- 1,531
- 1,618
- 143
Update:-9
"Na baaba aaj ke baad pub se haye tauba, bahut fajihat hoti hai, Sham babu please coffee do hume"…. Kasak, Nandni aur Jivisha ke sath cafeteria me thi...
Jivisha:- Chhod bhi kaun sa ghar par pahli baar gaali khayi thi jo bura lage...
Nandni:- Tum dono jano, mujhe to bada maza aaya...
Kasak:- Kamini Durga Devi ke samne pikar jati na fir pata chalta...
Nandni kuch der tedhi najron se Kasak ko ghurti.… "Ye tu meri maa ko kyon yaad kar rahi hai achanak… Kasakkk..
Kasak:- Mujhe aise kyon ghur rahi ho dono, kabhi shakal nahi dekhi kya? Main jab hospital me entry kar rahi thi tab aisa laga ki uncle aur aunty kafi khush ho'kar ja rahe the.. Ab unke pichhe jati uss se pahle hi tum dono ka call aa gaya aur mai cafeteria me...
Jivisha hansti hui…. "Teri to lag gayi re Nandu... Mera to jo dukh dard mitana tha wo to mita hi di, ab teri baari hai..."
Nandni, table par pada kaanta utha'kar Kasak ko dikhati….. "Sach-sach bata ki kaun sa kaand ki hai"…
Itne me hi Jivisha Nandni ko paun marti... "Uncle aunty.. sidhi ho ja"…
Nandni apni kursi se uth'kar jaise hi apni maa Durga devi ke pass pahunchi, wo apni beti ko gale lagati.… "Tujhe pahle mujhe batana tha na.. mujhse kaisa sharmana"…
Nandni jab gale lagi pichhe Ansh khada tha… Nandni, Ansh ko sawaliya najro se dekhne lagi… Ansh kewal hanste huye Kasak ke ore ishara kar diya...
Durga Devi:- Kya hua kuch bol kyon nahi rahi... Aur tujhe kisi ne mana nahi kiya, jo ye tu coffee pine chali aayi..
Nandni, Druga Devi ko chair par bithati.. "Maa, tum itni khush aur excited kis baat par ho aur itni hidayten kyon di ja rahi hai"…
Durga Devi:- Achha natak to dekho, mujhe nani aur tere papa ko nana banane ke liye thanks..
Jivisha ke muh me coffee ki ek ghunt thi jo achanak fute iss bomb se pura coffee hi bahar aa gaya, jo sidha Kasak ke chehre aur dress par para.…
Kasak:- Jhalli kahin ki, kitni badi bevkoof hai…
Jivisha:- Ab news hi aisi hai... Fake hai ya orignal...
Kasak:- Jo hume jante hain wo kya aise kewal mere bol dene se daure chale aayenge...
"Ohhh my goddd"…. Jivisha, Nandu ko piche se gale lagati uske gaal chumti.… "Mujhe bhi nahi bataya... Tu kab samjhi Kasak"..
Kasak:- Jab Pub me ye Takila pine ke badle jamin par gida rahi thi...
Jivisha khushi se itni jod ki hooting ki, charo ore uske baithe fan bhi uski khushiyon me samil ho gaye... Nandni to Kasak ki shararat shuru me hi bhaanp gayi thi, ab bechari kya bole...
Jivisha, dono (Nandni aur Ansh) ko ghurti hui.…. "Dono ko kab pata chala"…
Ansh:- 10 din pahle...
Jivisha:- Ye to had hai... Fir mujhe bataya kyon nahi Nandu tu pregnent hai... Aise samay me travel kaun karta hai... Aur ghar par aaram...
Nandni:- Bas re toofan mel, thamba. Mujhe tere jaisa beta ya beti chahiye… tu jitni karib rahegi utna hi ye tere jaisi hogi...
Jivisha dhime se ek thappad lagati…. "Uske liye main kya Indore nahi aa sakti thi... Jo tu yahan chali aayi"…
Ansh:- woo.. wooo baat kuch aur thi, isliye hum hi aa gaye...
Jivisha, apni najron se tikhi pratikriya deti.…. "Kaun si baat doctor sahab"…
"Wo main heart patients hun... Ansh ki maa aur papa heart patients hai... Isliye Ansh ka sochna tha Pune hi chalte hain"…. Nandni ke papa ne hanste huye kaha...
Jivisha, unhe mayus najron se dekhti.… "Itna bejjat karne se to achha tha chappal se maar lete uncle. Manaki thodi hansi mazak chalti hai, iska ye matlab thode na hai"…
Kasak:- Awwww ! Meri bahan.. aa beta le mere kaandhe ka sahara... ro le...
Nandni:- Pagal papa bhi tujhse mazak hi kar rahe hain.….. Bus hum dono ko hi ye sahar aur appollo ki bahut yaad aa rahi thi... Ansh ko appollo wale bhi chhodne ko taiyar nahi so, 3 din pahle mujhe bhej diya aur 3 din baad khud aa gaye.…
Kasak:- Achha bahana tha schai par jhuth ka parda…. Ab to Jisa heart attack queen ho gayi... Nandu ki duvidha sasural me heart patient, mayke me heart patient... Bechari apni Jisa ko lekar jaye kahan...
Jivisha:- Joke of the decade... Mujhe Nandu par yakin hai... Aur Nandu ki bachi ab jab tujhe pune me hi rahna hai to flat waigrah nahi jana hai... Samjhi. Mere ghar ka pura guest house tera, wahan tu doctor sahab ke sath settle ho ja... Chalo sab ab. Waise aunty koi rshm waigrah nahi hai kya jo hoga...
Durga Devi:- Abhi koi rashm nahi hai..
Itna kahte huye Durga Devi pallu se muh chhip'kar hasne lagi. Unki hansi se sabki hansi nikal gayi… siway bechari Jivisha ka. Wo samjh gayi ki, uncle-aunty kewal milne aaye the, aur unke aane ko mirch masala kisne laga diye.... "Kamini mere sache emotion se khel gai, pura popat ho gaya".
Jivisha ka ittu sa chehra, jise dekh'kar sab hans rahe the….. "Bus bhi karo, samjh gayi ki tum sab milkar aaj mujhe hi mamu bana dee. Lekin bhulna mat main bhi Jivisha hun"…
Dono ore se Nandu aur Kasak, Jivisha ke gale lagti... "Haan baba le lena badla"…
In sabka hansi-mazak ho hi raha tha isi bich Kasak ke hone wala pati Sahil bhi pahunch gaya. Kasak uncle aur aunty se uska parichay karwayi. Sahil bhi apne sasural paksh ka laga aao bhagat karne...
Mahol hansi khushi ka tha, issi bich Jivisha achanak hi uthkar tej-tej chalne lagi.… "Kahan ja rahi hai Jisa"… Nandni ne toka…
"Aati hun, 2 minut"… kah'kar Jivisha jhatak kar chalne lagi...
Nandni:- Kamal hai, hum sab yahan hai fir ye kahan ja rahi…
Ye log jis cafeteria me the wo main rode se 20 meter ander tha. Sadak ke ek kinare hospital aur dusre kinare Sahil ka cafeteria.
Ambulence jab aayi to uske side mirror me Jivisha ko main-road par Vyom dikh gaya tha aur wo ussi ko thanks kahne chal dee.
. Jivisha jhatak'kar chalti hui uske khuli car ke pass pahunchi aur usse dekh'kar muskurati hui thanks kahne lagi...
Vyom:- God must be crazy... Miss aap mera pichha to nahi kar rahi…
Jivisha:- Please 1 cup coffee pi lo, meri help ke liye...
"Peeeeee, peeeeee, peeeeee"… signal ho chuka tha aur pichhe ki gadiyan horn bajane lagi.… "Miss fir kabhi coffee piyunga, abhi bahut hi jyada urgent kaam se nikla hun"… apni baat kahte huye Vyom ne apni ghadi dekhi...
Jivisha:- Apna number to do... Baad me miloge kaise...
Vyom:- Mai 3 baje wahin mil jaunga jahan se tunhare dost ne tumhari car uthayi thi.. abhi jane do...
Jaise hi Jivisha car ko chhodi badi hi teji wo nikla, aur kuch hi pal me ojhal ho gaya.… "Style aur look to kisi Hollywood ke star ko takakr dene wala hai"… Jivisha apne khyal me sochti jaise hi pichhe mudi, Nandni aur Kasak dono khade the… "Hunnn !!! Hunnn"
"Kuch bhi nahi bus uss raat ke liye thanks kahne aayi thi..." Jivisha dono se aage badh'kar muskurati hui apni baat kahne lagi...
Nandni:- Jara pichhe palat kar apna chehra to dikha...
Jivisha:- Pagal kahin ki... Chal ghar...
Jivisha sabke sath laut gayi. Jate waqt charo ore wo aaj Alexa ko dhundh rahi thi lekin kahin bhi Alexa nahi tha… thodi si mayusi hui lekin sabke sath hansti-bolti wo ghar pahunch gayi...
Agle din Nandu aur Jivisha college pahunch gayi. Dono office ke galiyaron me pahunchi hogi thik ussi waqt unhi raston se principal bhi apne chember me ja rahe the. Principle ki ek najar dono par gayi aur wo apna rasta badalte dono ke thik piche chalne lage…
Jivisha aur Nandu ko jo hi dekhe good afternoon kah raha tha… "Yaar hum college bunk karke office me baithte the kya"…
Jivisha:- Mujhe bhi kuch-kuch aisa hi lag raha hai Nandu. Jin office staff ko sal me ekadh baar dekhte the wo itni izzat kyon de rahe. Sala itni izzat to apne motu Golu Principal ki bhi nahi hogi...
Nandni uski baat par jod se hansti.… "Iss baar hume dekhega to bechara kahin istifa na de de"…
"Ji istifa yahan de dun ya fir usse aap dono ke pate par speed post kar dun... Miss Jivisha, Miss Nandni.. Waise tum dono ko dekh'kat kuch kami si mehsus ho rahi hai mujhe"…
Jivisha:- Good afternoon sir, waise humari Nandni ab miss nahi rahi, Mrs ho gayi hai..
Principal:- Kamal hi ho gaya ye to, kiski duniya ujad dee Nandni…
Nandni:- Sir aap joke bhi karte hain kya?
Principal:- Tum dono apna TC lo jo kayi salon se yahan para dhul kha raha hsi hai aur chup-chap ghar niklo, bahut padh liya.…
Nandni:- Sir aap to guru hai.. aapke liye hi to bana hai, twamev mata ch pita twamev..
Principle:- Ye baap thoda khadus ho gaya hai…. Tunhare chakkar me MCA ka 100% result nahi aaya college ka. 200 me 3 student disappear… bhago yahan se warna security bulata hun.…
Jivisha:- Sir ye aap achha nahi kar rahe hai... Mai case kar dungi aapke upar…
Principal:- Jo karna hai kar lo, tumhara yahan re-admission nahi hoga aur entrance exam dena ho to mai abhi leta hun… Deshmukh sir ek consent paper aur dono ke sare certificate lekar aao...
Kitne drame, kitni minnaten lekin principle nahi mana... College campus se jab tak dono ko bahar nikal kar security wale ko samjha nahi diya ki "in dono ko campus me dekha to tumhari naukri gayi"… tab-tak maana nahi...
"Sale ne bahut bejjati ki hai Jisa, iss se badla na liye to jindgi bekar hai"…
"Haan tu sahi kah rahi hai Nandu, Alexa, Alexa"…
"Nahi hai aaj tumhare pichhe, kyon itna pukar rahi hai"…
"Kamal hai kal se Alexa gayab hai... Chal Nandu uske ghar chalte hain, kahin tabiyat to kharab nahi hai"…
"Oye ullu, phone nahi kar sakti jo sadak par pichha karne wale anjaan ladke ke ghar jayegi"…
"Nahi re Nandu, wo achha ladka hai... Tu jaisa soch rahi waise wo mere pichhe nahi rahta, Don't worry"…
"Haan samjh gayi achha ladka hai, to phone kar le na"…
Nandni ki baat maan'kar Alexa ko wo call lagai... 3 ghanti baad wo call pick karte…. "Alexa, cuteee kal se kidhar ho"…
Alexa:- Girlfriend ke sath hun madam, kuch jaroori ho to batao...
"Batao iski bhi girlfriend hai, aur mujhe ab tak boyfriend nahi mila"… Mike daba'kar Nandu se kahti hui, Jivisha phone par javab deti kahne lagi.… "Alexa, Vyom ka number ya pata hoga tumhare pass"…
Alexa:- No
Jivisha:- Achha meri gadi kahan se pick ki thi uss din...
Alexa:- Adress send mar diya hai…
Jivisha:- Nandu tu ghar ja main jara Vyom se milkar aati hun...
Nandni:- Tujhe nahi lagta ki uss din apartment ke samne tumne correct conclusion nikala tha ki wo ladka Vyom tujhe fasa raha hai...
Jivisha:- Ja na bahan mai 4 baje tak pakka laut aaungi.…
Nandni kuch sochti hui…. "Hmmm ! Thik hai tu ja, mai ek cup coffee pikar ja rahi... Waise ek baat kah dun, musibat aati nahi balki hum khud nimantran dete hain"…
Jivisha apne dono hath jod'kar chhota sa "sorry" ka expression apne chehre par layi aur pata dekh'kar Mundhwa Road Chowk ke liye nikal gayi. Uske jate hi Nandni ne Alexa ko bula liya.….
"Kya hua, ab mujhe Jivisha ke pass na rahne ka bol'kar apne pass bula rahi… kahin kuch-kuch hone to nahi laga"…
Nandni:- Very funny.. suno ek kidnapping karni hai…
Alexa:- Coffee ka nasha bhi chadhta hai, aaj pata chala...
Nandni:- Alexa, tease mat karo please…
Alexa:- Kidnapping ki baat karogi to yahi kahunga na...
Nandni:- Alexa please, pichhli baar wo Apini fasa raha tha aur iss baar ye Vyom hai...
Alexa:- Tum galat ho Nandu, Jivisha ko Apini fasa jaroor raha tha. Infact fasa bhi chuka tha, lekin wo khud se kise chuni.…
Nandni:- Mai kuch nahi janti... Mujhe pasand nahi ki koi Nischal aur Jivisha ke bich me aaye...
Alexa:- To aise kaho na sidha point to point. But again sorry. Main kidnap nahi kar sakta.…
Nandni lagbhag Alexa se lad gayi. Dono ke bich hot discussion jari tha jab'tak Jivisha, Alexa ke bataye pate par pahunch chuki thi.… "Shukr hai ye yahin par hai". Sadak ke dusre kinare se ek najar Vyom ko dekhi... Aur jab dekhi to bus dekhti rah gayi.
Vyom side walk ke kinare lage street bench par baitha hua tha. Shyad kuch dhyan laga'kar soch raha tha, isliye thik samne Jivisha khadi thi aur wo dekh nahi raha tha. Uske muskurata sunder chehra itna pyara lag raha tha ki Jivisha khud ko rok nahi payi usse dhyan laga'kar dekhne se... Vyom ek aakarshan sa tha, jisme dub'kar Jivisha khud hi uske ore khinchi chali ja rahi thi.… Jivisha, Vyom ko dekh'kar muskurati hui khud se kahne lagi…..
"Maan'na padega, style aur presentation me koi kami nahi hai. Bhid me mai jaise alag dikh jati hun, ye bhi bilkul waisa hi hai... Lekin akdu kahin ka, mujhe bhav hi nahi deta. Itni khubsurat aur pyari ladki usse milne aayi hai aur ye pata nahi kiske khyalon me duba hai... Hey bhagwan kuch to aisa karo ki wo mujh'par bhi dhyan de"….
Vyom achanak hi najar utha'kar samne dekhne laga... Jivisha ko apne thik samne sadak ke dusre ore dekh'kar wo hanste huye hathon se ishara karne laga aur dil ke ander.…. "Uffff !!!! Lagta hai ye mujhe Pune me kaam nahi karne degi."
Vyom hath dikhate khud me soch hi raha tha, tabhi usse apne aas-pass kuch to mehsus hua. Vyom gahri shwans khinch'kar ek pal ke liye apni aakhen band kiya aur dhyan lagaya… fir apni aakhen khol'kar, bus apni najren ghuma'kar charo ore ka jayja lene laga.
Najre jab samne padi to 6 inch ke fasle par Jivisha, Vyom ke bilkul karib khadi thi. Bilkul kho jane wala ye pal tha. Jivisha ke halke chamkte chehre par faili khili si muskaan kisi ko bhi moh le. Uski gahri nili aakhen, jinse najren mili to bus ulajh'kar rah jaye. Jivisha ko dekh'kar Vyom bhi utna hi khili si pratkriya aur pyari si muskaan diya.…
"Tumhe dekhta rahunga to yahan ka kaam kabhi khatm nahi hoga miss"…
"Naam puchh sakte ho. Ye baar-baar miss kyon kahte ho"…
"Puchh liya aur kahin tumne ithla'kar mana kar diya to"….
"Kya pata ye ladki tumse khud dosti karne ke liye taiyar ho... Aur tum bevajah dar rahe"….
"Tumhe itne karib dekh'kar meri shwans chadh rahi hai.… Aisa na ho ki tumhe dekhne me itna kho jaun ki shwans lena hi bhul jaun"….
Khili si hansi ke sath Jivisha apni palken niche jhuka'kar paas ke bench ki ore badhti.… "Aaram se shwans le lo, mai yahin baithi hun"…..
Voyom bhi Jivisha ke karib baith'te.… "Tumhe na dekhna meri bhul ho sakti hai, lekin iss bhul ne shayad hume pass la diya hai"….
"Jivisha, naam hai aur kribi mujhe kisi bhi naam se pukare, har naam sun'ne me pyara lagta hai"…
"Jivisha, Sankrit ka ek shabd jiska arth hota hai 'jine ki chahat'... Ye naam tum par jachta hai. 'Uttarashada Nakshatra' me paida hui ladki ka substitute naam bhi Jivisha rakhte hai."
Fir se wahi pyari si khili hansi Jivisha ki... "To kya ab mera hath thamne ke liye itni dur se ghuma fira'kar jyotish sastr par aaoge. Ant me kahoge lao hath dekh'kar bhawishya batata hun"…
"Tum sach me pagal ho. Waise ye compliment tumhe har kisi se sun'ne ko mil hi jata hoga"….
"Aanhhhh, ye ladka to aaj hi fasa lega Jivisha ko.… Alexa mujhse ab bardast nahi ho raha"….. Alexa, Nandni ke pass khada, dono (Jivisha aur Vyom) ki baton ka sidha live prasaran suna raha tha, jise sun'kar Nandni puri tarah baukhlati hui kahne lagi...
Alexa:- Kya karun fir, uda lun abhi sabke bich se...
Nandni:- Itni bhid-bhad wale ilake se Vyom ko gayab kar sakte ho kya? Aur Jivisha ki ikchha shakti ka kya? Wo jis hisab se rujhan dhikha rahi hai, uske pass se yadi Vyom ko uthane bhi gaye to wo kisi bhi tarah ka bawal macha sakti hai...
"Point hai Nandu, thanks. Koi nahi kuch na kuch to abhi hi sochna hoga"…. Alexa apni baat kahta kutil muskaan ke sath Nandu ko dekh raha tha.…