi. Ye mera beta hai Abhigyaan, meri maa ne he ye naam diya tha isko. Inu isko apni maa ka doodh bhi nahi peene deti thi aur ye bhi rone ki bajaye usko he dono maaon ka doodh peene deta. Jis din ye tasvir li gayi thi us din main subah 5 baje ghar lauta tha aur Preeti rasoi me jaane se pehle dono ko he mere pas sula gayi. Jab lauti toh ye dono uth kar mere seene par lete dikhe. Inki nanhi nanhi ungliyan mere chehre par sparsh karti toh ek alag sa ehsaas hota aur ye dono ek dusre ko muskura kar dekhne lagte. Ritu ne he polaroid camera se ye khinchi thi. Iske agle mahine he toh dono ke janamdin manaye ja rahe the.", Ek baar fir se Arjun ki aankhein band ho gayi. Wahi toh kaali raat thi jiski kahaani batane ki himmat tak nahi juta pa raha tha ye shaksh jabse hosh aaya tha.
"Wow. Kismat ho toh tumhare jaisi. Ritu aur Preeti jitni khoobsurat biwiyan milne ke baad itne pyaare bache dono se hue.", Ab Arjun ne dobara tasvir palti toh Aaisha ka kehna uchit tha lekin is tasvir me Ritu aur Preeti ke sath koyi aur bhi thi. Ye tasvir jaise unhone khud he li thi camera ke saamne aa kar.
"Ye toh aur bhi jyada sundar ho gayi hai lekin ye Ritu ke right side kaun hai? Isko toh maine kabhi nahi dekha."
"Aur ab kabhi dekh bhi nahi sakti. Haan ye tumhare kaam ki tasvir hai aur atche se jaanti bhi ho tum inhe.", Arjun ne teen tasvire batue ki gupt jeb me rakhne ke baad aankhein paunchte hue aakhiri photo dikhai jisme ek khoobsurat mahila ek bache ko goad me liye thi. Dono ka sirf aadha jism he us tasvir me aa paya tha. Aaisha khud usko hath me le kar gor se dekhne lagi.
"Vinni didi... Ye Vinita didi hai na lekin inki photo tumhare.. matlab.. Inki shaadi ho gayi thi 3 saal pehle kisi architect se. Mere phone me inki koyi photo nahi hai."
"Isliye toh ye main tumhe de raha hu. Isko apne paas he rakh lo. Aur ab main sona chahta hu."
"Maine abhi tak shaadi nahi ki hai. Bas bata rahi hu.", Arjun ne apne kareeb leti Aaisha ko dekha aur aankhein band karte hue ye aakhiri baat kahi.
"Khushkismat ho tum. Main bhi nahi karta toh kayi zindagiyan salamat hoti. Meri biwiyan, mere bache aur pariwar sath hota. Waqt ke sath tooti haddiyan toh judd jaati hai Aaisha lekin hui galityon ke parinaam nahi badalte. Har gujarte din ke sath insaan aur dard sehta hai, itna sehta hai ki usko maut he apni manzil lagne lagti hai."
"Pyaar ko dawa bana liya jaaye toh waqt ke sath dard dur bhi ho jata hai Arjun. Kam se kam apne bacho ke baare me toh socho jinke paas bas ek maa he bachi hai. Baap unse dur yaha ek badi naukri ke bawjood khud ko khatam karne par laga hai. Socho ki agar bachpan me tumhare sar pe pita ka saya nahi hota toh tumhara jiwan utna khush-haal banta jitna maine dekha hai.?"
"Kash waisa hota. Darwaja aur light band karti jana.", Neend ki dawa mooh me chabate hue ek aur ghoont paani ka lene ke baad Arjun apna chehra takiye me dabaye karwat le chuka tha. Aankhon me ab dobara aansu nikalne lage the par ab wo akela tha is andhere kamre me aur darwaje ke dusri taraf apni aankhein saaf karti hui Aaisha koyi number milane lagi thi.
"Mere bas ka nahi hai ab aur sehna. Kaise bhi karke le jao isko aur mujhe baksho."
.
.
Saal 1998, 9 June
"Bhaiya bhabhi aap log? Maa, daadi dekho bhaiya bhabhi laut aaye..", Sanjiv thik 10 baje apne ghar aa pahucha tha jaha gaadi ghar me pravesh karte he saamna hua Aarti, Tara aur Madhuri se. Ye utsaah Madhuri ne dikhaya tha jaisa amuman hota nahi tha lekin aaj hua bhi aur Sanjiv khud bhi baari baari se teeno se gale lag kar mila. Radhika ke sath Nikita bhi gaadi se utari toh Aarti ne he unhe aangan me rok liya. Sanjiv wajah jaanta tha beshak ye log raat me laute the lekin Kaushalya ji bina inki nazar utaare kaha pravesh karne deti. Dekhte he dekhte bahar aangan me he ghar ka har sadasya aa pahucha tha inke swagat me siwaye Ritu, Arjun aur Rameshwar ji ke.
"Arre moorakh tu ab chhada nahi raha jo raat beraat safar karta hai. Bahu aur uski behan sath hai toh subah nikal leta. Jug jug jiyo bahu, prabhu narayan tumhe hamesha khush rakhe aur tumhe bhi Nikita beti. Lalita, paanv dhulva bacho ke. Beta geela nahi karenge, bas shagun hai.", Kaushalya ji bhi in teeno ko dekh kar atyadhik prasann ho uthi lekin Sanjiv ke kaan khinchne ka awsar kaise jaane deti wo. Yaha Rajkumar ji aur unke dono chote bhaiyon ne bhi Sanjiv ko jor se gale lagaya. Haan Narinder se yaha bhi baaj naa aaye.
"Maa, 2-2 pataakhe sath ho toh phir dileri dikhane ka mauka kaun chhodta. Sanjiv baabu, bade sahi waqt laute ho yar tum."
"Arre naaspeete thoda dekh ke bola kar. Teri bahu hai aur dusri beti. Bhabhi Arjun ki lagti hai teri nahi.", Yaha Shankar ji ke sath Rajkumar ji ne sara samaan utarwaya toh Kaushalya ji sabke saamne Narinder ji par he pil padi jo apni maa ke aage apni badi bhabhi ko dhakelte se ek aur bhaag liye.
"Oh meri maa jab baap bete ki jooti barabar ho jaaye toh chota bada na hota kuch. Aur bahu hai toh bahu he rahegi lekin Sanjiv se majaak karne ka haq mera hamesha rahega. Aur suna laale di jaan, pher kaisa raha tera Kerala bhraman?", Sanjiv ne muskurate hue pehle apni maa aur dono chachiyon ke paanv chhuye aur fir wo Alka, Tara, Komal se mila jo Radhika aur Nikki ko sath liye baithak me aa pahuchi thi. Sabhi ka khana toh ho he chuka tha lekin ab ye log aaye the isliye Rekha ji rasoi me chali gayi aur unke sath Rupali Aarti.
"Sab atcha he raha chacha ji lekin meri gat nahi is mandir bina. Gali me he aaya tha aur tab laga ki jaise sabse khaas jagah toh yahi reh gayi thi. Radhika tum hath mooh dho lo itne aur Nikita ko bhi fresh hona hoga.", Lekin Sanjiv ke kehne par bhi Radhika ki najre idhar udhar he ghoomti rahi. Wo usko he khoj rahi thi jis se khul kar milne ke liye Sanjiv usko yaha se bhej raha tha. Apne bade paute ki baat sunn kar Kaushalya ji ne bagal me baithte hue usko apne gale laga kar dhero aashirwaad diye.
"Jiske liye tu apni gharwali ko bhej raha hai na wo bhi us se mil kar he jaayegi lekin tum logo ko jyada intjaar na karna padd jaaye uske liye."
"Arjun ghar me nahi hai kya daadi ji?"
"Aur wo ghar me hota toh kya tu abhi tak yaha baitha hota? Tera ladla tujhe gate se bahar pakad leta. Wo aur papa pata nahi kaha nikal gaye 2 ghante pehle. Tum log fresh ho jao pehle aur itne khana bhi lag jaayega. Komal beta ye Ritu najar nahi aa rahi aur Pinki tum apni bhabhi ko le jao upar unke kamre me.", Shankar ji ne jab ye bataya toh ek pal ke liye Sanjiv ka chehra bujh sa gaya aur Priyanka ke sath Tara bhi Radhika aur Nikki ko bahar wali seedhiyon se upar wali manzil par le gayi. Arjun ka kamra khula tha is taraf se.
"Bauji 8 baje se nikle hue hai? Wo toh is time par kahi nahi jaate jitna mujhe dhyaan hai chacha ji. Aap log ghar pe rehte hai tab toh bilkul bhi nahi. Arjun thik hai na?", Sanjiv ko aise chinta karte dekh Kaushalya ji ne Rupali se paani ka gilaas le kar pehle Sanjiv ko pakdaya aur fir boli.
"Dada paute meri samajh se bahar hai aajkal lekin unhe pata hota na ki tu aa raha hai toh wo dono he ruk jaate ghar. Arjun thik hai lekin bhatakta rehta hai kyonki tu jo nahi tha yaha. Waise tu 2 din pehle kyun aaya?"
"Kyun ka toh mujhe bhi nahi pata daadi ji lekin ye yaad hai ki 10 June ko aapka janamdin hota hai aur hamesha ki tarah subah ki pooja me hum sabhi maujood hote hai. Radhika ko laajmi isme hona chahiye kyonki pariwar ki kuch reet barkaraar rehni chahiye. Haan Munna ke bina itne din gujarne thode mushkil ho gaye the toh raat Delhi rukna thik nahi laga. Waise wo log motorcycle par gaye hai kya? Gaadi toh ghar me he khadi hai.", Ab Sanjiv ne wo baat kahi thi jo uske dil me thi aur aakhir me Arjun ke jaane ka vaahan pooch kar sabko thoda hairaan kar diya.
"Paini najar rakhta hai tu uski har cheej par. Dekh horn bhi baj gaya gaadi ka bahar.", Narinder ji ek laddu Shankar ko pakadane ke baad ek apne mooh me daal kar uth khade hue par Sanjiv kisi bache ki maafik unse pehle he bahar daud chala. Kaushalya ji toh uparwale ko dhanyawaad kar rahi thi aise bache dene ke liye.
"Namastey dada ji.", Rameshwar ji ab dono bhaiyon ke beech jo the. Arjun ghar ke bahar gaadi sahi se khadi kar raha tha aur idhar Sanjiv mila apne dada ji.
"Kamjor ho gaye ho beta kuch he din bahar rehne se. Dakshini bharat ka bhojan raas nahi aaya ya waha bhi kaam ki chinta kha rahi thi? Wo patandar jo bahar gaadi me hai na usko ja kar daboch lo. Aajkal uski gaadi apne baap ki tarah daudne lagi hai.", Rameshwar ji ne har baat dhime swar me he kahi thi lekin Sanjiv unki aut se nikalta us se pehle he uska sharir poora hawa me uth gaya.
"Aise kaise daboch lenge bhaiya mujhe bau ji? Surprise de he diya aapne toh... Waahh bhaiya I love you...", Arjun ruk ruk kar apni baat kehne ke sath Sanjiv ko gol gol ghumata raha jo chhootne ki koshish me viphal ho kar khudko he uske supurd kar gaya. Lekin Arjun ne aakhir unhe niche utara toh is baar Sanjiv ne majbooti se usko gale lagane ke baad thoda upar utha liya tha.
"Teri chhuttiyon me main tere paas nahi reh saka bhai lekin ab Sunday tak har din mera tere sath gujrega. Bahot miss kiya maine tujhe. Har us jagah jaha tu aur main sath hote toh wo jagah poori ho jaati.", Aaj ek bada bhai chote se prem pradarshan karte hue ye bhi dhyaan nahi de raha tha ki waha ghar ke baaki log bhi maujood hai. Arjun bhi unse kas kar gale lag gaya ek baar fir.
"Toh hum dono he chalte hai na dobara bhaiya. 25 din ki chhuttiyan toh baaki hai meri."
"Oye kambhakto ab khayaali pulaav baad me bana lena, bahot waqt hai tum dono ke paas. Aur subah uthte he sabse pehla kaam kya karna hai ye mujhe dobara yaad na dilwana pade lallu laal. Ab apni bhabhi se bhi mil le uske baad roti bhi khaani hai.", Rameshwar ji ka hath itna bhari tha ki Arjun ki peeth ko halke se thapedte he wo uchal sa utha. Sanjiv ka hath pakde wo apne dada ki baat par haami bharne ke baad seedha upar he bhaag liya.
"Umar ka dhyaan rakho ji aur ye ghar lautne ka samay hai aapka? Aisi kya aafat aan padi thi bhojan ke waqt he nikal liye? Dawaai ka time ho chala hai lekin abhi bhojan tak nahi kiya.", Kaushalya ji unhe sath liye apne kamre me aayi thi aur idhar inke dono bete toh yahi baithak me he pasar chuke the.
"Bhaagwan kuch kaam ann grehan karne ke baad nahi kiye ja sakte. Jana jaruri tha aur is bahane tumhare bailbudhi ko bhi thoda bahot gyaan de diya. Mera khana yahi le aao aur Radhika bitiya se hum subah mil lenge.", Rameshwar ji toh kamre me aate he kameej patloon badal kar pajame aur aadhi baah ki baniyaan dharan karte hue bister par ja baithe. Baithak aur idhar ke beech ka darwaja unhone he laga diya tha kyonki unke bete hanste bolte jaane kab sone wale the. Samay 10:30 baja rahi thi ghari aur Kaushalya ji pichle aangan me dakhil ho chuki thi inki thaali laane ke liye.
"Ouch...", Radhika ki toh darr ke maare jaan he sookh chali thi jab dabe paanv bhitar ghuse Arjun ne unhe kamar par choonti kaati. Waha maujood Priyanka, Tara aur Nikki ke sath Sanjiv bhi hansi na rok saka apni biwi ka safed hota mooh dekh kar. Lekin uske baad Radhika ne jo kiya Arjun ke sath wo dekhne wala tha.
"Atcha bachu mujhse he hoshiyari. Bhabhi ghar se kya gayi tumne toh lights he utarwa di kothi ki. Ghutne niche aur bolo bhabhi maa aainda main shaitaani nahi karunga.", Arjun ka kaan khinchte hue Radhika ne jo jo kaha Arjun ne waisa he kiya aur ghutne seedhe hote he wo apne bhai ke peeche khada ho kar badla lete hue bola.
"Aaj ghutne tikwaye hai na mere toh aapko iski saja mere bhaiya denge bhabhi. Aur is baar toh sirf kamar pe choonti kaati thi lekin dekhna agli baar main kandhe par utha ke bhaag lunga aapko."
"Teri aur tere bhaiya ki aisi dhulaai karungi machine wale patte chala kar ki saari shararat bhool jaaoge. Waise sach kahu toh tumhare bhaiya ke sath tumhi jana ab ghar se bahar kahi ghoomne. Maine toh kaan ke hath laga liye.", Aakhir bhabhi thi aur devar bhabhi ke beech jung jyada kaha chalti hai. Arjun ne bhi hansi majaak band karte hue paanv chhoone ki koshish ki toh unhone aage se usko gale he lagaya.
"Abse tumhare bhaiya ki bajaye mere sath tum he rahoge aur kahi jana hua toh bhi tumhe le ke jaungi main. Waise tum meri behan se toh mile he nahi.", Radhika bhabhi toh aise mulakaat karwa rahi thi jaise dono anjaan ho aapas me. Arjun ne bhi bas halke se hath mila kar abhivadan kiya Nikki ka. Uski behne aur bhai bhabhi jo maujood the yaha. Aur thik hath milane ke samay yaha Rupali dakhil hui.
"Bhaiya bhabhi niche khana lag gaya hai aap logo ko. Nikita didi aap bhi chaliye aur maa keh rahi hai ki Aaru tum kapde badal kar jaldi se khana faarig karo. Sab thake hue aaye hai toh inhe pareshan nahi karna.", Rupali ne jo hidayat di thi wo Arjun samajh chuka tha ki uski maa ka matlab kya hai.
"Chalo aap log niche pahucho, main 5 minute tak aata hu.", Arjun apne kamre me jaane se pehle Nikita ka chehra padhna nahi bhoola tha jaha khaas ummeed bhari thi. Lekin uski taraf dhyaan Radhika ka bhi tha aur sabke jaane ke baad unke kamre me bas Nikki aur Radhika he shesh the. Tara toh Sanjiv ko kuch dikhane ke liye apne sath he le gayi thi.
"Yar tum logo ka jo bhi hai wo majaak masti tak he hai na? Serious wala mamla hua toh dekh ye meri sasural hai Nikki aur Arjun.."
"Shhhh.. Main sab baat samajhti hu paagal aur hamari sirf atchi dosti hai chahe mere mann me uske liye jo bhi ho. Haan sone se pehle agar mujhe mauka mila toh main thoda waqt uske sath baat karna chahungi. Tu Sanjiv jiju ke sath kamra band karke araam se sona. Chal pehle khana kha lete hai jaha hamari wajah se baaki log jaage baithe hai. Main kapde sone se pehle he badlungi.", Radhika pashopesh me thi lekin jab Nikki ne jimmedari li thi toh wo sehaj hui. Kamre ki light band karke ye log niche gaye toh kapde badalne ke baad hath mooh dho kar seedhiyan utarne se pehle he Arjun ke dimaag me kuch aaya. Wo dusre hisse ki taraf badh gaya jaha teen kamre aur gym thi. Ritu-Alka ke kamre me khidki se he andhera dikh raha tha lekin Arjun jaanta tha ki uski behan bhitar he hai. Aahista se darwaja khol wo bahar se aati halki roshni me he bister par karwat ke bal leti Ritu ke kareeb ja pahucha. Akele me Ritu hamesha he chitt soya karti thi lekin aaj taange sikode wo apne chehre ke aage bhi hath rakhe dikhi.
'Aapko jaane anjaane dukh pahuchane ke liye maafi chahta hu aur aap thik kehti hai ki ab nadaan umar nahi hai. Vartmaan ki andekhi hamara bhavishya prabhavit kar sakti hai aur jaahir hai aapne aisa kuch dekha bhi hai. Aainda main aisa kuch nahi karunga jis se koyi aapke saamne sar uthaye. Mere liye mera jiwan aap he ho aur isme koyi bhi bahar wala aapke aage mujh par haq nahi dikhayega. Aapko aise dekh kar main sirf khudko saja de sakta hu lekin waisa karna aapko jyada dukhi karega. Sweet dreams. umaah.', Ritu ke kareeb baith kar wo uske hatho ko seene aur chehre ke aage se hata kar sahi karne ke baad paanv bhi seedhe karte hue apne dil ka haal bahot dhime dhime bata raha tha. AC ko 20 par karne ke baad ek mulayam chaadar gale tak udhane ke baad gaalo par aayi ek julf sahi karke haule se gaal ko chooma aur teesri baar maafi maang wo dabe paanv he bahar nikal gaya. Andhere me he Ritu ki namm aankhein kuch khuli aur usne apne aap se he kaha.
'Samajhte sab ho lekin galtiyan karna nahi chhodte. Ab jaan gaye ho toh yahi laut aana.'
.
.
"Gajju kya keh raha tha tujhe phone par? Tu uske baad scooter le kar phonebooth pe gaya tha na baat karne?", Darwaja band hone par baithak me bister lagaye ab Shankar Narinder apne ekaant me the aur unki baaton ka swar bhi dhima jo bagal wale kamre me vyavdhaan na pahucha sake.
"Dekh Shankar tujhse ye baat chupana to mere liye bhi sambhav nahi lekin jo baat Umed kar raha tha wo maa ke saamne ghar pe nahi ho sakti thi. Aur ye baat sachmuch bahot badi hai. Teri soch se bhi kahi jyada badi.", Narinder chhat ko taakte hue ye keh raha tha jis wajah se Shankar ko thoda uchakna pada lekin neend udd chuki thi.
"Matlab agar baat jaruri hone ke sath mujhse judi nahi hoti toh tu nahi batata?"
"Kaha na bhai ki ye baat tujhe batana jaruri hai chahe mujhe thik lage ya nahi. Umed seedha tujhe nahi bata sakta tha kyonki ye kaam maine saunpa tha usko. Aur kal maa ka janamdin hai toh pehle tu meri kasam kha ki aaj aur kal tu shaanti se ghar me rahega. Nahi toh bhool ja ke main tujhe kuch batane wala hu. Aur Umed se ugalwane ki koshish nahi karega.", Narinder jaanta tha ki Shankar ko ungli pasand nahi aur poori baat sunn ne ke liye wo har haal me uski kasam uthayega. Shankar vaade nahi todta tha.
"Bhai teri kasam jaisa tu kahega main karunga lekin ye baat mere sath maa se bhi judi hai na? Main yahi hu aur kal ka din toh maa ke sath he bitaunga jiski tayaari bhi kar rakhi hai maine. Ab bata bhi de aisa kya maamla hai jisme tujh jaisa tej taraar Gajju ki madad lene laga.", Shankar lagbhag gidgida he utha kyonki ab usko chinta ho rahi thi.
"Mama. Banwari mama jab gujra tab unke paas kaun tha? Matlab maa aur papa toh waha shaam se pehle he pahuche the aur tu sanskar par Raju bhai ke sath.", Yahi Shankar ka dimaag khatka aur usko samajh aa gaya tha ki Narinder kyon ghar se bahar gaya tha baat karne. Kaushalya ji ka prem apne laadle chhote bhai ke sath kisi udaharan se kam na tha aur wahi wo mama Shankar ke liye mama kam aur jiwan ka pehla khaas dost adhik tha. Ek tarah se Shankar ko Shankar banane wala Banwari he toh tha.
"Aage bata."
"Mauke ki najakat aur maa ki haalat dekh kar main bahot samay tak shaant raha bhai lekin meri sooyi mama ki maut par he atki rahi. Rupali ekmatra insaan thi mama ke jiwan me waha aur usko jyada samajh bhi nahi. Banwari mama kheto se chakkar laga kar subah ghar lauta aur aangan me gir pada. Is baat ki pushti Rupali ke sath he Hansmukh mama ne bhi kari toh pehli najar me hridyaghaat ya dil ka daura padna he lagega. Par tu toh doctor hai aur mama se har mahine milte rehne wala vyakti bhi. Bata unki koyi dawaai chal rahi thi? Jyada sharaab ya beedi peete the wo? Galat sangat thi unki ya koyi karja sar pe?"
"Na bhai mama beedi hukka nahi peeta tha aur paise toh main bhi leta rehta tha unse jab bhi jarurat padti thi lekin unhe wapis karta toh wo wahi paise maa ke khaate me girwa dete. Pichle 10 saalo me toh aaspas ke gaanv tak me unka kisi se vivaad nahi hua tha. Unke gaanv ke log jaha mama ki ijatt karte the aur ek awaaj par sath khade rehte wahi najdeek ke jitne gaanv kasbe the waha pukhta pehchaan aur dabish thi Banne mama ki. Maami se bahot pyaar tha jo maami ke dehaant ke baad sara Rupali par nyochhavar kar diya. Aise me bata koyi unke khilaaf saajish kaise karta.?"
"Dekh Shankar jo tu keh raha hai wo mujhe bhi pata hai lekin agar unka kisi se jhagda nahi tha toh iska matlab ye toh nahi ki unhone kisi ki khinchaai na ki ho. Jaanta hai jab tu XXXX me niyukt tha, matlab mama ke gaanv jis zile me padta hai waha par teri kisi jamindaar se garma garmi hui thi. Aur agar tere dimaag me wo maamla nahi aa raha toh bata deta hu ki tune unki bahu ko peit se kar diya tha.", Ab Shankar vismit sa apne bhai ko taakne laga jo kaafi purani baat uske saamne rakh raha tha.
"5 saal ho chuke honge us maamle ko aur wo jamindar nahi Rajendra patwari tha XXXX me. Aulaad khassi thi uski aur bahu ko maine nahi balki usne mujhe nyota diya tha. Lekin uska is sabse kya lena dena jab wo mama se mila he nahi tha kabhi?"
"Jis din mama ka dehant hua us se ek din pehle savere wo khet ka chakkar lagaane ke sath jameen ki paimaaish karwane gaye the. Gaanv dehaat me sarkari log bhi hisaab se chalte hai jaisa us din hua. Rajinder he waha aaya tha aur uske sath 4-5 uske he log the, sarkari ya tehsil se kanoongo nahi. Umed ka kehna hai ki jin logo ne usko poori ghatna ki jaankari di hai unke mutaabik waha pehle toh sadharan batchit aur milna julna hota raha. Baad me behas aur garma garmi hoti dekhi thi 2-3 majduro ne jo khet par lage the. Mama ne patwari aur uske 2 aadmiyon ke wahi thappad jadd ke bhagaya tha. Agle din wo jab chakkar lagane gaye toh hamesha wale samay ki bajaye 2 ghante deri se aaye the. Jin vastro me unki maut hui thi wo maa ne sambhaal kar mama ke kamre me he rakh diye the aakhiri nishaani ke taur par. Umed ka aadmi ghar gaya tha jaha par hamare he ek aur vayakti sambhal rakhta hai. Wo vastra poori tarah thik the lekin seene ke paas bahot chota sa khoon ka dhabba dikha thik jeb ke niche. Us jagah hamara dil hota hai na Shankar? Aur tum toh aise kitne he tarike jaante hoge kisi ko maarne ke jisme maut swabhavik lage.", Ab Shankar ke dimaag ki band nasse khul chuki thi. Wo sab maamla samajh raha tha lekin abhi uske paas bhi tha kuch batane ke liye.
"Main sab samajh gaya bhai aur iske sath main ek insaan ko aur jodd deta hu. Hansmukh mama ki dosti sabse gehri thi jamindar Harnaam ke sath jisne mama ko apne 40 kille usko bechne ka bhi kaha tha. Banwari mama ne mujhe Harnaam ka jikar karte waqt bataya tha ki uski beti bade patwari ke ghar ki bahu bani hai jiska Harnaam ghamand karta hai. Naam nahi bataya tha lekin ab jaha tumne aur Gajju ne itna kuch maloom kar liya toh ye baat bhi clear kar lo. Phir tum apna kaam karna aur ye maamla mere pas rahega. Kisi ko saja dene ke liye mujhe saboot nahi bas shak ki he jarurat hoti hai. Harnaam ka agar us patwari se samdhi wala rishta nikla toh dono ko dhadd tak apne he kheto me gaad kar unpar bhoond nahi chhode toh main mere mama ka saga nahi.", Ab Narinder muskurate hue apne bhai ke seene pe halka ghussa jadte hue bola.
"Umed na kaha hai ki uski taraf se Bhole ko ye khaas tohfa. Wo bhi jaanta hai ki tere liye Banwari mama kya maayne rakhte the isliye humne abhi tak kisi ki taraf bhi rukh nahi kiya. Kal maa ke sath samay bita aur parso ek toh confirm marega. Durbhagya hua Harnaam ka toh ek ke sath dusra muft. Fir maa ko kisi din bata dena sab asliyat lekin Roopali se kuch jaahir mat karna. Ab wo hamari mameri behan ki bajaye beti hai. Aur main jaanta hu ki mama usko bhi tere jaisa kaabil doctor banana chahte the jo sapna ab tu poora karega. Bas usko khunkhaar nahi banana.", Ab Shankar apne bhai ki taraf karwat liye leta muskura raha tha. Neeras jiwan me aakhirkar ek toh wajah mili thi usko thoda maja karne ki. Saja dene se adhik maja is doctor ko sharaab ya aurat se bhi nahi milta tha.
.
.
"Toh chote ke paas ab bahot badi gaadi hai? April se pehle tak cycle he thi aur kabhi kabhi mera scooter. Waise gaadi se yaad aaya ki tum aur dada ji ghante pehle bypaas ki taraf se laut rahe the.", Khaane ki mej par 4 log he khaane baithe the lekin Radhika ki bagal me Tara aur Nikki ke sath Aarti kuch khusar phusar me lagi thi. Priyanka yaha garam rotiyan pahucha rahi thi jinki ab jyada aavashyakta nahi thi. Badi mej par pehle he pulaav, kayi tarah ki sabjiyan, raita, salaad aur meetha lagaya gaya tha. Sabko aapas me vyast dekh kar Sanjiv ne dhimi awaaj me he pehle masti bhara tanj kiya aur fir ye sawaal.
"Matlab waha sadak kinare khadi gaadi apni he thi? Atchi baat hai lekin is mudde par agar hum akele ya kal baat kare toh thik nahi hoga bhaiya?", Arjun pulaav me raaita milate hue chammach gol gol chala raha tha. Usko jaha apne bhaiya ke lautne ki khushi thi wahi mann he mann apne kiye par aahat tha.
"Chal wo baat hum kal karenge jab pooja ke baad bahar chalenge lekin tum Delhi gaye the tab tumne bataya tha ki sirf Pallavi ko chhodne jana hai. Hamari baat bhi hui thi unke he ghar ke number se. Phir tumne kisi ko cellular phone se call karke milne ka kyun bataya? Mile bhi nahi?", Ab Arjun ka hath chalte chalte ekdum se ruk gaya. Aaspas dekha toh sirf Nikki ko he apni taraf taakte paya. Uski pyaari bhabhi toh Tara ko koyi kissa sunane me lagi thi.
"Aapko nahi pata ki waha par bauji bhi gaye the? Shabnam didi ka admission karwana tha waha aur Bindiya kaaki ke sath Shabnam ko agar atchi jagah rukna padta toh pehchan ke hotel se badhiya kya rehta? Aapne khaastaur par cellular phone ka jikar kyun kiya bhaiya?", Ab baari thi Sanjiv ke ulajhne ki jo naa me sar hilata hua bachna chahta tha lekin Arjun ne tabhi agla daav chala diya.
"Jaha par aap andhere me teer chalane ki koshish kar rahe hai na bhaiya waha par sirf main he baitha hu. Teer ki jarurat nahi hai aur jisko milne ka kaha tha usko vada nahi kiya tha balki yahi kaha tha ke mehmaan aaye toh main sath he aaunga toh maujood rehna. Lucky bhaiya bhi aapke peeche se aapke he kaamo par lage hue the lekin ab mera bhi ek chota sa mashwara hai.", Arjun ne dobara se har taraf jaanchne ke baad apne bhaiya se aur bhi dhimi awaaj me ye kaha tha.
"Hmmm"
"Aapki thaandarni khud he apna bhanda khulwa dengi. Unhe kahiye ki patto wali machine aur kisi ke saamne nahi bolna. Vakalat ka bataya hua hai unhone yaha ghar par aur unhe pata hona chahiye ki is ghar ka sabse mandbudhi sadasya main hu jo ye sab pakad leta hai toh baaki sab aadhe policewale hai janam se.", Ab sachmuch Sanjiv ko thaska laga tha lekin wo mand mand muskuraya apne bhai ke mashware par.
"Nayi nayi dulhan jyada tayaar hoti hai. Thoda tu he samay bita choti thaanedarni ke sath. Maine samjhane ki koshish ki toh mujh par he baras padegi. Waise maa bata rahi thi ki hum dono ko Madhuri ke sasural bhi jana padega?", Arjun ne bas sar hilaya aur khaane par dhyaan dene laga kyonki niche Nikki ka paanv uski taang sehlane laga tha. Wo bewkoof aisa us insaan ki bagal me baith kar rahi thi jo shaant hone ke sath har cheej par Arjun jaisi he najar rakhti thi.
"Mera toh ho gaya bhaiya aur main chala main gate band karne.", Arjun thaali uthaye apni jagah se khada hua toh Komal didi ne wo apne hath me pakad li. Ek pal ke liye he dono muskuraye the par Nikki Arjun ke uthne se jarur niraash hui.
"Kaha sone wala?"
"Ye baat ab mat kaha karo bhaiya. Haan jab bhabhi maayke jaayengi tab aapke he pas sounga lekin filhaal aap apni jagah fix aur main ajaad hu kahi bhi sone ke liye. Dil kara toh apne kamre me sounga lekin irada badla toh main meri maa ke paas. Kyon maa?", Arjun hath dhone ke baad rasoi se nikalti apni maa ke ek taraf se gale lagte hue chehka toh kareeb aayi Krishna ji ne uske sar pe chapat laga di.
"Mere paas bhi so sakta hai. Koyi manaahi nahi hai. Aur dekh le apne is munna ko Sanjiv jo tujhe taane de raha bahu aane par. Iski jab aayegi tab ye bhi ek he jagah pakka rahega."
"Chachi maa, mera byaah ho bhi jaayega toh kuch badalne nahi wala yaha ghar me. Wo bagal me he rehti hai aur aadhe se jyada is ghar me he time bitati hai. Wo Ritu didi ya Komal didi ke paas abhi se soti hai toh tab bhi soyegi. Main nahi bandhne wala ek kamre me. Kabhi meri maa ke paas, kabhi aapke aur kabhi meri darling taai ji ke paas.", Arjun ne Lalita ji ka gaal khinchte hue aisa kaha tha jis par sabki hansi nikal gayi aur Arjun ka ek baar aur kaan khincha gaya.
"Dekh le Rekha tere is lalla ko. Chal chabutare par tujhe sone se pehle susu karwau. Aaya bada maa aur taai ke paas sone wala byaah karke. Bhabhi ne toh yahi rehna hai lekin unki behan kya sochegi tere baare me?"
"Filhaal toh yahi soch rahi hongi Nikita ji ki dekho itne bade bache ko aaj bhi uski taai ji kaise jhaadti rehti hai. Sab hans rahe hai taai ji, kaan chhod do mera.", Wo susu wali baat koyi nayi nahi the baaki sabke liye jo Lalita ji ne kahi lekin Radhika aur Nikita jaha pehle ek dusre ko dekhne lagi wahi sabke sath mil kar unki bhi jordar hansi nikli. Radhika ki saas he toh sabse hansmukh insaan thi yaha jo kehte hue jyada nahi sochti thi.
"Bhabhi jaane do ab apne lalla ko nahi toh kya pata chabutare ki jagah yahi na nikkar gili kar de.", Krishna ji kaha mauka chookti jab Arjun unke beech khud aa phansa tha. Aur uski aisi haalat dekh kar ab Arjun ki behno ke sath sath bhaiya, bhabhi aur Nikita tak hanste hue dohre ho chale the.
"Maa aap he bacha lo.. Nahi taai ji nahi.. Nikkar nahi utaarni..", Arjun ke sath bas ye dikhawa kiya tha Lalita ji ne uski nikkar utarne ka aur wo aisa bahar ki taraf dauda jaise poonch me aag laga di gayi ho. Rekha ji ke sath sath ab Komal aur Rupali bhi is nokjhok par muskura rahi thi.
"Mummy ji sachmuch mujhe nahi pata tha ki yaha par khana hajam karne ke liye mehnat nahi karni padti hogi. Hahaha.. sorry. Par yaha se atcha mahol maine toh apni life me kahi nahi dekha. Lekin.."
"Lekin bhaiya kis par chale gaye yahi kehna chahti ho na bhabhi?", Tara ne turant he baat poori kar di thi jis par Sanjiv khisyata sa uthne laga toh Krishna ji ne wahi wapis baitha diya.
"Ye apni maa se jyada na teri serious choti saas ke paas jyada raha hai. Lekin ab toh ye bhi hansna seekh gaya Radhika aur sharmana bhi.", Sanjiv najre jhuka raha tha isliye Krishna ji ne jaane diya. Yaha 5-10 minute mehfil rehne wali thi kyonki rasoighar me bartan dhulne jaari the. Bahar tala lagane gaya Arjun filhaal Alka ke sath batiya raha tha jo kuch jaruri baat keh rahi thi ya sandesh jaisa kuch. Sanjiv ke aane se pehle he wo andar laut gayi aur Arjun gate khol kar apni gaadi andar karte waqt dekh raha tha ki bhaiya cigratte ki talab poori karne bahar aa rahe hai. Aaj ki raat Arjun ke liye bahot lambi hone wali thi kyonki Alka jaisa sandesh usko Nikki ne najro he najro me de diya tha. Aur musibat thi ki kal usko savere sabke uthne se pehle apne dada dwara saunpa karya bhi anjaam dena tha.
Copyright to enigma203
Join Our
Discord Server
For Daily Updates
