Update 225
Garam Naram (2)
'Lakshmi Narayan sabka bhala kare. Deen duniya ke dukh haro Govind, kirpa barsao sab par hey devi.', Peetal ki taukri me taaje phool liye Kaushalya ji aaj apne ghar ke mandir me aur din se kuch deri se haajri laga rahi thi. Ghar me unki bahuen bhi waqt se uthne ke baad tayaar ho kar unke he paas aane wali thi jab tak wo pooja ki tayaari poori karti. Hamesha wali aadat anusaar bina ujala kiye wo prabhu charno ke paas phulo ki taukri rakh kar mann me unka he sumiran karti hui deep- naivadh tayaar karne lagi. Kapaas se diye ki baati banate hue bhi wo sar jhukaye baithi Lakshmi-Narayan ke he jaap me lagi thi aur ek sadharan kaksh jitni us jagah par Komal-Madhuri dariyan bichhane chali aayi. Unhone bulb he roshan kiya tha ki dono ke sath sath Kaushalya ji bhi apne saamne ka drishya dekh mann ka jaap bhool baithi.
"Ye aap kab le kar aayi daadi? Aur ye itni badi murtiyaan...", Madhuri ki baat adhuri he reh gayi jab Kaushalya ji dandvat un sangemarmar ki murtiyon samaksh jhuk gayi. Andajan he unki kaanpti ungliyan un murtiyon ko sparsh karne badhi aur sehlate hue jab Kaushalya ji ne apna chehra upar uthaya toh khushi ke sath unke chehre par aanuson ki chalti lakeere dikhi. Kaleje ko jaise ek khaas ruhaani thandak mili thi unke is apratyakshit aur akalpaniya uphar swaroop. Aakhir unka he toh janamdin tha aaj.
"Mujhe nahi pata bitiya ke mere pita ji ko yaha kaun aur kab le kar aaya. Raat 12 ke baad maine kapaat lagaye he mandir ke tab yaha aisa kuch nahi tha aur uthne ke baad bhi ye waise he band tha jo abhi maine khola hai. Aur inke sath ye mere sasur ji matlab tumhare pad-dada ji hai, swargiya Pandit Motilal ji. Aur in dono ke peech kaun devi hai unka mujhe kuch nahi pata. Dekh mere ram-darbaar me aaj tumhare chote chacha ke sath unke pita ki bhi tasvire tangi hai. Ye hai mera Banna.. mera chota aur jaan se pyara bhai lekin main zinda reh gayi aur ye samay se pehle swarg ki seedhiyan chadh gaya. Main toh hamesha he is Ram-darbaar ke samaan apne pita ji aur sasur ji ki moorat yaha chahti thi lekin jab itchha poori hoti na lagi toh kehna he chhod diya tha.", Iske aage toh Kaushalya ji se kuch kehte he na bana jo mandir ke aage he khadi ho Arjun Singh urf Ajju ki tasvir par hath firaati hui jaise usko jiwant mehsoos karne lagi. Ek shyaam-shwet tasvir jo unhe yaad thi, ye uska rangeen aur kahi bada sanskaran tha Kaushalya ji ke sammukh.
"Maa, Inder ne bataya aapne mujhe bulaya.", Shankar pajame aur baniyan me geele baal sudha he bhitar aa pahucha lekin jab maa ke aage wali diwar dikhi toh ek apratyaksh jhatke se wahi khamosh khada reh gaya jaha uske paanv ruke the. Apne nana dada ki jiwant lagti safed pratimaon ke sath he Raghuvir ji, Banwari mama ki tasvire dekh Shankar ki bhi apni maa si he haalat ho chali. Jaise Ajju Rameshwar ji ka ladla tha, Shankar Raghuvir ji ka aur Banwari mama toh Shankar ke liye bahot kuch the ek mama ke sath sath. Ab tak peeche he Narinder ji apne pita aur bade bhai sang aa pahuche the jinhone Shankar ki peeth par thapki di toh apni taraf palte chehre ko kuch bhavuk dekh Narinder ne unhe jor se jhappi laga di.
"Main jaanta hu ke tu toh maa ke charan chhoone nahi wala par gale toh lag he sakta hai. Waise maa papa aur apne paute ka uphaar thik-thaak he laga hoga tumhe? Ye Shankar toh kuch keh nahi raha.", Rameshwar ji apne bacho ke sath biwi ko dekhte hue peeche he khade rahe nahi toh aksar yahi pati patni ek sath ramayan ka paath karte the is mandir kaksh me.
"Ye ram-darbaar mere byaah ke samay Sangi (Saarang) ke hath Raja sahab aur rani maa ne bhent kiya tha. Sangi ke mama ne aise 2 bhent kiye the unhe jisme se ek mere saubhagya me aaya. Baad me maine ek baad jikar kiya tha Sangi se ki wo mere pita ji ki moorat bhi waha se banwa kar de sakta hai kya? Bas fir duriyan aisi badh gayi ki aapas me milna toh kya sarhad sa mahol ho gaya. Aaj mere sab dukh dur ho gaye ji, aapke diye is anmol uphaar ke aage.", Kaushalya ji ke aansu laajmi Shankar he paunch raha tha aur unhe gale se lagana toh ek aisi aadat thi jo na badle utni he behtar.
"Jitna main jaanta hu maa, aaj bhi ye kalakaari Saarang ke ..."
"Shankar, hamare saamne thoda tameej se naam liya karo Kumar ka. Tumhare dost ya mulajim nahi hai wo. Aur bhaagwan is baar bhi ye Kumar ne he bhijwaye hai. Ye ek patra bhi tha sirf tumhare naam isliye humne kholna uchit nahi samjha. Kal raat main aur Arjun yahi lene nikle the Rajgarh ki hadd tak. Pintu ne apne kaamgaro ke hatho ye hamari gaadi me rakhwaye aur tumhe shubhkamnaye de kar wo wapis laut gaya. Sangi niche nahi utra aur thik bhi hai. Baaki ye teesri pratima ke baare me mujhe bhi jaankari nahi hai aur tumhare mere bhai ke sath Ajju ki tasvir swayam Arjun ne he tayaar karne ko di hui thi pehle se idhar ki market me. Ab is sab par charcha hum fir kabhi kar le toh uchit hoga. Aaj pehle he aapke bhagwan pratiksharat hai.", Shankar ko bura laga lekin wo jaanta tha ki Saarang ke baare me bhale he unke pita kuch bhi keh de par koyi aur agar amaryadit bhasha prayog karta toh Rameshwar ji fatkaarne ke liye awasar ya jagah nahi dekhte the. Apne pati se wo shaahi lifafe me band patra lete hue Kaushalya ji aankhon me ek alag he chamak thi ya khaas abhimaan, Saarang ki badi bhabhi hone ka.
"Matlab aapko laga hoga ki hum me se koyi sath gaya toh waha jhagda ho sakta hai? Aapke saamne humne kabhi jubaan kholi hai kya? Aur jisko le kar gaye the wo bhi toh kaarnaame kar sakta hai.", Narinder mooh fulaate hue narajgi dikhata apni maa ke dusri taraf ja baitha jo swayam beech ki kataar me thi aaj. Aasan bichhaye ja chuke the aur ghar ki bahuen aur bachen antim kataar me baith chuke the.
"Jo gaya tha usme tum dono se kahi jyada ehankaar hai. Moorakh keh raha tha ki saamne wali gaadi me jo baitha hai jitne wo niche nahi utarta itne main bhi nahi utarne wala. Pintu bhi gaadi ke andar he aa kar mila tumhari aulaad se. 600 kilometer se koyi aapke liye uphaar laaye, wo bhi aapke dada ki umar ka toh sammaan karna chahiye ke nahi?"
"Karna chahiye agar wo vyakti swayam utar kar mere dada ji ka aashirwad le ya unse gale mile. Railway phaatak bhi waha par ek ankahi lakeer he tha bauji aur Pushpak chacha se toh main atche se mila na? Niyam waale maamle mujhe meri daadi ke jyada sahi lagte hai kabhi kabhi. Unme raajniti wale her-pher nahi hote. Seedha haan aur naa wala hisab sahi.", Arjun kurte pajaame me tayaar hua apni bhabhi Radhika aur Sanjiv bhaiya sang sabse antim kataar me baithte waqt jo bola usko sunn kar baki sabhi sar jhuka kar mand mand hansne lage the aur Rameshwar ji se kuch bolte nahi bana kyonki aisa karna apni biwi ki he kaat karna hota jo aaj ke din aur aise sabke saamne anuchit he tha.
"Lo kar lo baat. Dekha maa apne bailbudhi ke tewar aur papa ko bas main aur Shankar dikhaai dete hai.", Yaha pooja-path ki bajaye ye sab baatein hoti dekh Kaushalya ji ne he aakhir unhe jhidka.
"Bas karo ab apne aarop-pratyarop wala khel. Radhika Sanjiv, tum dono baitho beta saamne aur baaki bache bhi aage he baithenge aaj. Main aur tumhare papa aakhir me baithte hai.", Kaushalya ji uth kar swayam he sabse antim kataar me chali aayi lekin is dauraan jab unhone kamre ke bhitar aate Col sahab aur unke pariwar ko dekha toh Preeti ko aashirwad dete hue sabse aage bheja aur Renuka ko apne sath baitha liya. Sanjiv aise mauke par kuch ghabra raha tha lekin sar dhakk kar baithi Radhika sang Alka ne jab mandir ki moorat, pratimaon par haar pehnaye toh Ritu ne bhi apne bhaiya sang diye me ghee baati lagate hue phal-phool arpit kiye. Yahi awsar tha jab Rameshwar ji aur Kaushalya ji ki teeno santane ek kataar me apni apni biwiyon sang viraajman the. Unke aage Romela, Madhuri, Komal, Priyanka, Nikki the aur sabse aage Rupali, Aarti, Preeti, Radhika, Sanjiv, Ritu, Arjun, Alka, Tara.
Diye prajwalit hote he jo aage hua us se toh swayam Kaushalya ji bhi aashcharya me padd gayi. Haath jodd kar Radhika ne apni daadi saas ke agaami shubh jiwan ki kaamna karne ke baad prabhu Narayan ji ki stuti se he pooja aarambh ki aur dhyaan-leen swar kya hota hai ye Kaushalya ji se adhik yaha kaun samajhne wala tha. Radhika ke swar me ek ek karke sabke swar judte gaye lekin us yuvti ne bhi Kaushalya ji samaan har stuti jubaani kehte hue paune ghante tak mahol badalne na diya. Beech beech me Sanjiv swayam diye me ghee ki aahuti deta gaya aur antt samay aarti ka thaal liye jab ye nav-dampatti uthi toh prabhu sumiran karne ke baad unhone wo sabse pehle saunpi bhi ghar ke pramukh dampatti ko. Rameshwar ji ke pariwar me maujood har damatti ne wo pooja ki thaal jodi se apne hath li aur aage Madhuri se ghatak kram me aate aate wo jab Tara ke hath se Arjun ki taraf badhne lagi toh anjaane he peeche khisak kar wo apne pita ki bagal me ja khada hua.
"Aaru, tumhari baari.", Tara ne ghoorte hue usko wo pakdaani chaahi toh us thaali par ek sath 2 hath aage badhe. Shankar ji aur Rekha ji ke. Ek pal ek dusre ko dekhne ke baad dono ne he apne dusre hatho se Arjun ko apne beech aage badhate hue sirf hath rakhne ka ishara diya toh yaha Arjun apne maa baap ke beech se nikal na saka. Pata nahi ye kaunsa sama bana tha jisme Shankar ji aaj apne bete ke sar par ke hath rakhe dusre hath se usko aarti karna sikha rahe the. Jalte kapoor ki gandh se bachta Arjun uski chapet se bahar na nikal paya jab mata pita ek sath usko thaame the. Ritu ke taraf khadi ye drishya dekh muskuraye ja rahi thi aur Arjun us se najre katrata hua jagmag deepak ko dekhta raha.
"Baaki baad me kabhi sikha dena is bail ko. Sanjiv beta sabko prashaad do apne aur bahu ke hatho. Uske baad main aur tumhara dada ji ramayan path kar le fir chai nasta karenge.", Kaushalya ji jaise apne pati sang yaha ekaant me baithna chahti thi aur unhone aisa kehne ke sath Arjun ka sar jhuka kar matha choomne ke baad sirf prashaad me tulsi mishri lete hue khaane ki bajaye apne rumaal me he band kar li. Jo jo prashaad leta gaya wo bahar jata raha aur ant me waha apne maa baap ke sath unke teeno bete aur Col sahab he shehsh rahe the.
.
.
"Toh tum pooja path nahi karte kabhi?", Arjun apni bhabhi ke sath he upar ja raha tha jabki uski maa aur chachi Komal-Priyanka ke sath raosi me dakhil ho chuki thi. Nikki ko Aarti aur Tara ghar dikhane me lag gayi aur Sanjiv akhbaar liye khaane ki mej par ja baitha.
"Mujhe kabhi jarurat he mehsoos nahi hui bhabhi. Lekin aapke baare me ye baat nahi pata thi ki aap bahgwaan me itna jyada maanti hai. Matlab bhaiya jarur aastha rakhte hai aur daadi ke sath baaki sab bhi diya batti kar lete hai lekin aapne toh kamaal he kar diya wo bhi itne logo ke beech.", Gulaabi rang ki jari wali saree me Radhika bhi shaleen pari se najar aa rahi thi parantu wo Arjun ke tarkaane se sehmat na hoti hui jab apne kaksh me dakhil hui toh usko apne saamne kursi par baithate hue policiya andaaj me baatchit dobara shuru ki.
"Shradhha aur bhagwaan ka naam lena jarurat nahi hoti devar ji. Mann ki shaanti aur himmat milti hai thoda dhyaan is duniya ko banane wale me lagane se. Ab batao ki tum bahgwan me maante ho ya nahi?", Radhika bhabhi ka kehne ka aisa tarika aur iske sath he Arjun ke dono hatho ko apne hath me lete hue wo jaise ek chote bache ko dandit karne wali mudra me thi parantu chehre par ek halki muskaan liye.
"Mann ki shaanti... Ye aapko koyi bhi aatmik kriya de sakti hai bhabhi aur himmat milti hai aap me vishwas karne walo se. Haan khud ke andar bhi saahas hona chahiye lekin aapne jaisa kaha ki is duniya ko banane wala toh aap jara batao ke duniya banane wale ne kya aisa karne ka kanoon banaya hai? Samaaj me fir dotarfa kanoon ya niyam kyun hai agar isko banane wale hum nahi wo shakti hai jo adrishya roop liye hai?", Radhika aise jawaab ke liye tayaar nahi thi aur Arjun itna bebaak najariya rakhta hoga wo bhi is umar me ye uski soch se pare he tha.
"Matlab tum maante ho ki samaaj aur bhagwaan ke beech me se kisi ek ko he hona chahiye? Itni badi duniya bina atirikt niyam, kanoon aur sarkaar ke chalana mumkin nahi hai Arjun aur iske liye he panchayat jaise chote tantra se kendra sarkaare tak ki vayvastha hai. Par wo sab bahari duniya hai jiski bajaye filhal hume andruni aur eham tatva par baat karni chahiye. Batao ab ki tum bhagwan me vishwas karte ho ya nahi.", Jis tarah se Radhika ne charcha me 2 bhinn paridrishya bana kar ek ko hataya tha Arjun samajh gaya ki policewali ke sath wo hatthi insaan bhi hai apni baat manwane me.
"Paribhasha ke hisaab se chalte hai bhabhi agar aapko uchit lage toh.", Radhika ne kaajal lagi apni badi badi aankhein jhapkate hue sehmti di.
"Duniya banane wala matlab jiwandata. Jiski wajah se hamara astitva hai aur wo jo hamara hamesha atcha he sochta hai. Haan main is bhagwaan me vishwas karta hu.", Radhika ki muskaan gehri ho gayi jab Arjun ne gambhirta se apni baat saamne rakhi.
"Wahi toh main bata rahi thi tumhe. Lekin tum pooja paath karne ke khilaaf kyun ho?"
"Khilaaf hota toh kya waha upasthit hota aur maine abhi tak aapko sirf bhagwan ki paribhasha di hai bhabhi. Mera bhagwan aapse kuch alag hai aur main uski jara bhi pooja nahi karta. Haan pyaar karta hu, unme vishwas hai mujhe aur jo aapne samaaj wali dusri duniya jarurat bata kar alag ki thi na mera bhagwan dono he duniya me ek samaan maujood hai, bina unki parwaah ke.", Radhika ka sar he chakra gaya tha itni subah is baatchit ko dwand sa roop dene ke baad. Wo bagle jhankti si apne he kop me sikudane lagi jaise Arjun us par haavi ho chala ho.
"Ye kaise bhagwaan hai?"
"Meri maa. Meri maa bhabhi, jinhone mujhe jiwan diya toh mujhe duniya mili. Mujhe pala, bada kiya aur wahi shiksha di jisme kuch bhi badalta nahi. Na sarkaare badalti hai, na prashasan aur na kahi gayi baatein. Aur main unki pooja kyun karu jabki us se behtar toh pyaar ke badle pyaar dena hai. Haan unhe bhi aapke jaisi he aastha hai uparwale me aur mujhe is se koyi aitraaj nahi balki main toh khud unhe mandir leke jata rehta hu. Wo bhitar jitna samay lagaati hai, bahar aa kar gareeb aur jaruratmand bacho, insaano ko utne he sewabhaav se prasaad deti hai jo kuch bhi ho sakta hai unki khushi ke mutabik. Agar mujhe kabhi aastha aur shradha ke niyam banane bhi pade toh aap batao main ye kiske liye banau? Uparwale ke liye jiske paas pehle he laakho karodo anuyaayi hai ya meri maa ke liye, jinhone mujhe paida karne ke bawjood kabhi mujhse na toh kuch manga aur na ehsaan jataya. Aap ek thos saboot dijiye apni baat rakhne ke liye agar meri baat par sandeh lagta hai toh.", Radhika gaal par hath rakhe bas ektak is yuvak ko dekh rahi thi jisne apne bailbudhi ke anuroop saral se he jawaab diye lekin saral he toh mushkil hai.
"Comparison matlab tulna ka result 100% nahi hota Arjun. Tum bhi sahi ho aur main tumhari soch ki dil se ijjatt karti hu lekin galat meri bhi baat nahi hai. Ab batao agar tumhe us bhagwan par vishwas nahi hai toh bagiche ke sath daadi ji ke mandir me tumne unki pratimaye sthapit kyon ki? Unke saamne sar toh jhukaya he tha aur unhe sparsh karne se pehle nahaye bhi jarur hoge."
"Bhabhi, aap jo bhi keh rahi hai uska moolmantra bhool rahi hai. Prem aur aastha. Maine wo sab kiske liye kiya? Meri daadi ji ke liye kyonki mujhe unse prem hai. Aur unki jis bhi cheej me aastha hai toh mujhe apni daadi ki aastha ka sammaan toh karna he hoga. Maine ek baar bhi aisa toh nahi kaha ki main pooja paath ke khilaaf hu? Bas mere bhagwan aur unki pooja ka tarika alag hai. Duniya sahi maayne me sirf pyaar, aastha aur vishwas se he chalti hai jinhe kehne ko hum darkinaar kar de dhero niyamo ka pramaan de kar lekin jiwan ki neevshila un par he tiki hai. Naram aur Garam bahari tatva hai jo apna kabja dikhana chahte hai jisme kaafi hadd tak kaamyab bhi hai aur hote bhi rahenge lekin insaan ko sukoon wahi milta hai jaha santulan ho. Rehne dete hai is mudde ko aaj ke liye aur bhaiya bechare kab tak darwaje se bahar khade rahenge.", Arjun ne uth kar ulta pada alarm ghari bister ke sirhane wapis sahi se rakhte hue jab Radhika bhabhi ko upar Sanjiv ke hone ki baat bataai toh unhone paya ki Sanjiv sachmuch gate par he khada tha jo inki baatchit khatam jaan ab bhitar daakhil hua.
"Bada serious discussion shuru kiye baithe the aaj din nikle he. Kya baat devar se jaldi he vaad-vivaad hone lage kya?", Radhika apni saree ka pallu niche karti hui usko sirf kandhe par ghumane ke baad Sanjiv ko naa me sar hilati bolne lagi.
"Kuch nahi chal raha aisa jiski chinta karni chahiye lekin itna jarur samajh aa gaya ki tumhare bhai ko samajhna UPSC paas karne se mushkil hone wala hai. Aur ek samay me kitni jagah dhyaan rehta hai Arjun tumhara? Apne bhaiya ka aana bina dekh pata chal gaya, giri hui wo choti si alarm ghari najar aa gayi aur ye chaabi jo kal raat suitcase kholne ke waqt mujhe nahi mili wo tumhe dikh gayi.", Arjun bister ke paaye ke peeche se wo choti si chaabi utha kar apni bhabhi ko de raha tha jis par unhone ye kaha aur Sanjiv bister kinaare baith joote pehan ne laga.
"Agar isko bhi exam ki tarah logi toh jiwan lag jaayega samajhne Radhika ji. Haan isko apne sath rakh kar chalogi toh yakeen karo 2 minute se jyada nahi lagega munna ko samajhne me. Chhote mujhe toh abhi nashta karte he nikalna padega bhai par shaam se pehle laut aaunga aur phir pakka hum sath samay bitayenge. Shankar chacha toh abhi bauji daadi ko sath le kar anaath-aashram, devalaya aur Umed chacha ki taraf nikal jaayenge par tum agar ghar rehne wale ho toh apni bhabhi aur inki behan ko thoda ghuma fira lana.", Arjun apne bhaiya bhabhi ki diwar par tangi tasvir ko gehanta se seedha karne me juta tha jo halki tedhi tangi thi. Unki baat sunn kar Radhika na nukur karti us se pehle Arjun ne he jawaab diya.
"Daadi aise awsar par bhabhi ko apne sath he le kar jaane wali hai bhaiya. Unki ab badhiya jamegi bhabhi ke sath aur yakeen rakho bhabhi agar aap daadi ke sath rahogi na toh bhaiya se bhi jyada atchi afsar banogi. Bade bade case me jo baat dada ji ko nahi dikhti thi na unhe meri daadi bina dekhe sirf jaankari se he hal kar deti thi. Ye baat khud dada ji ne mujhe bataai thi aur daadi ji kisi bhi choti si baat ko andekha nahi karti.", Sanjiv ya Radhika kuch bolte ki us se pehle Tara Nikki ko liye yaha aa pahuchi.
"Bhabhi, naani ji ne kaha hai ki aap ye saree pehan kar tayaar ho jaiye. Hum logo ne nashte ke baad nikalna hai aur shaam tak he wapis aayenge. Bahot maja aanewala hai aapko jab Shankar mama bhi sath honge.", Arjun aankhein uchka kar unhe dikha raha tha jaise khe raha ho ki dekh liya bhabhi mera andaja aur Tara ke hath se wo sabhya safed aasmaani rang ki saree leti Radhika bhi devar ki taraf dekh muskurayi. Nikki apne bag se kapde nikaal kar bathroom ja chuki thi bina koyi baat kiye.
"Ab batao Radhika tum Arjun ke baare me kya keh rahi thi? Ye pehli baar me thoda ajeeb jarur lagta hai par dekh lena ek din tum he iski himayat karti najar aanewali ho.", Sanjiv joote pehan kar utha toh Arjun ke saamne he apni biwi ka gaal choom kar niche chal diya. Radhika sharma rahi thi parantu jab Arjun ki aur dhyaan diya toh wo saree hath me liye apni bhabhi ki almaari se he unke liye kuch nikaal raha tha. Radhika ko thoda ajeeb laga Arjun ka aise he uski almaari kholna toh wo uski bagal me ja pahuchi. Parantu yaha Arjun sirf un saree ko dekh raha tha jo hanger me latki thi baaki vastro sang. Ek schifaun ka safed blouse uski saree ke bhitar se nikaal Arjun ne dono vastra apni bhabhi ke hatho me thama diye.
"Iske sath yahi match karega bhabhi aur daadi ne ye saadgi bhari saree di hai toh iske sath simple motiyon wala set he pehan lena. Kaan me bhi ek ek safed moti aur baalon ko dhile joode me bandh kar bas clip kar dena. jaha sar dhakna hoga wahi bhi thik aur jaha kandho par pallu rakhna hua waha bhi jachega. Chooda aur choodiyan toh ab yahi pehan ne honge poore saal aapko. Chalta hu, shaam ko milenge.", Arjun jaane ke liye muda toh Radhika ne he uska hath pakad kar roka.
"Mujhe jooda banana nahi aata aur jo tumne bataya wo hai toh sab mere paas lekin kabhi pehne nahi. Pearls atche lagenge mujh par.?"
"Pehle main aapke baal he bana deta hu aur itne aap set bhi nikaal lijiye. Wo suchhe motiyon wala set daadi ne aapke mooh dikhaai me diya tha na?",Radhika ko swayam nahi pata tha ki usne ek ladki hote hue Arjun ko kaise ye karne ka keh dala. Par jab Arjun ne motioyn waale set ka ullekh kiya toh Radhika muskurati hui pehle wahi nikalne lagi usi almaari se, jo neele dabbe me band tha.
"Yaha chair par baitho is drssing ke saamne aur bas sar seedha rakhna.", Pehle se bandhe baalo se clip alag karta hua wo sirf apni bhabhi ke baalo ko he sudharne me juta tha. Unki silwate suljhane ke sath ek ek julf ko saleeke aur chehre ke hisaab se ghumata hua wo agle 5-6 minute tak bas mooh niche he kiye raha. Usi dibbe se baalo me lagaye jaane wala motiyon ka clip aur 3 pin joode me set karne ke baad usne Radhika ko sar ghumane ke liye kaha toh apne devar ki mehnat ka parinaam uske saamne tha. Wo ek aakarshak aur shaleen sabhya yuvti ke avtaar me thi, chehre se he kahi samajhdar najar aati. Aur iske aage bhi Arjun ne bina kuch pooche kahe apni bhabhi ke gale se sone ka haar utaar kar wo motiyon wala pehnaya. Kaano se unke lambe jhumke nikaal sirf ek boond jaisa moti ka topas badi safaai aur koyi dard diye bina.
"Iske aage toh aapko didi ki madad leni padegi bhabhi aur aapke chakkar me aaj meri khuraak bhi bhool gaya jis par pakka daant padne wali hai mujhe.", Arjun ne toh ye baat waise he keh daali thi kyonki saree ke pallu ityaadi me ek ladki dusri ladki ke samaksh he sehaj hoti hai par Radhika ko ye apne devar ka majaak laga.
"Tumhe kya lagta hai ki main ab saree blouse bhi tumse set karwane wali thi.?"
"Kar toh wo bhi deta kyonki ab aap bhi toh maa ke samaan he ho lekin aaj mera din bhi aapke jaise busy rehne wala hai bhabhi. Saree blouse ka kisi aur din sikhaunga."
"Toh tumhe ye sab bhi pata hai?", Apne liye maa kehalwaya jana Radhika ko romanchit karne ke sath thoda bhavuk bhi kar gaya kyonki Arjun ke chehre par sneh aur samarpan ke bhaav jo kaayam the abhi.
"Mere ek he bhaiya hai bhabhi jo jyadatar ghar nahi rehte lekin behne aur chachi taai ke sath maa bhi hai. Madhuri didi ke sath Pinki didi aur Vinni didi toh mera he make up kar deti thi jab unhe experiment karne hote the. Chota tha na toh virodh bhi nahi kar sakta tha lekin itna jarur jaanta hu ki samay aur mahol ke hisaab se kaise ek mahila ya ladki khoobsurati banaye rakh sakti hai. Ladko wale maamle me zero hu waise. Bhaiya ne he jeans aur shirt sahi se pehan na sikhaya nahi toh main bas school ki vardi, nikkar aur baniyan wala bacha he tha. Jaldi aana bhabhi, Nikki ji madad kar dengi aapki yaha.", Arjun daud gaya toh Radhika kursi par baithi pehle khudko niharti rahi aur fir uske pakdaye vastro ko dekh khudse he bol uthi.
"Gussa aaya tha pehle toh jab tum kuch bhi bol rahe the. Lekin ye thik kehte hai ki tumhe samajhne ke liye tumhare sath hona jaruri hai. Kam se kam ab ek samajhdar beta aur devar toh hai mere paas jis par gussa laad pyaar jaahir kar sakti hu."
"Kya khichdi paka rahe the tum dono devar bhabhi? Wow. Kisi rajkumari si lag rahi ho Rits aur ye kayakalp kiya kisne tumhara?", Nikki andar aayi toh wo bhi salwar kameej me he thi.
"Mere bete ne. Waise tu bhi jeans shirt se jyada atchi salwar suit me lagti hai Nikki. Kahi mere he sasural ke aaspas rishta karwa lena tauji ko bol kar."
"Main toh tere he sasural me karwa leti meri jaan. Par jaalim duniya me pehle aa kar galti kar di maine ya fir tumhara devar thoda deri se paida hua. Aaj mujhe iske sath ghoomne jana tha lekin ab tere sath sath poore pariwar ke beech rehna hoga.", Nikki aur Arjun ke beech Radhika ne bolne se khud ko roke rakha.
"Atcha he lagega mujhe yakeen hai.", Radhika darwaja band karke apni saree badalne lagi thi ab. Niche pichle aangan me Shankar ji apne badi bhabhi ki sehat ka gehan nirikshan karne me vyast the jinki tabiyat ke baare Krishna ji ne awgat karwaya tha.
.
.
"Ek taraf toh aap Rameshwar ko mitana chahte hai bhai sahab aur dusri aur itna lamba safar karke wo moortiyan dene swayam unki dehleej tak gaye, hume aur Kumar Pushpak ko sath le kar. Hamari samajh se pare hai aapka charitra bhai sahab, bura lage toh maafi chahunga. Parantu wo sirf hamare dushman he nahi balki dhokhebaaj.."
"Khamosh Vardhan... Is se adhik ek aur shabd nahi kahoge tum jabtak ki hum bolne ki ijajat nahi dete. Pehli baat toh unka naam samaan se lena seekho kyonki wo humse bade hai. Humne kabhi nahi kaha ki hum unki hasti mitana chahte hai. Haan agar bhavishya me niyam toote toh jarur yudh hoga jaise 2 raja aapas me karte aaye hai sadiyon se jab jab rajya me ghuspeith hui. Rameshwar ji hatthi, akdu aur yaha tak ki kisi khaas ka paksh lene wale ho sakte hai parantu dhokhebaaj keh kar unhe kabhi sambodhit nahi karna. Aur hum unki dehleej nahi balki dono ki banaye sarhad tak pahuche the.", Rajyavardhan nashte ki mej par baitha apne bade bhai ko khamoshi se sunta raha. Wo kabhi in dono ka asli rishta he samajh na paya tha ki aakhir jung ho kar bhi sammaan kyun barkaraar hai. Ek sewak is garam mahol ke beech bhi khamoshi se dono ka bhojan praso bahar chala gaya.
"Punjab wala gharana bhi toh aapka he tha bhai sa. Matlab hamara aur waha ke raja hamare pita ji the phir bhi waha se hum bedakhal kiye gaye aur sanrakshak banaya gaya inhi shrimaan Rameshwar ji urf Pandit ji ko. Aapke upar us pradesh me jaane ki rok hai aur waisi he bandish poore Pandit pariwar pe lekin kya Punjab gharana sachmuch is bandish par kaayam hai? Kumari apni putriyon sang abhi wahi par araam farma rahi hai jaha se hume bedakhal kiya gaya barso pehle. Aap tab bhi saksham the aur iska saboot hai ye gharana jo apna astitva he kho deta agar aap raja nahi bante. Aaj Kumar Pushpak niyam taak par rakhte hue Pandit ji milne pahuch jaate hai toh batao ye bandishe aakhir kis par laagu hoti hai? Aapka anuj hu bhai sahab aur itna haq toh banta hai na ki ye baat pooch saku?", Rajyavardhan ke bhitar jaane kaunsi aag sulag rahi thi apni seema paar wale rajya ke liye jiske chalte aaj wo Saarang se he sawaal kar raha tha.
"Byahta toh Kumari Anamika bhi wahi thi Vardhan aur aage Bindiya bitiya bhi. Ek bhai apni behan ki taraf ja sakta hai aur ye baat bina kuch kahe dono taraf laagu hui. Udhar se Umed Singh bhi toh apni behan ko yaha byaahne ke baad lene, milne aata hai. Dono taraf se ye niyam bas ek ek beti dono taraf byahne par ek ek bhai ko chhoot deti hai. Yaha se tum, Indraneel ya hum aisa nahi kar sakte kyonki pariwar ka chehra hum log hai. Udhar se Rameshwar ji ke teeno putro ko ye anumati nahi unke sath. Haan sanjhi lakeer ke aamne samne khade ho sakte hai par jab bhi jiski taraf se koyi haadsa dusre kshetra me hua toh aar ya paar he hoga. Hamari bhabhi ki chahat thi barso purani jiska dhyaan bhi hume tab aaya jab Pushpak ko wo khaas moorat banwate dekhe jo Pandit ji ke paute ko uphaar swaroop bhijwai jaane wali thi. Hum bhale he ek vidhur hai lekin naari ki ehamiyat aur rishtey ki kadar aaj bhi nahi bhoole. Rameshwar ji hamari sthiti me gar hote toh wo bhi galti ka intjaar kar rahe hote jab karne ko kuch na rehta. Unme ek buri aadat hai jo hume bahot pasand hai.", Saarang kehte kehte chhaach (lassi) ka wo bada swar gilaas utha kar gatagat peene laga jaise pyaas se kanth he sookh chala ho.
"Aisi kaunsi aadat jo aapko prabhavit kar gayi bhai sa? Buri aadato ke hiteshi toh aap kabhi nahi the."
"Unka mukya niyam badla nahi insaan ko badalne me hai jo saari duniya jaanti aur dekhti aayi. Lekin unka bhi ek chhipa hua pehlu hai aur wo belagaam hone par tab tak nahi rukte jabtak shatranj ki bisaat se yudh ka har sipaahi wo Raja ko dikhate hue khatam na kar de. Jaante ho kisi bhi raja ke liye aisi sthiti sabse asahaye hoti hai jab uski poori sena ke beech ek pagal raja ghus jaaye jo hathi, ghore, vajeer tak ko hilne ka mauka diye bina mita de. Raja bas dekhta rahe lekin usko maut bhi naseeb na ho. Bahot kareeb the hum aapas me lekin siwaye dekhne ke hum kabhi bhi wo khatanaak khel seekh nahi sake. Khair ab na unki boodhi haddiyon me jaan bachi hai aur na ab unke paas Raghuvir Singh jaisa saathi hai.", Rajyavardhan is baat ki gehraai jaan ne ko aatur tha aur uske agle prashan ne wo sahi bhi sabit kiya
"Aisa khel jisme poori sena asahaaye ho jaaye, matlab raja kuch na kar sake aur sena samapat. Wo bhi sirf ek akela virodhi raja. Kaise mumkin hai bhai sahab? Jaante toh hum bhi Pandit ji ko barso se hai jab shayad hume hosh bhi nahi tha duniyadari ka."
"Raghuvir ke beto ki mrityu ke baad sabne unhe toot-te dekha Rajyavardhan. Wo dono insaan bhaiyon se badh kar the aur humne suna tha ki Rameshwar ji poore saptaah akele me aansu bahate rahe. Wo ladka tha bhi apne aap me udaharan jiska naam hamare jehan se kabhi nahi mitt sakta. Arjun Singh. Diler itna ki usne hamari girebaan pakadne se pehle anjaam tak nahi socha. Sochta bhi kyun jab uske bahubal ke saamne darjano beabs the. Hum jaldi me the aur hamara sewak Lohan jaanta tha ki agar us maamle me humara naam aaya toh sab bigad jaayega. Hum khoon ka ghoont pee kar laute toh pata chala ki us diler insaan ko geedado ne gher ka maar dala gaya. Samandar aksar chaand ki gair-maujoodgi me khamosh pad jata hai Rajyavardhan aur sabne bas ek policewale ko case band karte dekha. Ek pita haan wo pita se badh kar he the us ladke ke liye aur roye kisi maa se. Parantu uske baad jaha Rameshwar ji ke jawaan ladko ne 2 pariwaro ka naam mitaya wahi swayam Rameshwar ji ne ek raat me sarkaare badalva di. Swayam hamare jija ke dono bhai, 3 ladke aur aise jaane kitne logo par unki gaaj giri aur wo sabhi pariwar pramukh yaha daude aaye. Aajtak unhone ye baat apne mukh se kabhi swikaar nahi ki hai ki unke sath waha kya hua tha lekin raja ko zinda chhod kar poori sena mitaane wale is andaaj ko hum bakhubi jaante the. Aur yahi wajah hai ki jiwan me ek antim yudh jarur chahte hai hum unke sath. Beshak hamara samrajya taqatwar hai aur jeet sunishchit lekin is se badhiya aanklan bhi toh karne ko nahi milega unke johar ka.", Rajyavardhan kutilta se muskuraya ek uchit senapati sa.
"Us din ka intjaar rahega bhai sahab kyonki tab aapki ye bandishe aur niyam nahi honge. Ummeed hai ki us taraf se jald he niyam toote aur main apni chaandi ki rivolver se Shankar aur Narinder ke seeno me peetal bharu. Aghoshit kitne he yudh wo apne ilaako me jeete hai lekin jab hamari baari hogi tab main unke seene par joota tika kar saari mardaangi mita dunga. Haan is beech Pushpak ne ek bhari galti jarur ki hai jisko andekha karne wale aap bhi hai. Usi Shankar ke bete ko apna uttaradhikari banane ki galti. Kya hoga jab wo ladka kabhi yaha aa pahuche? Us par niyam lagenge ya wo bakri ka bacha bas bali dene ke kaam aanewala hai.?", Ab Saarang ke muskurate chehre par gambhirta ubhar aayi kyonki ye galti toh unhe bhi saal rahi thi.
"Dekhne toh hum bhi Shankar aur Narinder ko he gaye the Rajyavardhan lekin kal raat unke sath wo dono nahi the. Jo bhi tha wo wahi ladka tha jiske pyaar me padd kar hamare bete ne itni badi bewkoofi kar daali. Parantu hamara mann kehta hai ki wo bakri ka memna hargij nahi hai. Aur agar wo utna khaas hai jitna Kumar ko laga toh hume pratiksha karenge ki us se mulakaat jarur ho. Indraneel se kehna ki wo abhi koyi gadbad na kare bahar rehte hue. Satark hume bhi hamesha rehna hai anuj anyatha wahi niyam hamare liye nasoor ban ne me waqt nahi lagega.", Saarang kursi se uth kar hukka gudgudane nikal chala tha.
'Bhai sahab Indraneel toh swayam apne chacha ki tarah pratiksha kar raha hai ki kab mauka hath lage aur aapke sath sath Pandit pariwar ko swarg pahuchaya jaaye. Bahot gulaami aur jillat jhel li humne par hum dono Pintu jitne bewkoof nahi aur naa aapki tarah dushman ki tareef karne wale.'
.
.
"Sabne nashta bhi kar liya aur tayaar bhi par maa kaha reh gayi papa? Dekho aaj ka poora din maine unke liye he simit rakha hai aur wo he najar nahi aa rahi.", Shankar apne kamre se bahar aate he apne pita ke paas aa khada hua jo nashte ke antim daur me the. Arjun aaj scooter le kar pehle he nikal gaya tha jiske baare me jyada kisi ko khabar bhi nahi thi. Lekin sabhi ladkiyan tayaar thi jinhone jaane ka nishchaya kiya tha aur Rameshwar ji ke sath Col sahab bhi tayaar he the. Narinder ji aur Rajkumar ji bahar gaadiyan chamka rahe the jo inhone le kar jaani thi. Shankar ki nayi car ko safaai ki jarurat he na thi jo pehle se chamak bikherti khadi thi. Apne bete ko sar pe khada dekh Rameshwar ji ne niwala chabane ke baad hath ka ishara karte hue kaha.
"Tayaar ho kar dobara mandir me gayi thi lekin abhi tak lauti nahi. Tu he dekh le kyonki tujhse toh gila shikwa karti nahi teri maa.", Rameshwar ji ka kathan bhi sau pratishat sahi tha ki Kaushalya ji chaahe gusse me ho ya avsaadgrast par Shankar ke kareeb hone se wo ubar jaati thi aur ye beta bhi bhale duniya me alag alag kirdaar banaye tha par maa se badhkar uske liye bhi kuch nahi tha. Tej kadmo se chalta hua Shankar jab mata pita ke kamre se mandri ke dwaar aa ruka toh apni maa ko ashru me doobe us tasvir ko sehlaate dekh swayam bhi kamjor sa padne laga. Diwar se utaar kar Banwari ki tasvir goad me liye Kaushalya ji beawaaj roye ja rahi thi. Shankar ki putliyon ka jhapakna aur ek boond bahar nikalne se pehle he aankhein saaf karke apni maa ki bagal me ja baithna bahot teji se hua.
"Oh meri maa kyu is bhale aadmi ki aatma ko pareshan kar rahi hai.? Ye bechara toh duniya se jaa kar bhi mukti na maangta hoga apni Kosi jiji ki khatir. Papa ne tujhe ye galat uphaar de diya aaj ke din jo kuch yaadgar karne ki bajaye yaha baithi roye ja rahi ho.", Kaushalya ji apne bete ki bagal me lagte hue aansu saaf karne lagi par Shankar unhe jakde jaise mann he mann khud bhi apne is mama ko yaad kar raha tha.
"Pita ji toh tumhare bade hone se pehle chal base Shankar lekin tumse pehle mujhe aulaad jaisa Banne jarur saunp gaye the. Ro nahi rahi thi beta bas yaad kar rahi thi ki mere janamdin ki pratiksha agar sabse jyada kisi ko rehti thi wo tujhe aur tere is mama ko rehti thi. Dikhawa karta rehta tha ek din pehle phone karke jaise agle din ka pata he na ho lekin sab pata karne ke baad din nikle saamne khada milta tha tujhe liye. Jiji, tu toh ab budhiya ho gayi isliye main ye uphaar Shankar, Guddi ke liye leta aaya. Aisa he kehta tha aur kholne par hamesha tere papa aur mere liye kapde, mithaai nikalte the. Tujhse bhi toh utna he gehra pyaar tha na Banne ka? Tujhe yaad nahi aati apne mama ki?"
"Main insaan nahi hu kya maa? Mere liye har pehli cheej mera mama he le kar aaya tha. Darr lagta tha na andhere me mujhe toh wo bina roshni liye sath chalta aur mujhe jaahir karta ki main uska khayaal rakh raha hu. Kuch samajh nahi aata tha toh mama kehta ki chhod agar nahi samajh aata. Sab humne samajh liya toh duniya ke thekedar khaali baithenge? Par jo tu chahta hai na Shankar, usko thekedaro ke hatho na chalne diyo. Aur maa agar main nirbhik doctor bana hu toh wajah mera yahi mama tha jo mere hostel me kayi kayi din kaam chhod kar mujhe khush rakhne ke liye pada rehta. Yaad hai ek baar dada ji ne jhada tha unhe toh palat ke unhe he suna diya tha Banne mama ne ki behan byaahi hai, rishta na badla. Par aaj ke din hume kuch toh aisa karna chahiye na ki wo khush ho sake jaha bhi ho?", Kaushalya ji ek bar joro se apne bete ke gale lagti fafak he padi par jald he chup ho kar apne vichaaro ko saamne rakhti boli.
"Mere bhai ke gaanv me koyi bada hospital aur badhiya school nahi hai Shankar. Uske diye paise bahot hai mere paas beta lekin ghar pariwar ke chalte ye sab .."
"Tu chinta na kar meri maa iske baare me bahot raat bitaai thi maine mama ke sath. Kabhi na kabhi bana denge wo bhi lekin papa ne aaj ek he roti khaayi hai aur Inder tujhe rota dekh kar bhag uthta hai jaise abhi wo bahar bura sa mooh banaye gaadi saaf karne me laga hoga. Tere paute ki bahu kya sochegi bhala? Chal pehle Gajju ke yaha chalte hai fir tera dil khush nahi kiya toh mera naa bhi Kosi ka chhora na.", Shankar ne aakhir apni maa ko hansa he diya tha ye baat apne mama ke lehje me kehte hue.
"Naaspite thodi si toh akal badha le. Teri maa hu main aur aise naam lega. Chal tere baapu ko dekhte hai jinhone raat bhi BP ki dawa na khaayi aur wo bail mujhe ye keh ke gaya hai ki jab kamaane lagunga tabhi aapke sath sewa karne jaunga. Waise aaj usne saabit kar diya ki wo hai tera he asli khoon. Teri maa ke liye wo kar gaya jo tere papa na kar sake. Tu kar deta lekin vachanbadh hai aur mujhe koyi shikayat nahi beta. Par Arjun ne khud Kumar ko he tere papa ke paas bulwa liya. Ek din dekh lena ye wo sansaar jarur banayega jo tere dada chahte the."
"Usko apne pehlu aur chhaya me rakhogi na maa toh jarur kar paayega. Tumhare liye wo har wo kaam kar leta hai jo apne liye bhi nahi karta. Par Kumar Sarang wale maamle me usko kabhi shamil mat hone dena maa. Bhola wo hai main nahi aur agar kahi koyi unch neech ho gayi toh tum bhi humse papa ke kaand nahi chhipa sakogi jo pehle bhi hue hai. Unki aur aapki zindagi ki jo wajah hai usko apne paas he rakho. Aur ab utho, badi bhabhi mareej bann gayi hai khaan paan par dhyaan na rakhne ki wajah se."
"Waise aaj tu mujhe kya de raha hai ye toh bataya nahi? 25 lakh ki gaadi minute me le aaya apni maa ke paise se."
"Banwari Kashiram Mahila Snatokottar Vidhyalaya aaj aur mere mama ki mukti ka saadhan kal. Tere teeno bete aur papa aaj tumhare maayke rukenge sab hone ke baad.", Ab Kaushalya ji kisi kishori si uchhal kar uth khadi hui kyonki Shankar pehle se he apni maa ke liye ek bada aur yaadgar tohfa tayaar jo kiye baitha tha. Par kal wo kya karne wala tha jisme usne Kaushalya ji ko bhi shamil kar liya wo sirf Narinder aur Umed jaante the. Apne pita ki pratima ko hath laga kar khushi khushi bahar nikalti Kaushalya ji baras padi thi apne pati par jinhone sirf ek roti khaayi thi. Unki narmi garmi ke aage yaha koyi nahi tikta tha.
Copyright to enigma203
Join Our
Discord Server
For Daily Updates
bar mai sab kuch hai ek super duper hit movie hai jaise hum movie dekh rahe hai thanks Enigma bhai